ທ່ານນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ໃຫ້ຮູ້ວ່າ:
ໃນໄລຍະຜ່ານມາ ລັດສູນເສຍລາຍຮັບຢ່າງຫລວງຫລາຍຈາກການຍົກເວັ້ນພາສີນຳເຂົ້ານ້ຳມັນ
ໂດຍສະເພາະການນຳເຂົ້າເພື່ອນຳໃຊ້ໃນໂຄງການຂອງລັດ.
ທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ກ່າວວ່າ: ໃນໄລຍະຜ່ານມາ, ການຍົກ
ເວັ້ນພາສີນຳເຂົ້ານ້ຳມັນເປັນຈຳນວນຫລາຍນັ້ນ ກໍແມ່ນສາເຫດໜຶ່ງທີ່ເຮັດໃຫ້ການເກັບລາຍຮັບ
ເຂົ້າງົບປະມານບໍ່ໄດ້ຕາມເປົ້າໝາຍ. ການຍົກເວັ້ນສ່ວນຫລາຍແມ່ນເພື່ອມາຮັບໃຊ້ໃຫ້ແກ່ບັນດາ
ໂຄງການຂະໜາດໃຫຍ່ຂອງລັດ ຄືກໍ່ສ້າງເຂື່ອນໄຟຟ້າ, ໂຄງການບໍ່ແຮ່, ຂະ ຫຍາຍຕາໜ່າງໄຟຟ້າ
ແລະ ອື່ນໆ.
ເຖິງວ່າກົດໝາຍສົ່ງເສີມການລົງທຶນສະບັບໃໝ່ ຈະໄດ້ຫລີກເວັ້ນບໍ່ໃຫ້ມີການຍົກເວັ້ນພາສີອາກອນ
ນຳເຂົ້ານ້ຳມັນກໍຕາມ, ແຕ່ກໍຍັງມີບາງໂຄງການທີ່ໄດ້ຮັບອະນຸມັດຍົກເວັ້ນພາສີນ້ຳມັນຢູ່ ເນື່ອງຈາກ
ໄດ້ສ້າງຂຶ້ນກ່ອນກົດໝາຍສົ່ງເສີມການລົງທຶນສະບັບໃໝ່ ຈະມີຜົນນຳໃຊ້ ແລະ ການອະນຸຍາດນຳ
ເຂົ້ານ້ຳມັນບໍລິສັດໜຶ່ງ ຈະບໍ່ໃຫ້ຖືເອກະສານ 2 ຊຸດ ທີ່ເປັນການນຳເຂົ້ານ້ຳມັນຊະນິດດຽວກັນ ແລະ
ດ່ານດຽວກັນ ແລະ ຕ້ອງນຳເຂົ້າໃຫ້ໝົດຕາມປະລິມານທີ່ກຳນົດ ຫລື ຍັງເຫລືອໜ້ອຍກວ່າ 30%
ຂອງການນຳເຂົ້າເບື້ອງຕົ້ນກ່ອນຈະອະນຸຍາດນຳເຂົ້າເພີ່ມຕື່ມ, ທັງນີ້ເພື່ອຮັບປະກັນບໍ່ໃຫ້ມີການ
ນຳເຂົ້າທີ່ເກີນຄວາມສາມາດຂອງປ້ຳ ຫລື ສາງ ອັນຈະເປັນສາເຫດຕົ້ນຕໍຂອງການລັກລອບນ້ຳມັນ
ໄປຊື້ – ຂາຍຊະຊາຍ ເປັນການປັ່ນປ່ວນຂອງຕະຫລາດນ້ຳມັນພາຍໃນປະເທດ. ແນວໃດກໍຕາມ,
ການສືບຕໍ່ນຳໃຊ້ລາຄາກາງ ເພື່ອແຈ້ງເສຍພາສີ -ອາກອນນຳເຂົ້າ ຍັງບໍ່ທັນແມ່ນລາຄາຕົວຈິງ
ເຊິ່ງເຮັດໃຫ້ລັດເສຍລາຍຮັບທີ່ສາມາດເກັບຈາກການນຳເຂົ້ານ້ຳມັນໃນແຕ່ລະປີ ແລະ ທັງບໍ່ສອດ
ຄ່ອງກັບພັນທະສັນຍາທີ່ ສປປ ລາວ ມີຕໍ່ອົງການການຄ້າໂລກ ກ່ຽວກັບການລຶບລ້າງລາຄາກາງ
ຂອງມູນຄ່າການແຈ້ງພາສີສຳລັບການນຳເຂົ້າລາຄານ້ຳມັນເຊື້ອໄຟ ແລະ ສະເພາະ 6 ເດືອນຕົ້ນ
ສົກປີ 2014 ລັດໄດ້ສູນເສຍລາຍຮັບຈາກການຍົກເວັ້ນພາສີ – ອາກອນນ້ຳມັນເຖິງ 174 ຕື້ກວ່າກີບ.
ແຫຼ່ງຂ່າວ: ໜັງສືພິມລາວພັດທະນາ