ສຳນັກຂ່າວຕ່າງປະເທດ ລາຍງານໃນວັນທີ 8 ກັນຍາຜ່ານມານີ້ວ່າ ແມ່ນ້ຳດັນດິແຄນ ໄດ້ປ່ຽນສີກາຍເປັນສີແດງຄ້າຍສີເລືອດ ຢູ່ເມືອງໂນຣິສ ປະເທດຣັດເຊຍ ໂດຍປະຊາຊົນທ້ອງຖິ່ນໄດ້ລະບຸວ່າ ແມ່ນ້ຳສາຍດັ່ງກ່າວນີ້ເລີ່ມປ່ຽນສີມາແຕ່ເດືອນມິຖຸນາແລ້ວ ສ້າງຄວາມວິຕົກກັງວົນໃຫ້ແກ່ປະຊາຊົນ ໂດຍຍັງບໍ່ທັນຮູ້ສາເຫດທີ່ແທ້ຈິງ, ໃນນັ້ນ ປະຊາຊົນຈຳນວນໜຶ່ງລະບຸວ່າ ອາດເກີດຍ້ອນແຮ່ເຫລັກທີ່ຢູ່ໃຕ້ດິນ ເປັນສາເຫດເຮັດໃຫ້ນ້ຳປ່ຽນເປັນສີແດງ, ແຕ່ກໍມີອີກຈຳນວນໜຶ່ງໄດ້ເວົ້າວ່າ ອາດເປັນຍ້ອນນ້ຳເປື້ອນ ຫລື ເສດຂີ້ເຫຍື້ອຈາກໂຮງງານອຸດສາຫະກຳ ເພາະແມ່ນ້ຳສາຍດັ່ງກ່າວນີ້ ໄຫລຜ່ານໃກ້ໂຮງງານໂລຫະແຫ່ງໜຶ່ງ.
ດ້ານກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຣັດເຊຍ ໄດ້ອອກມາລະບຸໃນມື້ວັນພຸດທີ 7 ກັນຍາຜ່ານມານີ້ວ່າ ເຈົ້າໜ້າທີ່ຂອງຕົນ ກຳລັງດຳເນີນການສືບສວນວ່າ ສານເຄມີທີ່ເປັນສາເຫດເຮັດໃຫ້ແມ່ນ້ຳປ່ຽນສີ ແມ່ນມາຈາກໃສ ຊຶ່ງເປັນໄປໄດ້ສູງວ່າ ອາດມາຈາກທໍ່ນ້ຳເປື້ອນຂອງ ໂຮງງານໂລຫະ ໂນຣິສ ນິກເກິນ ແຕກ ແລະ ໄຫລລົງສູ່ແມ່ນ້ຳດັ່ງກ່າວ.
