ສຳນັກຂ່າວຣອຍເຕີ ລາຍງານໃນວັນທີ 4 ຕຸລາຜ່ານມານີ້ວ່າ ລັດຖະບານຕວກກີ ມີຄຳສັ່ງໃຫ້ງົດປະຕິບັດໜ້າທີ່ຊົ່ວຄາວ ເຈົ້າໜ້າທີ່ຕຳຫລວດ 12,801 ຄົນ ທີ່ຖືກສົງໄສວ່າ ມີສ່ວນກ່ຽວຂ້ອງກັບເຫດການລັດຖະປະຫານທີ່ຫລົ້ມເຫລວ ເມື່ອວັນທີ 15 ກໍລະກົດທີ່ຜ່ານມາ ໂດຍຄຳສັ່ງດັ່ງກ່າວນີ້ມີຂຶ້ນ ພາຍຫລັງທີ່ກະຊວງພາຍໃນຕວກກີ ໄດ້ແຕ່ງຕັ້ງຄະນະກຳມະການສວບສວນຕຳຫລວດຂຶ້ນ ໂດຍບັນດາຕຳຫລວດທີ່ຖືກສັງງົດປະຕິບັດໜ້າທີ່ໃນຄັ້ງນີ້ ປະກອບມີຕຳຫລວດລະດັບຜູ້ບັນຊາການລວມຢູ່ນຳເຖິງ 2,523 ຄົນ ໃນຂະນະທີ່ກອງກຳລັງຕຳຫລວດທົ່ວປະເທດ ມີກຳລັງພົນປະມານ 250,000 ຄົນ.
ທັງນີ້ ລັດຖະບານຕວກກີ ໄດ້ດຳເນີນການກວາດລ້າງຢ່າງໃຫຍ່ ໂດຍໄດ້ສັ່ງປົດ ຫລື ງົດການປະຕິບັດໜ້າທີ່ຊົ່ວຄາວ ພະນັກງານ-ລັດຖະກອນ, ທະຫານ, ຕຳຫລວດ ແລະ ຜູ້ພິພາກສາແລ້ວທັງໝົດ 100,000 ຄົນ, ພ້ອມກັນນັ້ນ ມີພົນລະເມືອງປະມານ 32,000 ຄົນ ຖືກຈັບກຸມ ຊຶ່ງລັດຖະບານເຊື່ອວ່າ ມີສ່ວນຮ່ວມກັບການພະຍາຍາມເຮັດລັດຖະປະຫານທີ່ຫລົ້ມເຫລວ.
ຕິດຕາມເຮົາທາງFacebook ກົດຖືກໃຈເລີຍ!