ສຳນັກຂ່າວເອເອບພີ ລາຍງານໃນວັນທີ 2 ຕຸລາຜ່ານມານີ້ວ່າ ຊາວຫວຽດນາມຈຳນວນຫລາຍພັນຄົນ ໄດ້ໂຮມຊຸມນຸມໂດຍສັນຕິ ຢູ່ບໍລິເວນດ້ານໜ້າ ໂຮງງານຟໍໂມຊາ ຂອງນັກລົງທຶນຊາວໄຕ້ຫວັນ ທີ່ແຂວງຮາຕິ່ງ ເພື່ອຮຽກຮ້ອງໃຫ້ທາງການ ປິດໂຮງງານດັ່ງກ່າວ ເນື່ອງຈາກຄຽດແຄ້ນກໍລະນີ ການປ່ອຍນ້ຳເປື້ອນສານພິດລົງສູ່ທະເລ ສົງຜົນເຮັດໃຫ້ປາ ແລະ ສັດທະເລຕາຍຈຳນວນມະຫາສານ ໃນເດືອນເມສາທີ່ຜ່ານມາ ອັນເປັນໄພພິບັດທາງລະບົບນິເວດຄັ້ງຮຸນແຮງທີ່ສຸດ ໃນຮອບຫລາຍສິບປີ ສ້າງຄວາມເສຍຫາຍຕໍ່ວິຖີຊີວິດ ແລະ ຄວາມເປັນຢູ່ຂອງປະຊາຊົນຢູ່ຫລາຍແຂວງ ຕາມແນວຊາຍຝັ່ງທາງພາກກາງຂອງປະເທດ.
ທັງນີ້ ໂຮງງານດັ່ງກ່າວ ໄດ້ອອກມາຍອມຮັບ ເປັນຜູ້ຮັບຜິດຊອບຕໍ່ມົນລະພິດທີ່ເກີດຂຶ້ນ ໂດຍໄດ້ໃຫ້ຄຳໝັ້ນສັນຍາວ່າ ຈະຈ່າຍເງິນຊົດເຊີຍ ຈຳນວນ 500 ລ້ານໂດລາ ເພື່ອທຳຄວາມສະອາດ ແລະ ຊົດເຊີຍແກ່ຜູ້ໄດ້ຮັບຜົນກະທົບ, ດ້ານທາງການຫວຽດນາມ ໄດ້ລະບຸວ່າ ຈະດຳເນີນການຈ່າຍເງິນຊົດເຊີຍ ໃຫ້ແກ່ຜູ້ໄດ້ຮັບຜົນກະທົບ ພາຍໃນເດືອນຕຸລານີ້ ໃນລະຫວ່າງ 130-1,600 ໂດລາຕໍ່ຄົນ ຊຶ່ງຂຶ້ນຢູ່ກັບການຄິດໄລ່ຄວາມເສຍຫາຍ ທີ່ເກີດຂຶ້ນໃນໄລຍະເດືອນເມສາ-ເດືອນກັນຍາທີ່ຜ່ານມາ.
ຕິດຕາມເຮົາທາງFacebook ກົດຖືກໃຈເລີຍ!