ເຈົ້າໜ້າທີ່ຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ນັບແຕ່ວັນທີ 1-30 ກັນຍານີ້, ໃນນະຄອນຫລວງວຽງຈັນ ມີອຸປະຕິເຫດເກີດຂຶ້ນ 123 ກໍລະນີ, ໃນນັ້ນ ມີຜູ້ໄດ້ຮັບບາດເຈັບຫລາຍຮ້ອຍຄົນ, ພາຫະນະເປ່ເພເປັນຈຳນວນຫລາຍ ແລະສົ່ງຜົນໃຫ້ມີຜູ້ເສຍຊີວິດ 15 ຄົນ, ຊຶ່ງອຸປະຕິເຫດສ່ວນໃຫຍ່ແມ່ນເກີດຈາກການລະເມີດລະບຽບຈະລາຈອນເປັນຕົ້ນ: ເມົາແລ້ວຂັບ ບວກກັບສະພາບຖະໜົນຫົນທາງບາງເສັ້ນບໍ່ຮັບປະກັນດີຄື: ເກີດການເປ່ເພ ເປັນຂຸມເປັນບວກ, ໄຟເຍືອງທາງບໍ່ຮຸ່ງດີ ແລະ ອື່ນໆ,
ຂະນະດຽວກັນໃນໄລຍະນີ້ ໄດ້ມີຝົນຕົກຕິດຕໍ່ກັນຫລາຍວັນ ຈຶ່ງສົ່ງຜົນເຮັດໃຫ້ເສັ້ນທາງປຽກມື່ນ ແລະພາໃຫ້ເກີດອຸປະຕິເຫດໄດ້ງ່າຍ. ຕໍ່ບັນຫາດັ່ງກ່າວເຈົ້າໜ້າທີ່ໄດ້ຮຽກຮ້ອງໃຫ້ທຸກພາກສ່ວນ ກໍຄືນັກຂັບຂີ່ທຸກຄົນຈົ່ງມີສະຕິລະວັງໃນເວລາຂັບຂີ່ພາຫະນະ, ພ້ອມທັງກວດເຊັກສະພາບ ເຕັກນິກລົດເປັນປະຈຳ ເປັນຕົ້ນ ໄຟທ້າຍ, ໄຟລ້ຽວ, ໄຟໜ້າ ແລະ ລະບົບອື່ນໆໃຫ້ ຢູ່ໃນສະພາບປົກກະຕິ, ເພື່ອຮັບປະກັນໃຫ້ການໃຊ້ລົດໃຊ້ຖະໜົນມີຄວາມປອດໄພ ແລະເປັນລະບຽບຮຽບຮ້ອຍທັງເຮັດໃຫ້ຄູ່ຮ່ວມທາງດ້ວຍກັນ ສາມາດສັງເກດເຫັນລົດຂອງແຕ່ລະຝ່າຍໄດ້ເປັນຢ່າງດີ, ທັງເປັນການປ້ອງກັນອຸປະ ຕິເຫດໃຫ້ຫລຸດຜ່ອນລົງນຳອີກ.
ເຈົ້າໜ້າທີ່ໃຫ້ຮູ້ຕື່ມວ່າ: ເມື່ອທ້າຍອາທິດຜ່ານມານີ້, ຢູ່ເຂດບ້ານໂພນໄຮ່ຄຳ, ເມືອງໄຊທານີ, ນະຄອນຫລວງວຽງຈັນ, ກໍມີອຸປະຕິເຫດລົດຈັກຕຳກັນຢ່າງຮຸນແຮງ, ສົ່ງຜົນໃຫ້ທ້າວ ອ໋ອງບີ້, ອາຍຸ 21 ປີ, ຢູ່ບ້ານນາກຸງ, ເມືອງໄຊທານີ ນະຄອນຫລວງວຽງຈັນ ເສຍຊີວິດຄາທີ່.
ທີ່ມາ: ໜັງສືພິມລາວພັດທະນາ