ວາງສີລາລຶກໂຄງການກໍ່ສ້າງ-ຕິດຕັ້ງ-ຕົບແຕ່ງເດີ່ນສວນອະນຸສອນສະຖານທ່ານ ພູນ ສີປະເສີດ
ເຊົ້າວັນທີ 9 ກໍລິະກົດ 2014 ນີ້ ທີ່ບ້ານສະໜາມໄຊ ເມືອງໄກສອນພົມວິຫານ ແຂວງສະຫວັນນະເຂດ ໄດ້ຈັດພິທີວາງສີລາລຶກໂຄງການກໍ່ສ້າງ-ຕິດຕັ້ງ ແລະ ຕົບແຕ່ງເດີ່ນສວນອະນຸສອນສະຖານທ່ານ ພູນ ສີປະເສີດ ພາຍໃຕ້ການເປັນກຽດເຂົ້າຮ່ວມຂອງພະນະທ່ານ ບຸນຍັງ ວໍລະຈິດ ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ, ມີທ່ານ ສຸວັນດີ ສີສະຫັດ ຫົວໜ້າຄະນະຮັບຜິດຊອບພິພິທະພັນໄກສອນພົມວິຫານ, ການນຳພັກ-ລັດ, ພາກສ່ວນຕ່າງໆທີ່ກ່ຽວຂ້ອງທັງຂັ້ນສູນກາງ ແລະ ທ້ອງຖິ່ນ ພ້ອມດ້ວຍຍາດຕິພີ່ນ້ອງຂອງທ່ານ ພູນ ສີປະເສີດເຂົ້າຮ່ວມຢ່າງພ້ອມພຽງ.
ທ່ານ ພູນ ສີປະເສີດ ເກີດເມື່ອວັນທີ 16 ກຸມພາ 1920 ທີ່ບ້ານໄຊຍະພູມ ເມືອງຄັນທະບູລີ ແຂວງສະຫວັນນະເຂດ, ໄດ້ເຂົ້າຮ່ວມເຮັດການປະຕິວັດປົດປ່ອຍຊາດໃນວັນທີ 20/09/1945 ແລະ ສືບຕໍ່ເສີມຂະຫຍາຍພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ທ່ານໄດ້ເສຍຊີວິດຈາກພວກເຮົາໄປຢ່າງບໍ່ມີວັນຫວນຄືນມາອີກໃນວັນທີ 08/12/1994 ຕະ ຫຼອດຊີວິດຂອງເພິ່ນ ໄດ້ອຸທິດຕະຫຼອດຊີວິດຢ່າງບໍ່ຮູ້ອິດເມື່ອຍ ເພື່ອພາລະກິດປະຕິວັດ, ເພື່ອຄວາມເປັນເອກະລາດ, ເອກະພາບ ແລະ ຄວາມຮັ່ງມີຜາສຸກຂອງປະຊາຊົນລາວທັງຊາດ. ທ່ານ ພູນ ສີປະເສີດ ເປັນນັກປະຕິວັດ ມີທັດສະນະຫຼັກໝັ້ນເຂັ້ມແຂງ, ມີຄວາມຊື່ສັດບໍລິສຸດ ແລະ ຈົງຮັກພັກດີຕໍ່ພາລະກິດຂອງພັກ, ຂອງປະເທດຊາດ ແລະ ຂອງປະຊາຊົນ. ມີຄວາມເຊື້ອໝັ້ນຕໍ່ອຸດົມການ ແລະ ການນຳພາຂອງພັກ ແລະ ຕໍ່ໄຊຊະນະສຸດທ້າຍຂອງການປະຕິວັດ. ໃນການເຄື່ອນໄຫວວຽກງານ ທ່ານໄດ້ມີແບບແຜນດຳລົງຊີວິດທີ່ຮຽບງ່າຍ, ທ່ຽງທຳ, ເບີກບານມ່ວນຊື່ນ, ບໍ່ອະຕິ, ຮູ້ຮັກ, ຮູ້ສ້າງ, ຮູ້ນຳໃຊ້ພະນັກງານ ແລະ ຍຶດໝັ້ນໃນແນວທາງມະຫາຊົນຂອງພັກຢ່າງສະເໜີຕົ້ໜສະເໜີປາຍຕະຫຼອດມາ ເພິ່ນເປັນແວ່ນແຍງອັນໃສແຈ້ງ ເປັນແບບຢ່າງອັນປະເສີດ ສຳລັບພະນັກງານ, ສະມາຊິກພັກ, ນັກຮົບ ແລະ ປວງຊົນລາວທັງຊາດ ໃນການເສຍສະຫຼະຢ່າງບໍ່ມີຂອບເຂດ ແລະ ການອຸທິດຕະຫຼອດຊີວິດ ເພື່ອຜົນປະໂຫຍດຂອງຊາດ ແລະ ປະຊາຊົນ.
ທ່ານ ໄຊຍະວົງ ດວງໂສພາ ອຳນວຍການບໍລິສັດລາດຊະວົງພັດທະນາຈຳກັດຜູ້ດຽວ ຜູ້ຮັບເໝົາໂຄງການກໍ່ສ້າງ-ຕິດຕັ້ງ ແລະ ຕົບແຕ່ງເດີ່ນສວນອະນຸສອນສະຖານທ່ານ ພູນ ສີປະເສີດ ໄດ້ໃຫ້ສຳພາດວ່າ: ໄດ້ເລີ່ມລົງມືຈັດຕັ້ງປະຕິບັດໂຄງການໄລຍະທີ ກໍຄືການປັບປຸງສະຖານທີ່ເດີ່ນສວນ ນັບແຕ່ເດືອນມິຖຸນາ 2014 ຜ່ານມານີ້ ແລະ ຈະເລີ່ມດຳເນີນການກໍ່ສ້າງໄລຍະ 2 ໃນສົກປີ 2014-2015 ເຊິ່ງໜ້າວຽກຕົ້ນຕໍ ທີ່ຈະຈັດຕັ້ງປະຕິບັດປະກອບມີ: ການກໍ່ສ້າງແທ່ນຮູບຫຼໍ່ຂອງທ່ານ ພູນ ສີປະເສີດ, ການຕົບແຕ່ງປະດັບປະດາເດີ່ນສວນ, ລະບົບໄຟ ແລະ ສະຖານທີ່ຈອດຈອດລົດ, ມີໄລຍະເວລາການ ກໍ່ສ້າງທັງໝົດ 24 ເດືອນ, ລວມມູນຄ່າການກໍ່ສ້າງໂຄງການຈຳນວນ 13 ຕື້ 900 ກວ່າລ້ານກີບ. ຄາດຈະໃຫ້ສຳເລັດສົມບູນໃນກາງປີ 2016.
ຂ່າວຈາກ: ໜັງສືພິມສະຫວັນພັດທະນາ
