ຣັດເຊຍ ແຈ້ງໃຫ້ຮູ້ເມື່ອວັນທີ 5 ຕຸລານີ້ວ່າ ປະເທດນີ້ຈະງົດຂໍ້ຕົກລົງກ່ຽວກັບນີວເຄຼຍ ແລະ ການຄົ້ນຄວ້າກ່ຽວກັບພະລັງງານນີວເຄຼຍ ທີ່ໄດ້ລົງນາມກັບ ສ ອາເມຣິກາ ເມື່ອປີ 2013 ທັງນີ້ກໍ່ເພື່ອເປັນການຕອບໂຕ້ຕໍ່ການທີ່ ສ ອາເມຣິກາ ໃຊ້ມາດຕະການຂວ້ຳບາດຣັດເຊຍ ທີ່ພົວພັນເຖິງບັນຫາອູແກຣນ.
ລັດຖະບານຣັດເຊຍ ປະກາດດຳລັດຜ່ານເວບໄຊທາງການ ຊຶ່ງໄດ້ຮັບການລົງນາມໂດຍນາຍົກລັດຖະມົນຕີ ດີມີຕຣີ ເມດເວເດບ ໂດຍໄດ້ຊີ້ແຈງວ່າ: “ການທີ່ ສ ອາເມຣິກາ ຕໍ່ກຳນົດຄຳສັ່ງຂວ້ຳບາດຕ່າງໆຢ່າງສະໝ່ຳສະເໝີ ມຸ່ງໃສ່ຣັດເຊຍ ໃນນັ້ນມີການງົດການຮ່ວມມື ຣັດເຊຍ-ສ ອາເມຣິກາ ໃນຂົງເຂດພະລັງງານນີວເຄຼຍ ເປັນການຮຽກຮ້ອງໃຫ້ (ຝ່າຍຣັດເຊຍ) ຕ້ອງໄດ້ໃຊ້ມາດຕະການຕອບໂຕ້ຕໍ່ ສ ອາເມຣິກາ”.
ໃນດຳລັດດັ່ງກ່າວໃຫ້ຮູ້ວ່າ “ຄົນອາເມຣິກາທຸກໆຄົນ ຈະບໍ່ໄດ້ຮັບອະນຸຍາດໃຫ້ເຂົ້າໄປໃນພື້ນຖານນີວເຄຼຍຂອງຣັດເຊຍອີກ” ໃນຂະນະດຽວກັນ ກະຊວງການຕ່າງປະເທດຣັດເຊຍ ກໍ່ໄດ້ຖະແຫຼງວ່າ ຣັດເຊຍ “ບໍ່ເຊື່ອໝັ້ນ ສ ອາເມຣິກາ ໃນຂົງເຂດທີ່ສະດຸ້ງໄວຄືແນວນັ້ນອີກແລ້ວ.”
ການເຄື່ອນໄຫວດັ່ງກ່າວຂອງຣັດເຊຍ ມີຂຶ້ນ 2 ວັນ ຫຼັງຈາກທີ່ປະທານາທິບໍດີຣັດເຊຍ ວາລາດີເມຍ ປູຕິນ ຖະແຫຼງເມື່ອວັນທີ 3 ຕຸລາ ເຖິງການງົດສົນທິສັນຍາທີ່ໄດ້ລົງນາມກັບ ສ ອາເມຣິກາ ເມື່ອປີ 2010 ເພື່ອປັດເປົ່າເຊື້ອໄຟນີວເຄຼຍລະດັບອາວຸດ.
ທີ່ມາຈາກ: http://www.vientianemai.net/khao/16960.html
ຕິດຕາມຂ່າວເສດຖະກິດລາວ ກົດໄລຄ໌ເລີຍ!