ໜັງສືພິມ ເສດຖະກິດ-ສັງຄົມ ສະບັບວັນທີ 11 ກໍລະກົດ 2014 ລາຍງານ: ກ່ອນໜ້ານີ້ ໜັງສືພິມປ້ອງກັນຄວາມສະຫງົບກໍໄດ້ນຳສະເໜີບັນຫາກ່ຽວກັບຄະດີ ໃຊ້ເງິນປອມຊື້ລົດວີໂກ້ເຖື່ອນມາແລ້ວຢູ່ເມືອງນາຊາຍທອງ ຊຶ່ງວ່າທາງເຈົ້າໜ້າທີ່ ປກສ ເມືອງກໍໄດ້ນຳເອົາຕົວຜູ້ກະທຳຜິດມາລົງໂທດຕາມລະບຽບກົດໝາຍ ເພື່ອເປັນຄະຕິເຕືອນໃຈໃຫ້ກຸ່ມຄົນຢູ່ໃນສັງຄົມທີ່ມີແນວຄິດບໍ່ ດີ, ຝືນຕໍ່ກົດໝາຍຂອງບ້ານເມືອງໃຫ້ຫັນມາມີແນວຄິດໃໝ່, ມີການດຳລົງຊີວິດທີ່ສຸດຈະລິດ, ປອດໃສຂາວສະອາດປັດສະຈາກການກະທຳທີ່ຜິດກົດໝາຍ, ຄຽງຄູ່ກັນນີ້ ຍັງມີຄົນຈຳນວນໜຶ່ງທີ່ມີຄວາມຮູ້ຄວາມສາມາດ ໂດຍສະເພາະຜູ້ທີ່ມີຄວາມຮູ້ທາງໄອທີ, ແຕ່ກັບນຳໃຊ້ໄປໃນທາງທີ່ຜິດກົດໝາຍ ໂດຍການຜະລິດເງິນປອມຂຶ້ນມາເພື່ອເອົາໄປຕົວະຍົວະຫຼອກລວງຊື້ ວັດຖຸສິ່ງຂອງຕ່າງໆຂອງບັນດາພໍ່ແມ່ປະຊາຊົນຢູ່ໃນສັງຄົມເຮັດ ໃຫ້ສັງຄົມບໍ່ມີຄວາມສະຫງົບ ແລະ ຜິດຕໍ່ລະບຽບກົດໝາຍບ້ານເມືອງດັ່ງການຜະລິດເງິນປອມເພື່ອແລກຊື້ ຢາບ້າມາເສບລາຍນີ້: ຜູ້ຖືກຫາຊື່ ທ້າວ ມິຖຸນາ ອາຍຸ 25 ປີ ພະນັກງານຄູສອນຄອມພິວເຕີ ຢູ່ບ້ານທ່າງ່ອນ ເມືອງໄຊທານີ ນະຄອນຫຼວງວຽງຈັນ ຊຶ່ງໄດ້ຖືກເຈົ້າໜ້າທີ່ຈັບຕົວມາດຳເນີນຄະດີຕາມກົດໝາຍໃນທ້າຍ ເດືອນມິຖຸນາທີ່ຜ່ານມານີ້.
ເຈົ້າໜ້າທີ່ ປກສ ເມືອງໄຊທານີໃຫ້ຮູ້ວ່າ: ຜູ້ກ່ຽວແມ່ນໄດ້ເລີ່ມເສບຢາມາແຕ່ປີ 2009; ໃນການເສບຢາບ້າແຕ່ລະຄັ້ງ, ຜູ້ກ່ຽວແມ່ນໄດ້ໄປຊື້ຢູ່ຕາມຮ້ານເກມຕ່າງໆນຳພວກໄວໜຸ່ມທີ່ມາ ຫຼິ້ນເກມຢູ່ບ້ານນາ ເມືອງໄຊທານີ ໂດຍຊື້ໃນລາຄາເມັດລະ 20.000 ກີບ ມາຮອດໄລຍະຕົ້ນເດືອນພຶດສະພາ 2014, ດ້ວຍຄວາມຮູ້ທາງດ້ານວິຊາສະເພາະກໍຄືຄອມພິວເຕີຈິ່ງເກີດມີແນວ ຄິດຢາກຜະລິດເງິນປອມຂຶ້ນມາເພື່ອນຳໄປຊື້ຢາບ້າມາເສບ ຫຼັງຈາກນັ້ນ ຈິ່ງໄດ້ເລີ່ມຜະລິດເງິນປອມຂຶ້ນມາໃນເບື້ອງຕົ້ນແມ່ນໄດ້ຜະລິດ ເງິນໃບ 50.000 ກີບ ຈຳນວນ 4 ໃບ ແລ້ວນຳເອົາເງິນໄປຊື້ຢາບ້າມາເສບເຫັນວ່າໄດ້ຮັບຜົນດີຕໍ່ມາ ຈິ່ງໄດ້ຜະລິດເງິນເປັນຄັ້ງທີ 2, ໂດຍຜະລິດໃນ 50.000 ກີບຈຳນວນ 200.000 ກີບ ເອົາໄປຊື້ຢາເສບຕິດຢູ່ບ້ານໄຮ່; ໃນເວລານັ້ນໄດ້ພົບກັບ ທ້າວ ໂກ້ ແລະ ໄດ້ມີການຕິດຕໍ່ພົວພັນກັນມາໄດ້ໄລຍະໜຶ່ງ ທ້າວ ໂກ້ ແມ່ນຕ້ອງການເງິນຈຳນວນຫຼາຍຈິ່ງໄດ້ບອກໃຫ້ ທ້າວ ມິຖຸນາ ຜະລິດເງິນປອມໃຫ້ອີກ ຫຼັງຈາກນັ້ນ ທ້າວ ມິຖຸນາ ຈິ່ງໄດ້ຜະລິດເງິນປອມໃບ 50.000 ກີບ ແລະ ໃບ 100.000 ກີບ ປະມານ 4 ຄັ້ງ ລວມທັງໝົດ 5.000.000 ກີບ ໃຫ້ທ້າວ ໂກ້ ແລະ ທ້າວ ໂກ ໄດ້ເອົາຢາບ້າໃຫ້ຜູ້ກ່ຽວຈຳນວນ 510 ເມັດ ແລະ ໃນການເສບຢາແຕ່ລະຄັ້ງແມ່ນຄັ້ງລະ 45 ເມັດ 23 ມື້ແມ່ນເສບເທື່ອໜຶ່ງ.
ຕົກມາໄລຍະເດືອນມິຖຸນາ 2014 ໄດ້ຮູ້ຈັກກັບໝູ່ອີກຜູ້ໜຶ່ງອາຍຸປະມານ 24 ປີ ຢູ່ບ້ານໂນນບໍ່ແກ້ວ ເມືອງໄຊທານີ ຊຶ່ງເປັນໝູ່ຂອງ ທ້າວໂກ້ ໄດ້ໂທຫາຜູ້ກ່ຽວອີກວ່າຢາກໄດ້ເງິນປອມອີກເປັນຈຳນວນຫຼາຍ ຫຼັງຈາກນັ້ນ, ຈິ່ງໄດ້ຜະລິດເງິນປອມອີກ 4 ຄັ້ງ, ໃບ 50.000 ກີບ ແລະ ໃບລະ 100.000 ກີບ ຈຳນວນ 5.000.000 ກີບ ໃຫ້ກັບໝູ່ຂອງ ທ້າວໂກ້ ແລະ ຜູ້ກ່ຽວໄດ້ຮັບຢາເສບຕິດຈຳນວນ 40 ເມັດ ຕົກມາຮອດວັນທີ 30 ມິຖຸນາ 2014 ຈິ່ງຖືກເຈົ້າໜ້າທີ່ ປກສ ເມືອງໄຊທານີ ກັກຕົວມາດຳເນີນຄະດີຕາມລະບຽບກົດໝາຍ.
ເຈົ້າໜ້າທີ່ກອງຄະດີອາຍາ ປກສ ເມືອງໄຊທານີ ໃຫ້ຮູ້ວ່າ: ການຜະລິດເງິນຂອງຜູ້ກ່ຽວແຕ່ລະຄັ້ງແມ່ນໄດ້ໃຊ້ຈັກກັອບປີ້ສີ ໂດຍເອົາເງິນແທ້ມາກັອບໃສ່ກັບເຈ້ຍຊອງບັດເຊີນສີຂາວແລ້ວກັອບ ເທື່ອລະດ້ານ; ພາຍຫຼັງກັອບສຳເລັດແລ້ວຈິ່ງໄດ້ເອົາມາຕັດຕາມຂະໜາດຂອງເງິນ, ສ່ວນເຄື່ອງຕ່າງໆທີ່ນຳມາຜະລິດນັ້ນແມ່ນໄດ້ມາຈາກທາງໂຮງຮຽນເອົາ ມາໃຫ້ຜູ້ກ່ຽວນຳໃຊ້ເຂົ້າໃນການຈົດບັນທຶກປະຫວັດນັກຮຽນ; ຕໍ່ກັບການກະທຳໃນຄັ້ງນີ້, ທາງໂຮງຮຽນແມ່ນບໍ່ຮັບຮູ້ນຳ ແລະ ເຫັນໄດ້ວ່າການກະທຳຂອງ ທ້າວ ມິຖຸນາ ໄດ້ສ້າງຄວາມບໍ່ສະຫງົບເຮັດໃຫ້ສັງຄົມມີຄວາມສັບສົນວຸ້ນວາຍ ສະແດງອອກໃນການຜະລິດເງິນປອມໃຫ້ກັບຄົນອື່ນເພື່ອແລກກັບຢາເສບ ຕິດ ຊຶ່ງມັນເປັນສິ່ງທີ່ຜິດຕໍ່ກົດໝາຍຂອງບ້ານເມືອງ ປະຈຸບັນຄະດີດັ່ງກ່າວທາງເຈົ້າໜ້າທີ່ກຳລັງສືບສວນສອບສວນ ຂະຫຍາຍຜົນເພື່ອນຳເອົາຕົວຄົນຮ້າຍທີ່ມີສ່ວນຮ່ວມໃນການກະທຳຜິດ ໃນຄັ້ງນີ້ມາລົງໂທດຕາມລະບຽບກົດໝາຍ.