ໃນວັນທີ 4 ຕຸລາ 2016 ຜ່ານມານີ້, ເຈົ້າໜ້າທີ່ສະເພາະກິດ ປກສ ແຂວງບໍ່ແກ້ວສາມາດຈັບກຸມ ທ້າວ ສຸວິດ ແສງຈັນໄດ້ພ້ອມກາງຢາບ້າ 6 ມັດເປັນຫລັກຖານ ພາຍຫລັງເຈົ້າໜ້າທີ່ຕໍາຫລວດໄດ້ຮັບຂໍ້ມູນການຄ້າຂາຍຢາບ້າ ແລະ ເວລາຕໍ່ມາໄດ້ລົງມືກວດຄົ້ນກະເປົາເຄື່ອງຂອງ ທ້າວ ສຸວິດ ແສງຈັນ ອາຍຸ 16 ປີ, ອາຊີບ ນັກຮຽນ ຊົນເຜົ່າມົ້ງ, ຢູ່ບ້ານໄຊເທົ່າ ເມືອງ ວຽງແກ່ນ, ແຂວງຊຽງຣາຍ ( ປະເທດໄທ ) ທີ່ພວມຂີ່ລົດໂດຍສານຈາກຄິວລົດສີດອນມີ ເມືອງຫ້ວຍຊາຍ ແຂວງບໍ່ແກ້ວ ເພື່ອຈະໄປເມືອງປາກທາ ແຂວງບໍ່ແກ້ວ.
ຜ່ານການກວດຄົ້ນເຈົ້າໜ້າທີ່ໄດ້ພົບເຫັນ ຢາບ້າຈຳນວນ 6 ມັດ, ເທົ່າກັບ 12.000 ເມັດ, ຢູ່ໃນກະເປົາເຄື່ອງຂອງຜູ້ກ່ຽວ ດັ່ງນັ້ນ, ເຈົ້າໜ້າທີ່ ປກສ ແຂວງບໍ່ແກ້ວ ຈຶ່ງໄດ້ກັກຕົວຜູ້ກ່ຽວມາທຳການສືບສວນ-ສອບສວນ.
ຜ່ານການສືບສວນ-ສອບສວນ ໃນເບື້ອງຕົ້ນ ຜູ້ກ່ຽວຮັບສາລະພາບວ່າ: ຢາບ້າຈຳນວນດັ່ງກ່າວນີ້ ບໍ່ແມ່ນຂອງຜູ້ກ່ຽວ, ມີຄົນເຜົ່າມົ້ງ ບໍ່ຮູ້ຊື່ໄດ້ເອົາມາຝາກຕົນ ແລ້ວບອກວ່າຖ້າໄປຮອດສາມແຍກ ບ້ານໄຊຈະເລີນ ເມືອງຫ້ວຍຊາຍ ແຂວງບໍ່ແກ້ວ ແລ້ວຈະມີຄົນມາຮັບເອົາເຄື່ອງນຳ ແລະ ໄດ້ຄ່າຝາກເຄື່ອງເປັນເງີນ 20.000 ກີບ (ຊາວພັນກີບ) ພໍມາຮອດຈຸດກວດກາເຂດບ້ານດອນ ເມືອງຫ້ວຍຊາຍ ແຂວງບໍ່ແກ້ວ ຈຶ່ງຖືກເຈົ້າໜ້າທີ່ຂອງພວກເຮົາກວດ ແລະ ໄດ້ກັກຕົວໄວ້ເພື່ອມາທຳການ ສືບສວນ-ສອບສວນ ຂະຫຍາຍຜົນຫາຜູ້ຮ່ວມຂະບວນການຄ້າຢາບ້າລາຍນີ້ ມາລົງໂທດຕາມລະບຽບກົດໝາຍ.
ທີ່ມາ: ສຳນັກຂ່າວສານປະເທດລາວ