ຕອນບ່າຍວານນີ້ 24 ສິງຫາ 2016 ທີ່ທ່າເຮືອແຫຼມສະບັງ ປະເທດໄທ ໄດ້ມີການຖະແຫຼງຂ່າວການຈັບກຸມໄມ້ເຖື່ອນ ທີ່ຂົນສົ່ງໂດຍຕູ້ຄອນເທນເນີ ຈຳນວນ 20 ຕູ້.
ສຳນັກຂ່າວມະຕິຊົນ (ຂ່າວສົດ) ໄດ້ລາຍງານວ່າ ເມື່ອວັນທີ 20 ກໍລະກົດ ເຈົ້າໜ້າທີ່ດ່ານພາສີໄດ້ພົບສິ່ງຜິດປົກກະຕິຕ້ອງສົງໄສ ໃນໃບຂົນສົ່ງສິນຄ້າຜ່ານແດນທີ່ສະແດງຊະນິດສິນຄ້າເປັນຖ່ານໄມ້ ຂົນສົ່ງໂດຍບໍລິສັດເອເຊຍ ທຣານສ໌ໄລນ໌ ຈຳກັດ ໂດຍຂົນສົ່ງຜ່ານແດນຈາກ ສປປ ລາວ ເຂົ້າທາງດ່ານພາສີໜອງຄາຍ ໄປຍັງເຂດພິເສດຮົງກົງ ສປ ຈີນ ໂດຍຜ່ານໄປທາງທ່າເຮືອແຫຼມສະບັງປະເທດໄທ.
ຈາກການກວດກາຂອງເຈົ້າໜ້າທີ່ໄທພົບວ່າ ຮູບພາບເອັກຊເຣລະຫວ່າງຕົ້ນທາງກັບປາຍທາງບໍ່ຄືກັນ ຄື ຮູບພາບເອກຊເຣຕົ້ນທາງທີ່ດ່ານພາສີໜອງຄາຍເປັນຖ່ານໄມ້ ແຕ່ພາບເອັກຊເຣປາຍທາງທີ່ດ່ານທ່າເຮືອແຫຼມສະບັງພັດເປັນໄມ້ທ່ອນແລະໄມ້ແປຮູບ. ດັ່ງນັ້ນ, ຈຶ່ງໄດ້ອາຍັດຕູ້ສິນຄ້າລວມຈຳນວນ 20 ຕູ້ ເພື່ອດຳເນີນການກວດກາຫາຄວາມຈິງ ໂດຍມີຕົວແທນທູດ ສປປ ລາວ ປະຈຳປະເທດໄທແລະຕົວແທນຈາກບໍລິສັດເອເຊຍທຣານໄລນ໌ ເຂົ້າຮ່ວມເປີດເບິ່ງຕູ້ສິນຄ້າດັ່ງກ່າວ ຈາກການກວດກາພົບເປັນສິນຄ້າປະເພດໄມ້ ມີລັກສະນະເປັນໄມ້ທ່ອນແລະໄມ້ແປຮູບ.
ແນວໃດກໍຕາມ, ຕາມຂໍ້ມູນຮູບພາບເອັກຊເຣແລະຕາມຂ່າວແລ້ວຍັງບໍ່ສາມາດເວົ້າໄດ້ວ່າ ໄມ້ຈຳນວນດັ່ງກ່າວໄດ້ຜ່ານຈາກດ່ານລາວ-ໄທທີ່ຈັງຫວັດໜອງຄາຍແທ້ຫຼືບໍ່ ຫຼືອາດຈະມີການພັດປ່ຽນສິນຄ້າໃນລະຫວ່າງການເດິນທາງຢູ່ໃນປະເທດໄທ ເນື່ອຈາກຮູບພາບເອກຊເຣລະຫວ່າງຕົ້ນທາງກັບປາຍທາງບໍ່ກົງກັນ.
ຕິດຕາມເຮົາທາງFacebook ກົດຖືກໃຈເລີຍ!
ຮູບແລະຂໍ້ມູນຂ່າວຈາກ: ຂ່າວສົດ