ສຳນັກຂ່າວ NBC NEWS ຊຶ່ງເປັນສື່ຊັ້ນນຳຂອງສະຫະລັດອາເມຣິກາ ໄດ້ລາຍງານຂ່າວ ແລະ ເຜີຍແຜ່ໃຫ້ເຫັນຮູບພາບ ຊຶ່ງສະທ້ອນໃຫ້ເຫັນຄວາມຈິງ ບາດແຜແຫ່ງສົງຄາມລັບ ທີ່ອົງການ CIA ຂອງລັດຖະບານອາເມຣິກາ ໄດ້ກະທຳໃນອະດີດຕໍ່ປະເທດລາວ ຊຶ່ງສົ່ງຜົນເຮັດໃຫ້ກາຍເປັນປະເທດ ທີ່ຖືກຖິ້ມລະເບີດຫລາຍທີ່ສຸດເຖິງ 2 ລ້ານໂຕນ ຕະຫລອດໄລຍະເວລາ 9 ປີ ນັບແຕ່ປີ 1964-1973.
ຮູບພາບລູກສອນໄຟ 2 ລູກ ທີ່ຜະລິດໂດຍສະຫະລັດອາເມຣິກາ ຊຶ່ງປັດຈຸບັນໄດ້ກາຍເປັນເສົາປະຕູຮົ້ວຂອງປະຊາຊົນ ຕະຫລອດຮອດຮູບພາບຂາທຽມຂະໜາດຕ່າງໆ ທີ່ຫ້ອຍຈາກເພດານ ສູນຟື້ນຟູຄົນພິການແຫ່ງຊາດລາວ ໄດ້ສະທ້ອນໃຫ້ເຫັນເງິນຊ່ວຍເຫລືອ ຈຳນວນ 90 ລ້ານໂດລາ ທີ່ລັດຖະບານອາເມຣິກາ ປະກາດໃຫ້ຄວາມຊ່ວຍເຫລືອ ເພື່ອເກັບກູ້ລະເບີດທີ່ບໍ່ທັນແຕກ ອອກຈາກແຜ່ນດິນລາວເປັນຄັ້ງທຳອິດ ນັບຕັ້ງແຕ່ສົງຄາມໄດ້ສິ້ນສຸດລົງ.
ສື່ມວນຊົນຂອງອາເມຣິກາ ຍັງໄດ້ລາຍງານຂໍ້ມູນຂອງ ອົງການເກັບກູ້ລະເບີດແຫ່ງຊາດລາວ (Lao National Regulatory Authority for UXO – NRA) ອີກວ່າ ປະຕິບັດການຖິ້ມລະເບີດຂອງສະຫະລັດອາເມຣິກາ ເກີດຂຶ້ນບໍ່ຕ່ຳກວ່າ 580,000 ຄັ້ງ ຫລື ອາດຈະກ່າວໄດ້ວ່າ ມີການຖິ້ມລະເບີດລົງໃສ່ລາວ ທຸກໆ 8 ນາທີ ໃນຕະຫລອດ 24 ຊົ່ວໂມງ ເປັນເວລາ 9 ປີ ຊຶ່ງໃນນັ້ນ 1 ໃນ 3 ຫລື 80 ລ້ານລູກ ເປັນລະເບີດທີ່ຍັງບໍ່ທັນແຕກ ແຕ່ຍັງຄົງປະສິດທິພາບ ສາມາດເຮັດໃຫ້ປະຊາຊົນໃນປະເທດນີ້ ໄດ້ຮັບບາດເຈັບ ຫລື ເສຍຊີວິດ ຈົນເຖິງປັດຈຸບັນ.
ສຳນັກຂ່າວ CNN ຂອງສະຫະລັດອາເມຣິກາ ກໍໄດ້ລາຍງານຂ່າວອີກວ່າ ປະຊາຊົນລາວຈຳນວນບໍ່ຕ່ຳກວ່າ 200,000 ຄົນ ຖືກສັງຫານ ຫລື ສູນເສຍອະໄວຍະວະຂອງຕົນ ນັບຕັ້ງແຕ່ສົງຄາມຢຸຕິ ແລະ ປັດຈຸບັນນີ້ ຈຳນວນຜູ້ເສຍຊີວິດ ຫລື ພິການ ຈາກລະເບີດຂອງສະຫະລັດອາເມຣິກາທີ່ຕົກຄ້າງ ມີຈຳນວນສະເລ່ຍ 50 ຄົນຕໍ່ປີ ແລະ ພົບອີກວ່າ 40% ຂອງຈຳນວນນີ້ ເປັນເດັກນ້ອຍ ຊຶ່ງເປັນອະນາຄົດຂອງປະເທດຊາດ.
ຕິດຕາມເຮົາທາງFacebook ກົດຖືກໃຈເລີຍ!