ວັນທີ 25 ສິງຫາ ປີ 2000 ຫຼືມື້ນີ້ເມື່ອ 16 ປີທີ່ແລ້ວ ເປັນມື້ວາງຈຳໜ່າຍຂອງເກມ Parasite Eve II ເທິງເຄື່ອງ PS1 ທີ່ກຸ່ມປະເທດສະຫະລາດອານາຈັກ. ໂດຍເກມ Parasite Eve II ເປັນພາກຕໍ່ຂອງ Parasite Eve ພາກທຳອິດທີ່ວາງຈຳໜ່າຍໄປຕັ້ງແຕ່ປີ 1998 ເຊິ່ງພາກ 2 ແມ່ນມີການປ່ຽນແປງໂຕເກມໄປພໍສົມຄວນ ໂດຍສະເພາະໃນດ້ານລະບົບເກມທີ່ເປັນແນວແອັກຊັ່ນແບບເຕັມໂຕ ມີລະບົບຮ້ານຄ້າເພື່ອຊື້ໄອເທັມ, ຊຸດປ້ອງກັນ ແລະອາວຸດ, ພ້ອມກັບມີສາກຈົບທີ່ຫຼາກຫຼາຍ ເຊິ່ງຈະຂຶ້ນກັບການກະທຳຂອງໂຕເຮົາລະຫວ່າງທີ່ດຳເນີນເລື່ອງ.  

ເລຶ່ອງລາວຂອງ Parasite Eve II ຈະເປັນເຫດການຕໍ່ຈາກພາກທຳອິດຢູ່ຫຼາຍປີ, ເມື່ອ ອາຢະ ນາງເອກສາວງາມຊອງຊີຣີນີ້ໄດ້ປ່ຽນໂຕເອງຈາກຕຳຫຼວດນິວຢອກມາເປັນເຈົ້າໜ້າທີ່ FBI ທີ່ສັງກັດໜ່ວຍພິເສດທີ່ມີຊື່ວ່າ MIST ໂດຍນາງໄດ້ຮັບແຈ້ງເຫດຮ້າຍວ່າມີສັດປະຫຼາດບຸກໂຈມຕີຜູ້ຄົນເທິງອາໂຄໂພລິສທີ່ຕັ້ງຢູ່ໃຈກາງລອສແອງເຈລິສຢູ່ ນາງໄດ້ບຸກເຂົ້າໄປລະງັບເຫດ ພ້ອມກັບສືບຫາຕົ້ນຕໍຂອງການເກີດສັດປະຫຼາດດັ່ງກ່າວວ່າໃຜຢູ່ເບື້ອງຫຼັງເລື່ອງລາວນີ້ກັນແທ້. 

ສຳລັບລະບົບທີ່ເປັນເອກກະລັກຂອງພາກ 2 ກໍຄື: Parasite Energy (PE) ທີ່ມີການພັດທະນາຈາກພາກທຳອິດໄປຫຼາຍ ໂດຍແຕ່ເກົ່າໃນພາກທຳອິດນັ້ນອາຢະຈະໄດ້ທ່າໃໝ່ໆ ເພີ່ມເຂົ້າມາເມື່ອມີເລເວວສູງຂຶ້ນ, ແຕ່ວ່າໃນພາກ 2 ຈະມີການແບ່ງທ່າ PE ອອກເປັນຕາມທາດຕ່າງໆ ໄດ້ແກ່: ທາດໄຟກັບທາດລົມເປັນສາຍໂຈມຕີ, ທາດນ້ຳແລະທາດດິນເປັນສາຍຟື້ນຟູແລະປ້ອງກັນ ເຊິ່ງຖ້າເກັບຄ່າປະສົບການຈາກສັດຕູມາໄດ້ຫຼາຍພໍ ກໍຈະສາມາດອັບເກຣດທ່າເຫຼົ່ານີ້ໃຫ້ມີປະສິດທິພາບຫຼາຍຂຶ້ນ ອີກທັງທ່າ PE ຈະເປັນສິ່ງທີ່ຈຳເປັນໃນການລຸຍກັບພວກສັດຕູໃນພາກນີ້ ຍິ່ງເວລາສູ້ກັບສັດຕູບາງປະເພດຕ້ອງມີການວາງແຜນໃຊ້ຄວບຄູ່ກັບປືນໃຫ້ລົງໂຕນຳ.

Fact ເລັກນ້ອຍກ່ຽວກັບເກມ Parasite Eve II

• ຜູ້ອຳນວຍການອົງກອນ MIST ທີ່ອາຢະສັງກັດຢູ່ນັ້ນມີຊື່ວ່າ ຮາລ (Hal) ໃນຂະນະທີ່ບັນດານັກວິທະຍາສາດທີ່ຢູ່ໃນແລັບທົດລອງຊ່ວງທ້າຍເກມທີ່ມີຊື່ວ່າ ໂບແມນ (Bowman), ພູລ (Poole), ຟລອຍ (Floyd) ແລະ ແຊນດຣ້າ (Chandra) ເຊິ່ງໂຕລະຄອນທີ່ເວົ້າມາທັງ 5 ຄົນນີ້, ທາງທີມພັດທະນາຈາກ Squaresoft ລ້ວນແຕ່ໄດ້ແຮງບັນດານໃຈມາຈາກຊື່ຂອງໂຕລະຄອນໃນນະວະນິຍາຍແລະຮູບເງົາເລື່ອງ 2001: a Space Odyssey ທີ່ຕີພິມແລະອອກສາຍໃນປີ 1968. 

• ເຖິງວ່າພາກນີ້ຈະຖືກບັນດານັກວິຈານທັງໃນຍີ່ປຸ່ນແລະຕາເວັນຕົກເວົ້າໃຫ້ຫຼາກຫຼາຍເລື່ອງການເຄື່ອນໄຫວຂອງອາຢະທີ່ຂ້ອນຂ້າງຊ້າເມື່ອທຽບກັບເກມອື່ນທີ່ເປັນສະຕາຍຄ້າຍໆກັນແບບ Resident Evil ພາກ 1-3 ແຕ່ໃນຂະນະດຽວກັນ ນັກວິຈານຈາກຝັ່ງຕາເວັນຕົກບາງສ່ວນຍັງແນມວ່າລະບົບການແບ່ງທ່າຂອງອາຢະເປັນທາດຕ່າງໆ ແລະມີການອັບເກຣດທ່າເພື່ອໃຫ້ມີປະສິດທິພາບທີ່ດີຂຶ້ນເປັນໄອເດຍທີ່ສ້າງສັນໃຊ້ໄດ້ ແລະຫາກລະບົບນີ້ຖືກນຳໄປປະສົມປະສານກັບການເຄື່ອນໄຫວທີ່ຄ່ອງໂຕກວ່ານີ້ ເກມ Parasite Eve II ອາດຈະເປັນ 1 ໃນເກມທີ່ໜ້າຈັບຕາເບິ່ງໃນຊ່ວງທ້າຍເຈນ PS1 ກໍເປັນໄດ້. 

• Parasite Eve II ນັ້ນເລີ່ມວາງຈຳໜ່າຍໃນຍີ່ປຸ່ນມາຕັ້ງແຕ່ຊ່ວງທ້າຍປີ 1999 ແລະເຮັດຍອດຂາຍພາຍໃນປີດັ່ງກ່າວໄປໄດ້ 220,000 ຊຸດ ແຕ່ກວ່າຈະເຮັດຍອດຂາຍທະລຸ 1 ລ້ານຊຸດໄດ້ກໍຕ້ອງເລີຍໄປເປັນເດືອນກຸມພາ ປີ 2004 ພຸ້ນ ໂດຍແບ່ງເປັນຍອດ 430,000 ຊຸດໃນຍີ່ປຸ່ນ ແລະ 670,000 ຊຸດໃນປະເທດອື່ນໆລວມກັນ, ເຊິ່ງນອກຈາກປັດໄຈດ້ານຄະແນນຂອງເກມນີ້ທີ່ອອກມາບໍ່ຄ່ອຍດີແລ້ວ ກໍມີການປະເມີນອີກແງ່ມຸມວ່າໂຕເກມໄດ້ວາງຈຳໜ່າຍໃນຊ່ວງທ້າຍເຈນ PS1 ຈຶ່ງໜ້າຈະເປັນອີກສາເຫດທີ່ຍອດຂາຍຂອງເກມ Parasite Eve II ຕ້ອງລຸ້ນກັນເມື່ອຍຈົນຮອດ 5 ປີກວ່າຈະທະລຸ 1 ລ້ານຊຸດໄດ້. 

• ປົກກະຕິແລ້ວການຈະນຳ ກັນເບລດ ເຊິ່ງເປັນອາວຸດລັບສຸດຍອດຂອງເກມນີ້ມາໃຊ້ໄດ້ນັ້ນ ຜູ້ຫຼິ້ນຈະຕ້ອງເຄລຍເກມໂດຍຈົບແບບ Good Ending ແລະໄດ້ Rank S (ເກັບຄ່າປະສົບການໄດ້ກາຍ 400,001 ຄະແນນຂຶ້ນໄປ) ແຕ່ຈະມີອີກວິທີທີ່ຜູ້ຫຼິ້ນຈະໄດ້ກັນເບລດມາໃຊ້ໂດຍບໍ່ຕ້ອງຈົບຮອດ Rank S ໂດຍວິທີການກໍຄືໃຫ້ຜູ້ຫຼິ້ນເຄລຍເກມໂດຍໄດ້ Rank L (ເກັບຄ່າປະສົບການທັງໝົດເກມໄດ້ບໍ່ກາຍ 14,510 ຄະແນນ) ຈາກນັ້ນໃນການຫຼິ້ນຮອບຕໍ່ໄປ ຜູ້ຫຼິ້ນຈະສາມາດຊື້ໄອເທັມ Medicine Wheel ຈາກ Jody ທີ່ສຳນັກງານ MIST ໄດ້, ຮອບນີ້ໃຫ້ຜູ້ຫຼິ້ນລຸຍໄປຈົນຮອດບອສ Number 9 ທີ່ຢູ່ໃນ Dryfield ແລ້ວລະຫວ່າງທີ່ສູ້ກໍໃຫ້ໃສ່ໄອເທັມ Medicine Wheel ນຳ ເມື່ອເອົາຊະນະ Number 9 ໄດ້ແລ້ວມັນຈະດຣອບກັນເບລດອອກມາເປັນລາງວັນທັນທີ. 

ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!

ທີ່ມາ: online station