ຂປລ. ແຂວງຈໍາປາສັກ ຍັງສືບຕໍ່ນໍາເຂົ້າແນວພັນປາຊະນິດຕ່າງໆ ຈາກປະເທດເພື່ອນບ້ານໃກ້ຄຽງໃນແຕ່ລະປີ ມີຈໍານວນຫລາຍກວ່າ 20 ລ້ານໂຕ ສາເຫດຍ້ອນຂາດພາຍໃນ ບໍ່ສາມາດຕອບສະໜອງໄດ້.
ທ່ານ ຂຸນບົວລົມ ວົງຫາຈັກ ຫົວໜ້າສະຖານີຄົ້ນຄວ້າ ແລະ ຂະຫຍາຍແນວພັນປາຫຼັກ 8 ພະແນກກະສິກໍາ ແລະ ປ່າໄມ້ແຂວງ ໃຫ້ຮູ້ວ່າ: ສະຖານີຄົ້ນຄວ້າ ແລະ ຂະຫຍາຍແນວພັນປາ ໄດ້ທໍາການຄົ້ນຄວ້າ ແລະ ຜະລິດແນວພັນປາປະເພດຕ່າງໆຄື: ປານິນ, ປາໄນ, ປາປາກ, ປາຈີນ, ປາດຸກ, ປາເອິນ, ປາເຄິງ, ປາຊວຍ, ປາພອນ ເຊິ່ງປາແຕ່ລະຊະນິດ ແມ່ນຈະໃຊ້ເວລາໃນການເພາະພັນແຕກຕ່າງກັນ ໂດຍອີງໃສ່ວ່າ: ປາຊະນິດນີ້ ມີຄວາມເໝາະສົມໃນການເພາະພັນໃນເດືອນນີ້ ກໍທໍາການເພາະພັນເລີຍ ແຕ່ເມື່ອເພາະພັນອອກມາ ແມ່ນໃຊ້ເວລາ 45-60 ວັນກໍສາມາດຈໍາໜ່າຍໄດ້. ສະເພາະລາຄາຈໍາໜ່າຍປານິນ, ປາໄນ, ປາດຸກ 200 ກີບຕໍ່ໂຕ; ປາເອິນ, ປາພອນ, ປາເຄິງ 1.500-2.000 ກີບຕໍ່ໂຕ ຕາມຂະໜາດຂອງໂຕປາ ແລະ ໃນແຕ່ລະປີ ສະຖານີມີຄວາມສາມາດ ຜະລິດແນວພັນປາໄດ້ທັງໝົດປະມານ 1,5 ລ້ານໂຕ, ທັງໆທີ່ມີຄວາມຕ້ອງການຜະລິດ 10-20 ລ້ານໂຕຕໍ່ປີ, ຕໍ່ກັບຜົນຜະລິດດັ່ງກ່າວ ແມ່ນຍັງບໍ່ທັນສາມາດຕອບສະໜອງ ກັບຄວາມຕ້ອງການດ້ານແນວພັນ ໃຫ້ແກ່ຊາວກະສິກອນ ກໍ່ຄືຜູ້ທີ່ມີອາຊີບລ້ຽງປາຂາຍ ຈຶ່ງຈໍາເປັນຕ້ອງໄດ້ນໍາເຂົ້າແນວພັນປາຈາກປະເທດໄທ ໃນແຕ່ລະປີຫຼາຍກວ່າ 20 ລ້ານໂຕ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!