ທາງການອີຣັກ ຢືນຢັນວ່າ ກຸ່ມໄອເອສ ຢຶດໂຮງງານອາວຸດເຄມີເກົ່າ ແລະປຸ້ນວັດຖຸບາງສ່ວນ ແຕ່ເຊື່ອວ່າ ບໍ່ໜ້າຈະເອົາໄປຜະລິດເປັນອາວຸດໃຊ້ງານໄດ້.
ລັດຖະບານອີຣັກສົ່ງຈົດໝາຍແຈ້ງໄປຍັງສະຫະປະຊາຊາດ ລົງວັນທີ 1 ກໍລະກົດ 2014 ແຕ່ຫາກໍຖືກເຜີຍແຜ່ໃນວັນທີ 8 ກໍລະກົດ 2014 ວ່າ ກຸ່ມກໍ່ການຮ້າຍສາມາດຢຶດໂຮງງານຜະລິດອາວຸດເຄມີເກົ່າຂອງອະດີດປະທານາທິບໍດີຊັດດຳ ຮຸສເຊນ ທີ່ເມືງມູທັນນາ ເມື່ອຄືນວັນທີ 11 ມິຖຸນາ ສົ່ງຜົນໃຫ້ລັດຖະບານອີຣັກບໍ່ສາມາດປະຕິບັດຕາມພັນທະກໍລະນີທຳລາຍອາວຸດເຄມີ ຈົນກວ່າສະຖານະການຈະດີຂຶ້ນແລະຢຶດຄືນ ຈົດໝາຍລະບຸວ່າ ຕອນເຊົ້າຂອງວັນທີ 12 ມິຖຸນາ ລະບົບເຝົ້້າລະວັງທີ່ໂຮງງານຖືກເຮັດໃຫ້ໃຊ້ການບໍ່ໄດ້ ສະທ້ອນວ່າມີການປຸ້ນອຸປະກອນ ແລະເຄື່ອງມືບາງສ່ວນໄປ ຈົດໝາຍສະບັບນີ້ຢືນຢັນຂໍ້ມູນຈາກສະຫະລັດ ເມື່ອວັນທີ 19 ມິຖຸນາ ວ່າກຸ່ມລັດອິສລາມ ຢຶດໂຮງງານຜະລິດອາວຸດເຄມີເກົ່າ ແຕ່ເຊື່ອວ່າບໍ່ສາມາດຜະລິດອາວຸດເຄມີທີ່ໃຊ້ການໄດ້ ເນື່ອງຈາກວັດຖຸທີ່ຍັງຫຼົງເຫຼືອຢູ່ນັ້ນເກົ່າ ແລະເສື່ອມໂຊມໝົດແລ້ວ.
ໂຮງງານມູທັນ ນາ ຢູ່ຫ່າງຈາກນະຄອນຫຼວງແບກແດດຂອງອີຣັກໄປທາງຕາເວັນຕົກສ່ຽງເໜືອປະມານ 72 ກິໂລແມັດ ເລິ່ມຜະລິດກ໊າສມັສຕາດແລະສານທຳລາຍປະສາດ ລວມທັງກ໊າສຊາຣິນ ໃນຕົ້ນຊຸມປີ 1980 ຫຼັງຈາກຊັດດຳ ຂຶ້ນສູ່ອຳນາດ ແລະຂະຫຍາຍອອກໄປໃນໄລຍະຫຼັງສົງຄາມອີ້ຣັກ-ອີຣານ 10 ປີ ກ່ອນຈະຖືກປິດໂຕລົງຫຼັງສົງຄາມອ່າວເປີເຊຍ ເຊື່ອວ່າປັດຈຸບັນຍັງເປັນບ່ອນເກັບມ້ຽນລູກຈະຫຼວດບັນຈຸກ໊າສຊາຣິນແລະມັສຕາດປະມານ 2,500 ລູກ ແລະສານທຳລາຍປະສາດອື່ນໆຢູ່.