ສຳນັກຂ່າວຕ່າງປະເທດ ລາຍງານໃນວັນທີ 3 ຕຸລາຜ່ານມານີ້ວ່າ ເກີດເຫດປາຕາຍຈຳນວນມະຫາສານ ຢູ່ທະເລສາບໂຮເຕິຍ (Ho Tay) ນະຄອນຫລວງຮາໂນ້ຍ ປະເທດຫວຽດນາມ ໂດຍເຫດການດັ່ງກ່າວເກີດຂຶ້ນ ໃນວັນອາທິດທີ 2 ຕຸລາຜ່ານມານີ້ ເມື່ອປະຊາຊົນໃນທ້ອງຖິ່ນ ພົບເຫັນປາຈຳນວນຫລາຍພັນໂຕ ຕາຍຟູນ້ຳ ແລະ ຄ້າງຢູ່ຕາມແຄມຝັ່ງຈຳນວນຫລວງຫລາຍ ພ້ອມທັງສົ່ງກິ່ນເໝັນພາຍໃນບໍລິເວນດັ່ງກ່າວ.
ເຈົ້າໜ້າທີ່ອົງການປົກຄອງທ້ອງຖິ່ນຂອງເຂດດັ່ງກ່າວ ໄດ້ດຳເນີນການກວດສອບ ຊຶ່ງທາງພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫລວງຮາໂນຍ ໄດ້ຖືກມອບໝາຍໃຫ້ ດຳເນີນການເກັບກູ້ຊາກປາຕາຍ ແລະ ກຳຈັດ ເພື່ອປ້ອງກັນມົນລະພິດ ທີ່ອາດເກີດຂຶ້ນຕໍ່ສິ່ງແວດລ້ອມ ພາຍໃນບໍລິເວນໃກ້ຄຽງ. ການກວດສອບຂອງເຈົ້າໜ້າທີ່ຫວຽດນາມໃນເບື້ອງຕົ້ນພົບວ່າ ນ້ຳໃນທະເລສາບຂາດອົກຊີເຢັນ ຊຶ່ງອາດເປັນສາເຫດເຮັດໃຫ້ປາຕາຍ, ແນວໃດກໍຕາມ ຍັງຈະຕ້ອງໄດ້ກວດສອບເພີ່ມເຕີມ ເພື່ອຊອກຫາສາເຫດທີ່ເຮັດໃຫ້ນ້ຳໃນທະເລສາບ ມີຄຸນນະພາບຕ່ຳລົງ.
ຕິດຕາມເຮົາທາງFacebook ກົດຖືກໃຈເລີຍ!