ສຳນັກຂ່າວຕ່າງປະເທດ ລາຍງານໃນວັນທີ 9 ກັນຍານີ້ວ່າ ຈີນກຽມເປີດນຳໃຊ້ ຈານຮັບສັນຍານກ້ອງໂທລະທັດວິທະຍຸ FAST (Five-hundred-meter Aperture Spherical Telescope) ໃຫຍ່ທີ່ສຸດໃນໂລກ ພາຍໃນທ້າຍເດືອນກັນຍານີ້ ຫລັງຈາກທຳການກໍ່ສ້າງໃນຂັ້ນຕອນສຸດທ້າຍສຳເລັດ ຊຶ່ງຕັ້ງຢູ່ເທິງພູເຂດເມືອງຜິງຖັງ ແຂວງກຸ້ຍໂຈວ ທາງພາກຕາເວັນຕົກສຽງໃຕ້ ຂອງປະເທດຈີນ, ກ້ອງໂທລະທັດວິທະຍຸດັ່ງກ່າວນີ້ ມີຈານຮັບສັນຍານວິທະຍຸຂະໜາດໃຫຍ່ ເທົ່າກັບສະໜາມເຕະບານ 30 ແຫ່ງລວມກັນ ມີເສັ້ນຜ່າສູນກາງ 500 ແມັດ ໃຫຍ່ກວ່າຫໍສັງເກດດວງດາວອາເຣຊີໂບ (Arecibo Observatory) ຢູ່ເປີໂຕຣິໂກ ແລະ ມີລະດັບຄວາມໄວ ໃນການຮັບສົ່ງສັນຍານສູງກວ່າ ປະມານ 10 ເທົ່າ.
ກ້ອງໂທລະທັດວິທະຍຸ FAST ທີ່ໃຫຍ່ທີ່ສຸດໃນໂລກແຫ່ງນີ້ ເລີ່ມຕົ້ນລົງມືກໍ່ສ້າງໃນເດືອນມີນາ 2011 ຜ່ານມາ ດ້ວຍງົບປະມານການກໍ່ສ້າງທັງໝົດ ປະມານ 1.2 ຕື້ຢວນ.
ຕິດຕາມເຮົາທາງFacebook ກົດຖືກໃຈເລີຍ!