ວັນທີ 5 ກັນຍາ 2016 ກ່ອນການເດິນທາງມາຍັງ ສປປ ລາວ ທ່ານ ໂອບາມາ ໄດ້ຖະແຫຼງຂ່າວທີ່ ສປ ຈີນ ເຖິງຈຸດປະສົງໃນການເດິນທາງຢ້ຽມຢາມລາວ ໂດຍເນື້ອໃນທີ່ສຳຄັນແມ່ນ ການແກ້ໄຂບັນຫາລະເບີດບໍ່ທັນແຕກໃນລາວ, ການຄົ້ນຫາສິ່ງເສດເຫຼືອຂອງທະຫານອາເມລິກາ ທີ່ເສຍຊີວິດໃນປາງສົງຄາມຢູ່ລາວ ແລະການຮ່ວມມືກັນພັດທະນາ ກ້າວສູ່ອະນາຄົດທີ່ສົດໃສ.
ທ່ານກ່າວວ່າ: ມັນເປັນບາດກ້າວອັນສຳຄັນຂອງການພົວພັນລະຫວ່າງລາວແລະອາເມລິກາ ເພາະນີ້ຄືເທື່ອທຳອິດຂອງຜູ້ນຳສະຫະລັດທີ່ມາຢ້ຽມຢາມລາວ. ຖ້າຄິດເຖິງການພົວພັນລະຫວ່າງລາວແລະອາເມລິກາ ພວກເຮົາຄວນເບິ່ງການພົວພັນລະຫວ່າງອາເມລິກາແລະຫວຽດນາມ ປະເທດທີ່ຂ້າພະເຈົ້າໄດ້ໄປຢ້ຽມຢາມວ່າງບໍ່ດົນມານັ້ນ, ພກວເຮົາຕ້ອງສ້າງຄວາມໄວ້ເນື້ອເຊື່ອໃຈລະຫວ່າງສອງຊາດ ແລະຫຼາຍຢ່າງທີ່ຈະສາມາດປັບປປຸງໄດ້ກ່ຽວກັບອະດີດ.
ສ່ວນລາວຕ້ອງການເກັບກູ້ລະເບີດທີ່ບໍ່ທັນແຕກ ແຕ່ກໍຍ້ອນສະພາບເສດຖະກິດຈິ່ງບໍ່ສາມາດເຮັດດ້ວຍຕົນເອງໄດ້ ພວກເຮົາຄວນຊ່ວຍເຫຼືືອທາງດ້ານນີ້. ອີກສອງສາມມື້ຂ້າງໜ້າພວກເຮົາຈະມີການເຈລະຈາກັບການນຳຂອງລາວ ຄິດວ່າຈະສາມາດໄດ້ຄຳຕອບອັນແນ່ນອນອອກມາ ກ່ຽວກັບການຊ່ວຍເຫຼືອທາງດ້ານການເກັບກູ້ລະເບີດ, ອາເມລິກາມີໜ້າທີ່ຕ້ອງຊອກຫາຊາກສົບຂອງຜູ້ເສຍສະຫຼະຊີວິດເພື່ອເອົາກັບປະເທດແລະມອບໃຫ້ຄອບຄົວເຂົາເຈົ້າ ນັ້ນມັນເປັນຮີດຄອງແລະໜ້າທີ່ຂອງພວກເຮົາທີ່ຕ້ອງເຮັດ. ນີ້ຄືປະເດັນຫຼັກໆ ທີ່ພວກເຮົາຈະເຮັດ ແຕ່ມັນບໍ່ພຽງແຕ່ເທົ່ານີ້ ພວກເຮົາຕ້ອງການຊ່ວຍເຫຼືອບັນດາປະເທດໃນລຸ່ມແມ່ນ້ຳຂອງ, ຄິດວ່າລາວຈະໄດ້ເຫັນຄວາມກ້າວໜ້າຂອງຫວຽດນາມແລະຈີນແລ້ວ ລາວເອງກໍຢາກກ້າວໄປເຖິງຈຸດນັ້ນ ຂ້າພະເຈົ້າຄິດວ່າພວກເຮົາຈະເປັນຄູ່ພັດທະນາອັນສຳຄັນທີ່ຊ່ວຍໃຫ້ລາວໄປເຖິງຈຸດນັ້ນໄດ້.
ຂ້າພະເຈົ້າໄດ້ເຫັນໃນ ນະຄອນຫຼວງໂຮຈິມິນ ປະຊາຊົນລຸ້ນໃໝ່ລຽນແຖວໃນການໃຫ້ຄວາມຕ້ອນຮັບແລະຕ້ອງການຄວາມກ້າວໜ້າຂອງຊາດ, ພວກເຮົາຈະເລິ່ມຈາກຈຸດດຽວກັນກັບທີ່ພວກເຮົາເຮັດຢູ່ຫວຽດນາມ ແຕ່ຄິດວ່າ ຈະໄດ້ໄວກວ່ານັ້ນ ເພາະເຮົາມີບົດຮຽດຈາກຫວຽດນາມແລ້ວ.