ສຳນັກຂ່າວຕ່າງປະເທດ ລາຍງານໃນວັນທີ 25 ສິງຫາຜ່ານມານີ້ວ່າ ທ່ານ ອູ່ ສຽນ ໂຄສົກກະຊວງປ້ອງກັນປະເທດຈີນ ໄດ້ອອກມາລະບຸ ກອງທັບຈີນ ຈະໃຫ້ການສະໜັບສະໜູນ ເຝິກອົບຮົມວິຊາຊີບທາງການແພດ ແລະ ພະຍາບານ ໃຫ້ແກ່ຊີຣີ ຊຶ່ງການເຝິກອົບຮົມດັ່ງກ່າວນີ້ ຈະດຳເນີນການຢູ່ປະເທດຈີນ ຊຶ່ງມີຈຸດປະສົງເພື່ອ ບັນເທົາວິກິດການດ້ານມະນຸດສະທຳໃນຊີຣີ ທີ່ໄດ້ຮັບຄວາມເສຍຫາຍ ຈາກໄພສົງຄາມກາງເມືອງໃນປະເທດ.

ໂຄສົກກະຊວງປ້ອງກັນປະເທດຈີນ ຍັງໄດ້ກ່າວອີກວ່າ ໃນໄລຍະຜ່ານມາ ກອງທັບຈີນ ໄດ້ຈັດສົ່ງອຸປະກອນທາງການແພດ ແລະ ຢາ ໃຫ້ແກ່ລັດຖະບານຊີຣີມາແລ້ວ ເພື່ອຊ່ວຍເຫລືອປະຊາຊົນຊາວຊີຣີ. ຈີນ ແລະ ຊີຣີ ເປັນມິດປະເທດທີ່ຊ່ວຍເຫລືອຊຶ່ງກັນ ແລະ ກັນ ມາເປັນເວລາດົນນານ ແລະ ຈີນສະໜັບສະໜູນ ການຫາທາງອອກທາງການເມືອງ ຈາກຄວາມຂັດແຍ່ງໃນຊີຣີ ແລະ ສະໜັບສະໜູນຄວາມເປັນເອກະລາດຂອງຊີຣີ ສະເໝີ.