ວັນທີ 11 ກໍລະກົດ 2014 ກົງກັບ ມື້ຂຶ້ນ 15 ຄ່ຳ ເດືອນແປດ ລາວ ເຊິ່ງເປັນວັນບຸນເຂົ້າພັນສາຂອງພະສົງກໍຄືຊາວພຸດລາວ. ດັ່ງນັ້ນ, ໃສຕອນເຊົ້າຂອງວັນດັ່ງກ່າວນີ້ ໃນແຕ່ລະປີຈະເຫັນຊາວພຸດທະສາສະນິກະຊົນ ພ້ອມພາກັນແຕ່ງໂຕດ້ວຍຊຸດຜ້າໄໝລາວ, ບ່ຽງແພ ແລະຂອງທານ ບໍ່ວ່າຈະເປັນດອກໄມ້, ເຂົ້າຕົ້ມເຂົ້າໜົມ, ທຽນພັນສາ, ຊຸດສັງຄະທານ ແລະອາຫານຫວານຄາວ ມຸ່ງໜ້າສູ່ວັດ ເພື່ອທຳພິທີ ໄຫວ້ພະ, ຮັກສາສິນ, ຟັງທຳ ແລະໃຫ້ທານ ອຸທິດສ່ວນບຸນກຸສົນໄປຫາບຸບພະກາລີ, ຍາດພີ່ນ້ອງ ທີ່ລ່ວງລັບໄປແລ້ວ ລວມທັງເຈົ້າກຳນາຍເວນແລະສັບພະສັດທັງຫຼາຍ.