ສຳນັກຂ່າວເອເອບພີ ລາຍງານໃນວັນທີ 12 ຕຸລານີ້ວ່າ ໃນມື້ວານນີ້ (11 ຕຸລາ) ທ່ານ ວະລາດີເມຍ ປູຕິນ ໄດ້ປະກາດຍົກເລີກການເດີນທາງຢ້ຽມຢາມປະເທດຝຣັ່ງ ຊຶ່ງເກີດຂຶ້ນພາຍຫລັງທີ່ ທ່ານ ຟຣັງຊົວ ອອລລອງ ປະທານາທິບໍດີຝຣັ່ງ ໄດ້ກ່າວຫາຣັດເຊຍ ໃນວັນທີ 10 ຕຸລາຜ່ານມາວ່າ ກອງກຳລັງລັດຖະບານຊີຣີ ໄດ້ກໍ່ອາຊະຍາກຳສົງຄາມຢູ່ເມືອງອະເລບໂປ ໂດຍມີປະຕິບັດການໂຈມຕີທາງອາກາດຂອງຣັດເຊຍ ຊ່ວຍໃຫ້ການສະໜັບສະໜູນ.
ທ່ານ ປູຕິນ ມີກຳນົດເດີນທາງຢ້ຽມຢາມປາຣີ ໃນວັນຈັນທີ 19 ຕຸລາທີ່ຈະມາເຖິງ ເພື່ອເຂົ້າຮ່ວມພິທີເປີດສູນທາງສາສະໜາຂອງຣັດເຊຍແຫ່ງໃໝ່ ຊຶ່ງຜູ້ນຳຝຣັ່ງກໍໄດ້ອອກມາເປີດເຜີຍກ່ອນໜ້ານີ້ວ່າ ປະທານາທິບໍດີຣັດເຊຍ ມີກຳນົດເຂົ້າພົບປະຫາລືກັບຕົນເອງ ກ່ຽວກັບບັນຫາຊີຣີອີກດ້ວຍ.
ດ້ານໂຄສົກທຳນຽບປະທານາທິບໍດີຣັດເຊຍ ທ່ານ ດິມິທຣີ ເປສະຄອບ ໄດ້ລະບຸວ່າ ທ່ານ ປູຕິນ ພ້ອມທີ່ຈະເດີນທາງໄປຢາມຝຣັ່ງ ກໍໃນເມື່ອມີຄວາມຮູ້ສຶກສະບາຍໃຈກັບ ປະທານາທິບໍດີ ຝຣັ່ງຊົວ ອອລລອງ ແລະ ບອກອີກວ່າ ຣັດເຊຍຈະລໍຖ້າຈົນກວ່າເວລາແຫ່ງຄວາມສະບາຍໃຈນັ້ນມາເຖິງ. ສ່ວນທ່ານ ຟຣັ່ງຊົວ ອອລລອງ ໄດ້ອອກມາກ່າວຕໍ່ກໍລະນີນີ້ວ່າ ຝຣັ່ງ ແລະ ຣັດເຊຍ ມີຄວາມເຫັນທີ່ແຕກຕ່າງກັນໃຫຍ່ຫລວງ ກ່ຽວກັບບັນຫາຊີຣີ ແລະ ທ່ານກຽມພ້ອມທີ່ຈະພົບປະກັບຜູ້ນຳຣັດເຊຍທຸກເວລາ ເພື່ອສັນຕິພາບໃນພາຍພາກໜ້າ.
ຕິດຕາມເຮົາທາງFacebook ກົດຖືກໃຈເລີຍ!