ຂປລ. ມຸນຕີ ໄຊຍະສິດທິວົງ ຜູ້ສື່ຂ່າວຈາກ ແຂວງຫລວງນ້ຳທາໃຫ້ຮູ້ວ່າ: ທ້າຍເດືອນສິງຫາຜ່ານມາ ວິທະຍາໄລຄູ ແຂວງຫລວງນ້ຳທາ ໄດ້ຈັດພິທີມອບ-ຮັບ ໃບປະກາສະນິຍາບັດ ໃຫ້ແກ່ນັກສຶກສາ ຈຳນວນ 309 ຄົນ, ຍິງ 209 ຄົນ. ໃນນັ້ນ ລະບົບຕໍ່ເນື່ອງຊັ້ນສູງ ສາຍຄູອະນຸບານ ຊຸດທີ 3 ມີ 90 ຄົນ ແລະ ສາຍຄູປະຖົມ ຊຸດທີ 4 ມີ 219 ຄົນ ໂດຍແມ່ນທ່ານ ຄຳໄຫລ ສີປະເສີດ ຫົວໜ້າຫ້ອງວ່າການປົກຄອງແຂວງ ເປັນຜູ້ມອບ.

ທ່ານ ຄຳສຸກ ທອງກ່ານ ຮອງຜູ້ອຳນວຍການໂຮງຮຽນວິທະຍາໄລຄູ ແຂວງຫລວງນ້ຳທາ ໃຫ້ຮູ້ວ່າ: ວິທະຍາໄລດັ່ງກ່າວ ເປັນສະຖາບັນການສຶກສາແຫ່ງໜຶ່ງ ໃນຈຳນວນ 10 ແຫ່ງ ຂອງສະຖາບັນສ້າງຄູທົ່ວປະເທດ, ມີພາລະບົດບາດໃນການສ້າງຄູອະນຸບານ ແລະ ຄູປະຖົມລະບົບຊັ້ນກາງ 9+3 ແລະ ຊັ້ນສູງໃຫ້ແກ່ 3 ແຂວງພາກເໜືອ ຄື: ແຂວງຜົ້ງສາລີ, ບໍ່ແກ້ວ ແລະ ແຂວງຫລວງນ້ຳທາ ເຊິ່ງປະກອບມີ ສາຂາວິຊາຮຽນຕາມຫລັກສູດໂຄ່ງຮ່າງ, ຫລັກສູດຂອງກະຊວງສຶກສາທິການ ແລະ ກິລາ ເພື່ອແນ່ໃສ່ການພັດທະນາຊັບພະຍາກອນມະນຸດ ໃຫ້ມີຄວາມຮູ້, ຄວາມສາມາດ, ມີຄວາມຊຳນິຊຳນານ ແລະ ມີຄຸນສົມບັດສິນທຳປະຕິວັດ ເຂົ້າໃນການປະຕິບັດຫລັກສູດການຮຽນ-ການສອນ ເພື່ອຮອງຮັບຄຸນນະພາບການສຶກສາ ໃນລະດັບຊາດພາກພື້ນ ແລະ ສາກົນເທື່ອລະກ້າວ.

ແຫລ່ງຂ່າວ:

ຕິດຕາມເຮົາທາງFacebook ກົດຖືກໃຈເລີຍ!