ຂປລ. ສປປ ລາວ ຈະສູ້ຊົນເຮັດໃຫ້ ອັດຕາສ່ວນຄອບຄົວທຸກຍາກ ຫລຸດລົງຕ່ຳກວ່າ 6,11% ຂອງຄອບຄົວທັງໝົດ ແລະ ອັດຕາບ້ານທຸກຍາກ ຫລຸດຕ່ຳກວ່າ 18,38% ຂອງຈຳນວນບ້ານທົ່ວປະເທດ ໃນປີ 2016 ໂດຍສືບຕໍ່ນຳເອົາ ແນວທາງນະໂຍບາຍ ແລະ ມະຕິຄຳສັ່ງຂອງພັກ–ລັດ ລົງສູ່ຮາກຖານ ເພື່ອສຸມວຽກງານ ການສ້າງບ້ານເປັນຫົວໜ່ວຍພັດທະນາຕາມ 4 ເນື້ອໃນ 4 ຄາດໝາຍ ໄປຄຽງຄູ່ກັບວຽກງານ 3 ສ້າງ ໂດຍເລັ່ງໃສ່ຕ້ານປະກົດການຫຍໍ້ທໍ້ຢູ່ໃນບ້ານ ແລະ ເມືອງຕ່າງໆ ເຮັດໃຫ້ພື້ນຖານການເມືອງມີຄວາມສະຫງົບ, ເປັນລະບຽບຮຽບຮ້ອຍ, ປະຊາຊົນມີຄວາມກະຕືລືລົ້ນ ປະກອບສ່ວນເຂົ້າໃນການພັດທະນາ, ຊີວິດການເປັນຢູ່ຂອງປະຊາຊົນບັນດາເຜົ່າ ນັບມື້ດີຂຶ້ນເທື່ອລະກ້າວ.
ທ່ານ ຄຳລຽນ ພົນເສນາ ຮອງລັດຖະມົນຕີ ກະຊວງແຜນການ ແລະ ການລົງທຶນ ກ່າວໃນກອງປະຊຸມຄົບຄະນະຂອງ ກຳມາທິການ ແຜນການການເງິນ ແລະ ການກວດສອບ (ກຜງສ) ເມື່ອບໍ່ດົນມານີ້ ຢູ່ນະຄອນຫລວງວຽງຈັນວ່າ: ປັດຈຸບັນ ບ້ານທຸກຍາກຍັງເຫລືອ 1.680 ກວ່າບ້ານ, ເທົ່າກັບ 19,95%,ອັດຕາຄອບຄົວທຸກຍາກ ຍັງເຫລືອ 6,59% (ປີ 2015), ໄດ້ປະກາດເມືອງຫລຸດພົ້ນອອກຈາກບັນຊີ 47 ເມືອງທຸກຍາກທີ່ສຸດ ໄດ້ 14 ເມືອງ ຄື: ເມືອງບໍລິຄັນ, ຄຳເກີດ ແລະ ເມືອງວຽງທອງ ແຂວງບໍລິຄຳໄຊ, ເມືອງຄູນ, ເມືອງໜອງແຮດ ແຂວງຊຽງຂວາງ, ເມືອງທ່າໂທມ ແຂວງໄຊສົມບູນ, ເມືອງບາຈຽງ, ສຸຂຸມມາ ແຂວງຈຳປາສັກ, ເມືອງນາກາຍ ແຂວງຄຳມ່ວນ, ເມືອງສັງທອງ ນະຄອນຫລວງວຽງຈັນ, ເມືອງພູຄູນ ແຂວງຫລວງພະບາງ, ເມືອງວິລະບູລີ ແລະ ເມືອງພິນ ແຂວງສະຫວັນນະເຂດ, ເມືອງໄຊຍະບູລີ ແຂວງໄຊຍະບູລີ. ພ້ອມນີ້, ຍັງສາມາດສ້າງບ້ານ (ທີ່ນອນຢູ່ໃນ 167 ຈຸດຈັດສັນພູມລຳເນົາ) ເປັນຕົວເມືອງໃນຊົນນະບົດໃນຕໍ່ໜ້າໄດ້ 8 ບ້ານ, ມີ 6 ບ້ານ ໄດ້ປະກາດເປັນຕົວເມືອງໃນຊົນນະບົດຄື: ບ້ານນາຫລາ ເມືອງໄຊຍະບູລີ, ບ້ານບວມເລົາ-ຜາແກ້ວ, ບ້ານເມືອງປາ ເມືອງປາກລາຍ ແຂວງໄຊຍະບູລີ, ບ້ານຜາເມືອງ ເມືອງບໍລິຄັນ ແຂວງບໍລິຄຳໄຊ, ບ້ານຫ້ວຍກອງ ເມືອງປາກຊ່ອງ ແລະ ບ້ານນາດີ ເມືອງມູນລະປະໂມກ ແຂວງຈຳປາສັກ.
ແຫລ່ງຂ່າວ:
ຕິດຕາມຂ່າວເສດຖະກິດລາວ ກົດໄລຄ໌ເລີຍ!