ຂປລ. ໃນຕອນເຊົ້າຂອງວັນທີ 6 ກັນຍາ 2016, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເປັນປະທານກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 14 ໂດຍມີລັດຖະມົນຕີຕ່າງປະເທດ ຂອງປະເທດສະມາຊິກອາຊຽນ, ເລຂາທິການໃຫຍ່ອາຊຽນ ແລະ ບັນດາຄະນະຜູ້ແທນເຂົ້າຮ່ວມ.
ກອງປະຊຸມຄັ້ງນີ້ ໄດ້ປຶກສາຫາລືກ່ຽວກັບ ການປະຕິວັດວຽກງານຂອງຂະແໜງການ ທີ່ຢູ່ພາຍໃຕ້ເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ ໃນໄລຍະຜ່ານມາ. ພ້ອມນັ້ນ, ຍັງໄດ້ປຶກສາຫາລືກ່ຽວກັບ ການຈັດຕັ້ງປະຕິບັດແຜນແມ່ບົດ ສຳລັບເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ 2025 ທີ່ບັນດາຜູ້ນຳອາຊຽນ ໄດ້ຮັບຮອງເອົາໃນກອງປະຊຸມສຸດຍອດອາຊຽນ ຄັ້ງທີ 27 ໃນເດືອນພະຈິກ 2015 ຜ່ານມາ ໃຫ້ມີປະສິດທິພາບ ແລະ ປະສິດທິຜົນ. ກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ສະແດງຄວາມພໍໃຈຕໍ່ຄວາມພະຍາ ຍາມ ແລະ ຂໍ້ລິເລີ່ມ ຂອງບັນດາປະເທດສະມາຊິກອາຊຽນ ກໍຄືຂະແໜງການ ພາຍໃຕ້ເສົາຄ້ຳປະຊາຄົມການເມືອງ-ຄວາມໝັ້ນຄົງ ໃນການຈັດຕັ້ງປະຕິບັດແຜນແມ່ບົດ ສຳລັບເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ 2025, ພ້ອມທັງຊຸກຍູ້ໃຫ້ບັນດາຂະແຫນງການ ເພີ່ມທະວີໃນການຈັດຕັ້ງປະຕິບັດກິດຈະກຳ ທີ່ຢູ່ພາຍໃຕ້ຄວາມຮັບຜິດຊອບຂອງຕົນ ແລະ ມີການປະສານງານຢ່າງເປັນລະບົບ ທັງພາຍໃນເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ ແລະ ກັບເສົາຄ້ຳອື່ນໆທີ່ມີວຽກກ່ຽວຂ້ອງກັນ.
ໃນໂອາກາດນີ້, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ແຈ້ງວ່າ: ສປປ ລາວ ໄດ້ໃຫ້່ສັດຕະຍາບັນແກ່ ອະນຸສັນຍາເພີ່ມເຕີມກົດບັດອາຊຽນ ກ່ຽວກັບກົນໄກແກ້ໄຂຂໍ້ແຍ່ງອາຊຽນ ແລະ ໄດ້ມອບສານໃຫ້ສັດຕະຍາບັນ ໃຫ້ແກ່ທ່ານເລຂາທິການໃຫຍ່ອາຊຽນ ເພື່ອເກັບຮັກສາໄວ້ ທີ່ກອງເລຂາອາຊຽນ.
ທີ່ມາ: ຂ່າວສານປະເທດລາວ