ໃນຕອນບ່າຍ ວັນທີ 18 ສິງຫາ 2016 ຫ້ອງການອຸດສາຫະກໍາ ແລະ ການຄ້າ ເມືອງຫົງສາ ແຂວງໄຊຍະບູລີ ໄດ້ຈັດພິທີທໍາລາຍສິນຄ້າໝົດອາຍຸການນຳໃຊ້ ໂດຍມີ ທ່ານ ສອນສະນິດ ເພັດໄຊ ຫົວໜ້າຫ້ອງການອຸດສາຫະກໍາ ແລະ ການຄ້າ ມີຜູ້ຕາງໜ້າສະມາຄົມຕະຫຼາດ ບັນດາຄະນະກຳມະການກວດກາຄຸນນະພາບສິນຄ້າ ພາຍໃນເມືອງ ທີ່ຖືກແຕ່ງຕັ້ງສະເພາະກິດ ແລະ ພະນັກງານວິຊາການຫ້ອງການດັ່ງກ່າວ ເຂົ້າຮ່ວມຢ່າງພ້ອມພຽງ.
ທ່ານ ສອນສະນິດ ເພັດໄຊ ຫົວໜ້າຫ້ອງການອຸດສາຫະກໍາ ແລະ ການຄ້າ ເມືອງຫົງສາ ໄດ້ໃຫ້ຮູ້ວ່າ ໂດຍປະຕິບັດຕາມ ແຜນເຄື່ອນໄຫວວຽກງານປະຈຳເດືອນ ແລະ ເພື່ອເປັນການຈັດຕັ້ງປະຕິບັດ ວຽກງານປົກປ້ອງຜູ້ຊົມໃຊ້ ດັ່ງນັ້ນ ຫ້ອງການອຸດສາຫະກຳ ແລະ ການຄ້າເມືອງ ໄດ້ສົບທົບກັບຄະນະກຳມະການທີ່ກ່ຽວຂ້ອງຂັ້ນເມືອງ ໄດ້ພ້ອມກັນລົງກວດກາຄຸນນະພາບສິນຄ້າ ແລະ ສິນຄ້າທີ່ຜິດລະບຽບຢູ່ຮ້ານຄ້າໃຫຍ່-ນ້ອຍ ພາຍໃນເມືອງຫົງສາ ຈຳນວນ 14 ບ້ານເທດສະບານ ແລະ ຢູ່ໃນບໍລິເວນຕະຫຼາດຂອງເມືອງ ມີຈຳນວນ 130 ຮ້ານ ໂດຍໄດ້ເລີ່ມຈັດຕັ້ງປະຕິບັດ ແຕ່ກາງເດືອນກໍລະກົດ 2016 ຫາຕົ້ນເດືອນ ສິງຫາ 2016 ເຊິ່ງຜ່ານການລົງເຄື່ອນໄຫວກວດກາສິນຄ້າໝົດອາຍຸ ຫຼື ສິນຄ້າໝົດຄຸນນະພາບໃນຄັ້ງນີ້ ບັນດາຄະນະກຳມະການກວດກາຄຸນນະພາບ ທີ່ຖືກແຕ່ງຕັ້ງສະເພາະກິດຂອງເມືອງ ໄດ້ເອົາໃຈໃສ່ເຄື່ອນໄຫວ ຕາມພາລະບົດບາດ ຂອບເຂດ ສິດ ແລະ ໜ້າທີ່ຂອງຂະແໜງການສາຍຕັ້ງ ໄດ້ມອບໝາຍໃຫ້ ເຊິ່ງສາມາດກວດກາພົບເຫັນ ແລະ ຍຶດສິນຄ້າປະເພດອຸປະໂພກ-ບໍລິໂພກ ທີ່ໝົດອາຍຸການນຳໃຊ້ ເປັນຕົ້ນແມ່ນເຄື່ອງດື່ມ, ເຄື່ອງປຸງແຕ່ງອາຫານ, ໝີ່, ເຂົ້າໜົມ, ສີຍ້ອມຜົມ, ໂລຊັ່ນທາຜິວ ແລະ ອື່ນໆອີກຫຼາຍຢ່າງ ຮວມທັງໝົດ 82 ລາຍການ ມູນຄ່າ 21 ລ້ານກວ່າກີບ.
ສໍາລັບການທໍາລາຍສິນຄ້າຄັ້ງນີ້ ແມ່ນໄດ້ທໍາລາຍດ້ວຍການຈູດ-ເຜົາ ຢູ່ສະຖານທີ່ຖິ້ມຂີ້ເຫຽື້ອຂອງເມືອງຫົງສາ ເພື່ອເປັນການປຸກຈິດສໍານຶກ ໃຫ້ແກ່ຜູ້ບໍລິໂພກ ແລະ ຜູ້ປະກອບການທຸລະກິດ ຕໍ່ການເຄົາລົບລະບຽບກົດໝາຍ ແນໃສ່ສົ່ງເສີມ ແລະ ປົກປ້ອງບັນດາຫົວໜ່ວຍທຸລະກິດການຄ້າ ທີ່ເຄື່ອນໄຫວຢ່າງຖືກຕ້ອງ ສອດຄ່ອງກັບລະບຽບກົດໝາຍ ໃຫ້ເປັນໄປຕາມກົນໄກເສດຖະກິດຕະຫຼາດ ທີ່ມີການດັດສົມຂອງລັດ ສົ່ງເສີມການຜະລິດສິນຄ້າ ປະກອບສ່ວນເຂົ້າໃນວຽກງານຄຸ້ມຄອງສິນຄ້າ ແລະ ປົກປ້ອງສິດ ຜົນປະໂຫຍດຂອງຜູ້ຊົມໃຊ້ຢູ່ໃນທົ່ວເມືອງ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!