ທ່ານ ພັນຕີ ບຸນເພັງ ວໍລະລາດ ຮອງເລຂາຄະນະພັກຮາກຖານດ່ານ, ຫົວໜ້າຕຳຫຼວດກວດຄົນເຂົ້າເມືອງ ( ຕມ ) ດ່ານສາກົນຂົວມິດຕະພາບແຫ່ງທີ 1 ໄດ້ໃຫ້ສຳພາດວ່າ: ພວກເຮົາໄດ້ກຽມຄວາມພ້ອມສຳລັບການກວດຄົນເຂົ້າ – ອອກເມືອງໃນໄລຍະຕະຫຼອດຈັດກອງປະຊຸມສຸດຍອດອາຊຽນ ຫຼື ( ASEAN Summit ) ຄັ້ງທີ 28 ແລະ 29 ທີ່ຈັດຂຶ້ນໃນວັນທີ 6 – 8 ເດືອນກັນຍາ ນີ້ ໂດຍທາງດ່ານສາກົນຂອງພວກໄດ້ມີການເພີ່ມຄວາມເຂັ້ນງວດໃນການກວດຄົນເຂົ້າ – ອອກເພີ່ມຫຼາຍຂຶ້ນ ແລະ ໄດ້ເພີ່ມພະນັກງານເຮັດວຽກອີກຈຳນວນໜຶ່ງ ເພື່ອອຳນວຍຄວາມສະດວກ ແລະ ໄດ້ມີການເວນຍາມເລີ່ມແຕ່ວັນທີ 1 ຫາ 10 ກັນຍາ ຕະຫຼອດ 24 ຊົ່ວໂມງ ຕາມທິດຊີ້ນຳຂອງຂັ້ນເທິງ ເຊິ່ງໄດ້ມີ 3 ພາກສ່ວນທີ່ເຂົ້າມາສົມທົບໃນການເວນຍາມຄື: ປກສ ນະຄອນຫຼວງ, ວິທະຍາຄານຕຳຫຼວດດອນຕິ້ວ ແລະ ປກສ ເມືອງຫາດຊາຍຟອງ ເພື່ອຮ່ວມກັນເວນຍາມປ້ອງກັນຄວາມສະຫງົບພາຍໃນດ່ານກໍ່ຄືເຂດພື້ນທີ່ໃກ້ຄຽງ.
ໃນໄລຍະກອງປະຊຸມສຸດຍອດອາຊຽນນີ້ ການກວດສອບຍານພາຫະນະເຂົ້າ – ອອກນັ້ນກໍ່ຈະຕ້ອງໄດ້ມີກາດກວດກາລະອຽດ ໂດຍສະເພາະລົດໃຫຍ່ເວລາເຈົ້າໜ້າທີ່ກວດກໍ່ຈະຕ້ອງເອົາແວ່ນລົງ. ນອກນັ້ນ, ທ່ານຍັງເປີດເຜີຍໃຫ້ຮູ້ວ່າ: ບັນຍາກາດການເຂົ້າ – ອອກເມືອງຢູ່ດ່ານສາກົນຂົວມິດຕະພາບແຫ່ງທີ 1 ພາຍຫຼັງເປີດປະຊາຄົມອາຊຽນຕັ້ງແຕ່ຕົ້ນປີ 2016 ເປັນມາກໍ່ຖືວ່າໄດ້ມີຕົວເລກການເຂົ້າ – ອອກຂອງພໍ່ແມ່ປະຊາຊົນຫຼາຍຂຶ້ນ ໂດຍສະເພາະປະຊາຊົນທັງສອງຝັ່ງ ( ລາວ – ໄທ ), ນັກທ່ອງທ່ຽວ, ນັກທຸລະກິດຈາກບັນດາປະເທດໃນພາກພື້ນ ແລະ ນອກພາກພື້ນ ແມ່ນມີທ່າອ່ຽງທີ່ເພີ່ມຂຶ້ນເລີຍໆ ໂດຍໃນອາທິດໜຶ່ງແມ່ນມີຕົວເລກການແຈ້ງເຂົ້າ – ອອກປະມານ 50,000 – 55,000 ຄົນ. ສຳລັບນັກທ່ອງທ່ຽວທີ່ເປັນຕ່າງຊາດທີ່ໃຊ້ບໍລິການຜ່ານດ່ານຫຼາຍທີ່ສຸດຄື ສປ ຈີນ, ຫວຽດນາມ ແລະ ສ.ເກົາຫຼີ.
ຂ່າວຈາກ: 
ຕິດຕາມຂ່າວເສດຖະກິດລາວ ກົດໄລຄ໌ເລີຍ!