ສຳນັກຂ່າວຣອຍເຕີ ລາຍງານໃນວັນທີ 8 ກັນຍານີ້ວ່າ ໃນມື້ວານນີ້ (7 ກັນຍາ) ທ່ານ ຊິນໂຊະ ອາເບະ ນາຍົກລັດຖະມົນຕີຍີ່ປຸ່ນ ໄດ້ກ່າວໃນລະຫວ່າງພົບປະສອງຝ່າຍກັບ ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ທີ່ນະຄອນຫລວງວຽງຈັນ ສປປ ລາວ ກ່ຽວກັບຄວາມຕັ້ງໃຈຂອງລັດຖະບານຍີ່ປຸ່ນ ທີ່ຈະຈັດສົ່ງກຳປັ່ນກວດກາລາດຕະເວນໃຫ້ແກ່ຫວຽດນາມ ຊຶ່ງເຈົ້າໜ້າທີ່ກະຊວງການຕ່າງປະເທດຍີ່ປຸ່ນ ໄດ້ລະບຸວ່າ ຍີ່ປຸ່ນໄດ້ຈັດກຽມກຳປັ່ນດັ່ງກ່າວໄວ້ແລ້ວ ຈຳນວນ 6 ລຳ ຊຶ່ງທັງໝົດແມ່ນເຄີຍໃຊ້ງານມາກ່ອນ, ສ່ວນລາຍລະອຽດຂອງເວລາມອບສົ່ງ ແມ່ນຍັງບໍ່ທັນໄດ້ລະບຸຊັດເຈນ.
ທັງນີ້ ການຕັດສິນໃຈຂອງຍີ່ປຸ່ນ ໃນການຊ່ວຍເຫລືອດ້ານການປ້ອງກັນປະເທດດັ່ງກ່າວ ໃຫ້ແກ່ຫວຽດນາມ ມີຂຶ້ນໃນລະຫວ່າງສະພາບຄວາມເຄັ່ງຕຶງ ຈາກຂໍ້ຂັດແຍ່ງໃນທະເລຈີນໃຕ້ ທີ່ຈີນໄດ້ອ້າງສິດອະທິປະໄຕ ໃນພື້ນທີ່ເກືອບທັງໝົດຂອງທະເລດັ່ງກ່າວນີ້ ຊຶ່ງສ້າງຄວາມຂັດແຍ່ງກັບຫວຽດນາມ ຕະຫລອດຮອດບັນດາປະເທດໃກ້ຄຽງຕ່າງໆເຊັ່ນ ບຣູໄນ, ມາເລເຊຍ, ຟິລິບປິນ ລວມທັງລັດຖະບານໄຕ້ຫວັນອີກດ້ວຍ.
ຕິດຕາມເຮົາທາງFacebook ກົດຖືກໃຈເລີຍ!