ລະຫວ່າງວັນທີ 23-24 ສິງຫາ 2016 ນີ້, ຫ້ອງການ ສຶກສາທິການ ແລະ ກິລາເມືອງຫົງສາ ໄດ້ຈັດກອງປະຊຸມຄູພັກສິ້ນປີຮຽນ ປະຈຳປີ 2016 ຂຶ້ນຢູ່ທີ່ເດີນຮົ່ມກິລາເມືອງ. ໂດຍການເປັນປະທານຂອງທ່ານ ປ່ຽນ ຈິນດາ ຫົວໜ້າ ຫ້ອງການ ສຶກສາທິການ ແລະ ກິລາເມືອງຫົງສາ ພ້ອມຄະນະ, ໃຫ້ກຽດເຂົ້າຮ່ວມກອງປະຊຸມຄັ້ງນີ້, ຂອງທ່ານ ນາງ ດາວວິນ ລາດຊະກິດ ຮອງເຈົ້າເມືອງໆ ຫົງສາ ຜູ້ຊີ້ນຳວຽກງານຂົງເຂດ ວັດທະນະທຳ-ສັງຄົມເມືອງ, ມີແຂກຮັບເຊີນ, ມີຜູ້ອຳນວຍການໂຮງຮຽນ ແລະ ພະນັກງານວິຊາການ ຄູ – ອາຈານພາຍໃນເມືອງເຂົ້າຮ່ວມທັງໝົດ 500 ກວ່າຄົນ.
ໃນໂອກາດນີ້, ທ່ານ ປ່ຽນ ຈິນດາກໍ່ໄດ້ຂຶ້ນກ່າວເປີດກອງປະຊຸມຢ່າງເປັນທາງການ ແລະ ທ່ານຍັງກ່າວວ່າ: ວຽກງານການສຶກສາ ແລະ ກິລາພາຍໃນເມືອງຫົງສາ ຂອງພວກເຮົາແມ່ນມີບາດກ້າວຂະຫຍາຍຕົວຕໍ່ເນື່ອງທາງດ້ານປະລິມານ ແລະ ຄຸນນະພາບ. ທັງນີ້, ກໍ່ຍ້ອນການຊີ້ນຳຈາກຂັ້ນເທິງ ແລະ ໄດ້ຮັບການຮ່ວມມືຈາກອຳນາດການປົກຄອງທ້ອງຖິ່ນ ໂດຍສະເພາະຜູ້ບໍລິຫານການສຶກສາ ແລະ ຄູ – ອາຈານ ທີ່ໄດ້ສຸມຈິດສຸມໃຈເຮັດຫຼ້ອນໜ້າທີ່ໃນການສຶກສາອົບຮົບ, ແນວຄິດການເມືອງ ແລະ ຖ່າຍທອດວິຊາຄວາມຮູ້ໃຫ້ແກ່ນ້ອງນັກຮຽນໄດ້ຮັບຮູ້, ເຂົ້າໃຈ ແລະ ເຂົ້າເຖິງແກ່ນແທ້ຂອງບົດຮຽນ. ເຊິ່ງສະແດງອອກຜົນງານດີເດັ່ນໃນປີຜ່ານມາຄື: ການສອບເສັງຈົບຊັ້ນ ປໍ5 ໃນທົ່ວເມືອງມີນັກຮຽນທັງໝົດ 585 ຄົນ ຍິງ 300 ຄົນ ສາມາດສອບເສັງໄດ້ 569 ຄົນ ຍິງ 295 ຄົນ ຫຼື ເທົ່າກັບ 97,26%, ການສອບເສັງເລື່ອນຂັ້ນມັດທະຍົມໃນທົ່ວເມືອງ ມີນັກຮຽນທັງໝົດ 2090 ຄົນ ຍິງ 976 ຄົນ ສາມາດສອບເສັງໄດ້ 2073 ຄົນ ຍິງ 970 ຄົນ ຫຼື ເທົ່າກັບ 92,2%,ການສອບເສັງຈົບຊັ້ນ ມໍ 4 ມີນັກຮຽນທັງໝົດ 374 ຄົນ ຍິງ 183 ຄົນ ສາມາດສອບເສັງໄດ້ 100%, ການສອບເສັງຈົບຊັ້ນ ມໍ 7 ມີນັກຮຽນທັງໝົດ 249 ຄົນ ຍິງ 110 ຄົນ ສາມາດສອບເສັງໄດ້ 100%. ໃນທົ່ວເມືອງມີໂຮງຮຽນຕົວແບບ 2 ແຫ່ງຄື: ໂຮງຮຽນ ປະຖົມແທ່ນຄຳ ແລະ ໂຮງຮຽນ ປະຖົມວຽງແກ້ວ, ການສຶກສານອກໂຮງຮຽນແມ່ນໄດ້ຈັດຕັ້ງປະຕິບັດຢູ່ 4 ບ້ານຄື: ບ້ານແທ່ນຄຳ, ບ້ານນ້ຳຕັບ, ບ້ານຄົກແອກ ແລະ ບ້ານພູແລ້ງຫ້ວຍຈ້ວງ ໃນຂັ້ນຮຽນ ມໍ5 – ມໍ7. ການສ້າງໂຮງຮຽນ ປອດຢາເສບຕິດ (ມສ ຫົງສາ)ກໍ່ໄດ້ຮັບການປັບປຸງ ແລະ ຂະຫຍາຍຕໍ່ເນື່ອງ ເຊິ່ງໄດ້ຮັບຫຼຽນແຮງງານຊັ້ນ III ແລະ ໂລ້ລາງວັນ ໂຮງຮຽນ ປອດຢາເສບຕິດ 3 ປີຊ້ອນ. ຈາກນັ້ນ, ຜູ້ເຂົ້າຮ່ວມທັງໝົດ ຍັງໄດ້ຮັບຟັງ ການຜ່ານມະຕິກອງປະຊຸມຜູ້ບໍລິຫານການສຶກສາ ແລະ ກິລາ ທົ່ວປະເທດ, ທົ່ວແຂວງ ປະຈຳປີ 2016, ຮັບຟັງເປົ້າໝາຍການພັດທະນາແບບຍືນຍົງ (SDG), ຮັບຟັງການສະກັດກັ້ນ ແລະ ແກ້ໄຂສະພາບປະກົດການຫຍໍ້ທໍ້ໃນຂະແໜງການສຶກສາ ແລະ ກິລາພາຍໃນເມືອງຫົງສາ, ຮັບຟັງມະຕິສັບຊ້ອນບ່ອນປະຈຳການ ປະຈຳສົກປີ 2016-2017 ແລະ ພ້ອມກັນຖອດຖອນບົດຮຽນວິຊາການ ການສອນທົດລອງຂອງຄູຊັ້ນອານຸບານ, ປະຖົມ ແລະ ມັດທະຍົມຕື່ມອີກ. ກອງປະຊຸມ ຄູພັກສິ້ນປີຮຽນ ປະຈຳປີນີ້, ແມ່ນໄດ້ດຳເນີນໄປເປັນເວລາ 2 ວັນຈິ່ງສຳເລັດ.
ໂດຍ: ກິດຕິສັກ ບົວໄລ ນັກຂ່າວປະຈຳເມືອງຫົງສາ ແຂວງໄຊຍະບູລີ
ຕິດຕາມນານາສາລະ ກົດໄລຄ໌ເລີຍ!