ເນື່ອງຈາກມີ ກະແສຄວາມບໍ່ເຂົ້າໃຈ ໃນເລື່ອງການຜ່ານ ເຂົ້າໄປແຂ່ງໃນ ຮອບສຸດທ້າຍ ການແຂ່ງຂັນ ບານເຕະຍິງ U16 ຊີງແຊັມອາຊີ 2017 ໂດຍສະເພາະແມ່ນ ການແຂ່ງຂັນ ຮອບຄັດເລືອກຂອງກຸ່ມ A ເຊິ່ງ ທີມຊາດລາວ ກໍ່ເປັນໜຶ່ງໃນທີມ ທີ່ລຸ້ນເຂົ້າຮອບ.
ການແຂ່ງຂັນບານເຕະຍິງ U16 ຊີງແຊັມອາຊີ 2017 ຮອບສຸດທ້າຍ ທີ່ຈະຈັດທີ່ປະເທດຈີີນ ທ້າຍປີ 2017 ແມ່ນມີທັງໝົດ 8 ທີມ, 4 ທີມທຳອິດແມ່ນໄດ້ຈາກ ທີມທີ່ໄດ້ອັນດັບທີ 1 ເຖິງ 4 ໃນການແຂ່ງຂັນບານເຕະຍິງ U16 ຊີງແຊັມອາຊີ 2015 ເຊິ່ງປະກອບມີ ເກົາຫຼີເໜືອ, ຍິ່ປຸ່ນ, ຈີນ ແລະ ໄທ ຕາມລຳດັບ ແລະ ອີກ 4 ທີມແມ່ນໄດ້ຈາກການແຂ່ງຂັນໃນ ຮອບຄັດເລືອກ ເຊິ່ງແບ່ງເປັນ 4 ກຸ່ມ ແຂ່ງຂັນຄັດເອົາ ທີ 1 ຂອງແຕ່ລະກຸ່ມເຂົ້າຮອບຕໍ່ໄປ. ສຳລັບ ທີມຊາດໄທ ແມ່ນມີຄວາມປະສົງ ຂໍເຂົ້າຮ່ວມການແຂ່ງຂັນ ໃນຮອບຄັດເລືອກອີກ ເຊິ່ງຢູ່ກຸ່ມ A ຮ່ວມກັບລາວ, ມຽນມາ, ຈໍແດນ ແລະ ກວມ.
ຈາກເລື່ອງດັ່ງກ່າວ, ເຮັດໃຫ້ກຸ່ມ A ຕ້ອງມີທີມຜ່ານເຂົ້າຮອບຕໍ່ໄປ 2 ທີມ, ທີມທີ 1 ແມ່ນ ທີມຊາດໄທ ທີ່ເຂົ້າຮອບສຸດທ້າຍ ຕາມໂຄຕ້າ ທີ່ກ່າວໄວ້ດ້ານເທິງ ແລະ ອີກ 1 ທີມທີ່ມີຄະແນນ ທີ່ດີທີ່ສຸດຂອງກຸ່ມ ເຊິ່ງນະເວລານີ້ ມີ 2 ທີມທີ່ມີຄວາມເປັນໄປໄດ້ຄື ທີມຊາດລາວ ແລະ ທີມຊາດມຽນມາ ເຊິ່ງ ທີມຊາດລາວ ແຂ່ງຈົບໄປແລ້ວ 4 ນັດມີ 9 ຄະແນນ, ສ່ວນ ທີມຊາດມຽນມາ ແຂ່ງໄປແລ້ວ 2 ນັດ ມີ 3 ຄະແນນ ຍັງເຫຼືອອີກ 2 ນັດ, ຖ້າ ທີມຊາດມຽນມາ ມີຜົນຢ່າງໜ້ອຍຄື ສະເໝີ 1 ໃນ 2 ນັດທີ່ເຫຼືອ ນັ້ນກໍ່ໝາຍຄວາມວ່າ ທີມຊາດລາວ ຈະເຂົ້າຮອບສຸດທ້າຍ ໃນຖານະທີມທີ່ມີຄະແນນ ທີ່ດີທີ່ສຸດຂອງກຸ່ມ (ບໍ່ນັດ ທີມຊາດໄທ). ແຕ່ຖ້າ ທີມຊາດມຽນມາ ຕ້ອງການເຂົ້າຮອບຕໍ່ໄປ ພວກເຂົາຕ້ອງເອົາຊະນະໃຫ້ໄດ້ທັງ 2 ນັດທີ່ຍັງເຫຼືອ ໂດຍສະເພາະນັດສຸດທ້າຍ ພວກເຂົາຕ້ອງເອົາຊະນະ ທີມຊາດໄທ (ທີ່ເອົາຊະນະ ທີມຊາດລາວ 5 ປະຕູຕໍ່ 2) 3 ປະຕູຂຶ້ນໄປ ເນື່ອງຈາກ ທີມຊາດລາວ ຊະນະ ທີມຊາດມຽນມາ 5 ປະຕູຕໍ່ 2 ແລະ ທີມຊາດໄທ ກໍ່ເອົາຊະນະ ທີມຊາດລາວ 5 ປະຕູຕໍ່ 2 ເຊັ່ນກັນ.
ຂອງໃຈຂໍ້ມູນຈາກ fathailand.org, the-afc.com, wikipedia.org
ຂອບໃຈຮູບຈາກ ສະຫະພັນບານເຕະ ແຫງຊາດລາວ ແລະ http://laosportnews.com/