ຂປລ. ວັນທີ 7 ຕຸລາ ເຊິ່ງເປັນວັນຄູແຫ່ງຊາດ ບັນດາໂຮງຮຽນຊັ້ນຕ່າງໆ ກໍຄືສະຖາບັນການສຶກສາ ໃນຂອບເຂດທົ່ວປະເທດ ໄດ້ຈັດພິທີສະເຫລີມສະຫລອງ ວັນຄູແຫ່ງຊາດ ຄົບຮອບ 22 ປີ ເຊັ່ນ: ໂຮງຮຽນອະນຸບານ-ປະຖົມສີວັດທະນາ, ອະນຸບານສາທາລະນະສຸກ, ໂຮງຮຽນ ມສ ເພຍວັດ, ມສ ໄຊເສດຖາ ເຊິ່ງໄດ້ຈັດພິທີສະຫລຸບ ແລະ ຫວນຄືນມູນເຊື້ອອັນດີງາມຂອງຄູ-ອາຈານ ພ້ອມທັງເຫລົ່າບົດຮຽນ ແລະ ປະສົບການຕ່າງໆຂອງຄູ, ນັກຮຽນດີເດັ່ນ ເພື່ອເປັນບົດຮຽນໃຫ້ແກ່ນ້ອງນັກຮຽນ, ຄູ-ອາຈານ ໄດ້ເອົາເປັນແບບຢ່າງໃນການປະຕິບັດຕົນໃນສົກຮຽນນີ້.
ສະເພາະຢູ່ໂຮງຮຽນ ມສ ເພຍວັດ ອາຈານ ຄໍາວອນ ສໍຫລວງໂຄດ ຜູ້ອໍານວຍການໂຮງຮຽນ ໄດ້ຍົກໃຫ້ເຫັນເຖິງວັນສໍາຄັນດັ່ງກ່າວ, ໂດຍກ່າວວ່າ: ວັນຄູແຫ່ງຊາດ ເປັນວັນໜຶ່ງທີ່ສໍາຄັນໃນປະຫວັດຂອງຊາດລາວເຮົາ ເພາະວ່າ ຄູບໍ່ພຽງແຕ່ໄດ້ປະກອບສ່ວນເຂົ້າໃນວຽກງານສຶກສາເທົ່ານັ້ນ, ແຕ່ຫາກຍັງໄດ້ປະກອບສ່ວນຢ່າງຕັ້ງໜ້າ ເຂົ້າໃນພາລະກິດແຫ່ງການຕໍ່ສູ້ເພື່ອຄວາມເປັນເອກະລາດ ແລະ ຄວາມວັດທະນາຖາວອນຂອງຊາດ. ພ້ອມນີ້, ການຮຽນ-ການສອນ ໄດ້ກາຍເປັນປັດໄຈໜຶ່ງທີ່ສຳຄັນ ໃນການຕັດສິນຄຸນນະ ພາບຂອງການສຶກສາ ກໍຄືການພັດທະນາຊັບພະຍາກອນມະນຸດ ແລະ ທຸກຄົນມີຄວາມຮູ້ໂດຍຜ່ານຂະບວນການສິດສອນຂອງຄູ. ສະນັ້ນ, ເພື່ອເຮັດໃຫ້ພົນລະເມືອງລາວທຸກຊັ້ນຄົນ ໄດ້ເຂົ້າໃຈຢ່າງເລິກເຊິ່ງ, ຮູ້ເຖິງປະຫວັດຄວາມເປັນມາກຽດສັກສີ, ຕໍ່ອາຊີບຄູ ແລະ ເປັນວັນແຫ່ງການເສີມຂະຫຍາຍມູນເຊື້ອຂອງຄູຄໍາ ຜູ້ທີ່ມີຄວາມດຸໝັ້ນຂະຫຍັນພຽນ ແລະ ໄດ້ອຸທິດໝົດສະຕິປັນຍາ, ເລືອດເນື້ອ ແລະ ເຫື່ອແຮງຂອງຕົນເພື່ອພາລະກິດການສຶກສາແຫ່ງຊາດລາວ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!