ອີງຕາມວາລະການເດິນທາງຢ້ຽມຢາມແລະເຮັດວຽກ ຢູ່ລາວຂອງທ່ານ ປະທານາທິບໍດີສະຫະລັດຯ ບາຣັກ ໂອບາມາ ໃນວັນພຸດ 7/9/2016 ພະນະທ່ານ ຈະເດິນທາງເຂົ້າຢ້ຽມຊົມສູນ COPE (ອົງການອົງຄະທຽມ) ພ້ອມທັງຈະມີການໂອ້ລົມໃນສະຖານທີ່ດັ່ງກ່າວ.
ສູນຟື້ນຟູໜ້າທີ່ການ (COPE) ຫຼືເອີ້ນງ່າຍໆວ່າ ສູນອົງຄະທຽມ ເປັນສູນຟື້ນຟູຄົນພິການຂອງລາວ ທີີ່ລັດຖະບານສ້າງຕັ້ງຂຶ້ນ ໂດຍໄດ້ຮັບການຊ່ວຍເຫຼືອຈາກບັນດາປະເທດ ແລະອົງການສາກົນອື່ນໆ ສູນດັ່ງກ່າວແມ່ນມີບົດບາດສຳຄັນໃນການຟື້ນຟູຊ່ວຍເຫຼືອຄົນພິການໃນປະເທດລາວໃຫ້ສາມາດຊ່ວຍເຫຼືອໂຕເອງແລະຢູ່ຮ່ວມກັບສັງຄົມໄດ້ ໂດຍສະເພາະແມ່ນຄົນພິການທີ່ແຂນກຸດຂາຂາດຕາບອດ ຈາກອຸບັດເຫດລະເບີດທີ່ຕົກຄ້າງໃນປາງສົງຄາມ ໂດຍໄດ້ມີການເຝິກແອບ, ກາຍະພາບບຳບັດ ແລະປະດິດອົງຄະທຽມໃຫ້ຄົນພິການ.
ໃນໄລຍະປີ 1964-1973 ສົງຄາມລັບໃນລາວ (Secret Wars) ພາຍໃຕ້ການນຳຂອງ CIA ແລະການປົກປິດຂອງລັດຖະບານແລະກອງທັບສະຫະລັດ ໄດ້ມີການລະດົມຖິ້ມລະເບີດໃນດິນແດນປະເທດລາວ ປະມານ 3 ລ້ານໂຕນ ດ້ວຍຖ້ຽວບິນຫຼາຍກວ່າ 5 ແສນຖ້ຽວ ແລະ 30% ຫຼືປະມານ 170 ລ້ານລູກ (ລວມທັງນ້ອຍແລະໃຫຍ່່) ແມ່ນບໍ່ລະເບີດແລະໄດ້ຕົກຄ້າງຢູ່ໃນໜ້າດິນຂອງປະເທດລາວ ໂດຍຄວບຄຸມພື້ນທີ່ 87,200 ຕາກິໂລແມັດ ໃນພື້ນທີ່ 15 ແຂວງ ຈາກທັງໝົດ 17 ແຂວງ ແລະ 1 ນະຄອນຫຼວງ ທີ່ມີເນື້ອທີ່ລວມທັງໝົດ 236,800 ກິໂລຕາແມັດ. ຕະຫຼອດໄລຍະ 40 ກວ່າປີມານີ້ ມີປະຊາຊົນລາວຫຼາຍກວ່າ 20,000 ຄົນ ທີ່ໄດ້ຮັບເຄາະຈາກລະເບີດຕົກຄ້າງແຕ່ປາງສົງຄາມດັ່ງກ່າວ.
ເມື່ອທ້າຍປີ 2012 ທ່ານນາງ ຮຽວລາລີ ຄລິນຕັນ ລັດຖະມົນຕີວ່າການກະຊວງການຕ່າງປະເທດ ຂອງສະຫະລັດອາເມລິກາ ທີ່ໄດ້ເດິນທາງຢ້ຽມຢາມແລະເຮັດວຽກຢູ່ລາວນັ້ນ ກໍໄດ້ເດິນທາງເຂົ້າຢ້ຽມຊົມສູນອົງຄະທຽມ ເພື່ອຫາວິທີໃຫ້ການຊ່ວຍເຫຼືອ ໂດຍສະເພາະແມ່ນທຶນຮອນໃນການເກັບກູ້ລະເບີດບໍ່ທັນແຕກທີ່ຕົກຄ້າງໃນໜ້າດິນຂອງ ສປປ ລາວ ເຊິ່ງໃນແຕ່ລະປີສະຫະລັດອາເມລິກາ ໄດ້ໃຫ້ທຶນຊ່ວຍເຫຼືອເພື່ອເກັບກູ້ລະເບີດບໍ່ທັນແຕກແກ່ລາວຈຳນວນຫຼາຍສົມຄວນ.
ຖ້າຫາກບໍ່ມີການປ່ຽນແປງ ຕອນເຊົ້າ ວັນທີ 7 ກັນຍາ 2016 ທ່ານ ບາຣັກ ໂອບາມາ ປະທານາທິບໍດີແຫ່ງປະເທດ ສະຫະລັດອາເມລິກາ ຈະເດິນທາງເຂົ້າຢ້ຽມຊົມສູນດັ່ງກ່າວ ເຊິ່ງໃນໂອກາດດັ່ງກ່າວນັ້ນ ທ່ານ ບາຣັກ ໂອບາມາ ຈະໄດ້ພົບກັບຕົວແທນຜູ້ພິການຈາກລະເບີດຂອງລາວ, ຫົວໜ້າສູນ ແລະໃຫ້ຄຳໂອ້ລົມ.
ເລື່ອງລາວໃນປະຫວັດສາດປະຊາຊົນລາວຖືເປັນບົດຮຽນອັນໃຫຍ່ຫຼວງ ແລະຈະບໍ່ຖືເປັນເລື່ອງຄຽດແຄ້ນຫຼືບາດໝາງໃດໆ ເພາະມັນເປັນເລື່ອງຂອງອະດີດໄປແລ້ວ ນັບແຕ່ນີ້ຕໍ່ໄປປະຊາຊົນລາວຈະພະຍາຍາມບໍ່ໃຫ້ສົງຄາມເກີດຂຶ້ນອີກໃນດິນແດນນີ້ ແລະພາວະນາບໍ່ໃຫ້ມັນເກີດຂຶ້ນກັບບ່ອນໃດໃນໂລກນີ້. ປະຊາຊົນລາວຈະຮ່ວມກັບປະຊາຊົນທົ່ວໂລກ ສາມັກຄີຮັກແພງກັນ ຊ່ວຍເຫຼືອເຊິ່ງກັນແລະກັນ ຢູ່ນຳກັນຢ່າງສັນຕິ ແລະພ້ອມກັນສ້າງສາພັດທະນາ ຊີວິດການເປັນຢູ່ຂອງຕົນເອງໃຫ້ຫຼຸດພົ້ນຈາກຄວາມທຸກຍາກ ກ້າວສູ່ຄວາມສີວິໄລ ແລະໝັ້ນຄົງ.