ສຳນັກຂ່າວຕ່າງປະເທດ ລາຍງານໃນວັນທີ 11 ຕຸລາຜ່ານມານີ້ວ່າ ທ່ານ ໂຣດຣິໂກ ດູເຕີເຕ ປະທານາທິບໍດີຟິລິບປິນ ໄດ້ປະກາດຈະເດີນທາງຢ້ຽມຢາມ ສາທາລະນະລັດປະຊາຊົນຈີນ ຢ່າງເປັນທາງການເປັນປະເທດທຳອິດ ພາຍຫລັງເຂົ້າຮັບຕຳແໜ່ງປະທານາທິບໍດີ ນັບຕັ້ງແຕ່ວັນທີ 30 ມິຖຸນາທີ່ຜ່ານມາ ຊຶ່ງເປັນການເຄື່ອນໄຫວໃນທາງສັນຍາລັກ ທີ່ເນັ້ນຢ້ຳລຳດັບຄວາມສຳຄັນ ທາງນະໂຍບາຍການຕ່າງປະເທດ ທີ່ຫັນເຫອອກຈາກອາເມຣິກາ ແລະ ພັດທະນາຄວາມສຳພັນກັບຈີນແທນ.
ຜູ້ນຳຟິລິບປິນບໍ່ໄດ້ລະບຸເຖິງວັນ ແລະ ເວລາຂອງການເດີນທາງຢ້ຽມຢາມດັ່ງກ່າວເທື່ອ ມີແຕ່ໄດ້ກ່າວວ່າ ມັນຈະເກີດຂຶ້ນກ່ອນທີ່ທ່ານຈະເດີນທາງຢ້ຽມຢາມປະເທດຍີ່ປຸ່ນ ໃນວັນທີ 25-27 ຕຸລານີ້ ຊຶ່ງພາຍຫລັງເດີນທາງຢ້ຽມຢາມຍີ່ປຸ່ນແລ້ວ ທ່ານ ດູເຕີເຕ ກໍຍັງໄດ້ລະບຸອີກວ່າ ບາງທີຈະເດີນທາງໄປຢ້ຽມຢາມຣັດເຊຍຕໍ່ ພາຍຫລັງຈາກນັ້ນ.
ທ່ານ ດູເຕີເຕ ມີຄວາມມຸ່ງຫວັງໃນການພັດທະນາຄວາມສຳພັນຢ່າງໃກ້ຊິດກັບ ຣັດເຊຍ ແລະ ຈີນ, ໃນຂະນະດຽວກັນ ທ່ານໄດ້ສະແດງທັດສະນະເຫີນຫ່າງອອກຈາກອາເມຣິກາ ເຖິງແມ່ນອາເມຣິກາ ຈະເປັນອະດີດເຈົ້າອານານິຍົມປົກຄອງຟິລິບປິນມາກ່ອນ ແລະ ເປັນພັນທະມິດດ້ານການທະຫານກັບຟິລິບປິນກໍຕາມ.
ຕິດຕາມເຮົາທາງFacebook ກົດຖືກໃຈເລີຍ!