ສຳນັກຂ່າວຕ່າງປະເທດ ລາຍງານໃນວັນທີ 22 ສິງຫາຜ່ານມານີ້ວ່າ ກອງທັບສະຫະລັດອາເມຣິກາ ແລະ ກອງທັບ ສ.ເກົາຫລີ ຫລື ເກົາຫລີໃຕ້ ໄດ້ເລີ່ມດຳເນີນການເຝິກຊ້ອມສູ້ຮົບຮ່ວມກັນ ຢ່າງເຕັມຮູບແບບ ໃນວັນຈັນທີ 22​ ສິງຫາ 2016 ຜ່ານມານີ້ ຊຶ່ງຈະດຳເນີນໄປອີກເປັນເວລາ 2 ອາທິດ ພາຍໃຕ້ລະຫັດ ອຸນຈິ ຟຣີດອມ ໂດຍມີທະຫານຈາກເກົາຫລີໃຕ້ເຖິງ 50,000 ຄົນ ແລະ ທະຫານອາເມຣິກາເຂົ້າຮ່ວມອີກ 25,000​ ຄົນ.  ລັດຖະບານສະຫະລັດອາເມຣິກາ ແລະ ເກົາຫລີໃຕ້ ໄດ້ລະບຸວ່າ ການເຝິກຊ້ອມດັ່ງກ່າວນີ້ ແມ່ນເພື່ອປ້ອງກັນຕົນເອງເທົ່ານັ້ນ, ແນວໃດກໍຕາມ ດ້ານລັດຖະບານ ສປປ ເກົາຫລີ ຫລື ເກົາຫລີເໜືອ ໄດ້ຖືການເຄື່ອນໄຫວທາງການທະຫານດັ່ງກ່າວນີ້ ເປັນການຈົງໃຈຍຸແຍ່ ສ້າງຄວາມເຄັ່ງຕຶງພາຍໃນພາກພື້ນ ໂດຍກະຊວງການຕ່າງປະເທດ ສປປ ເກົາຫລີ ໄດ້ອອກມາກ່າວປະນາມທັນທີໃນວັນດຽວກັນວ່າ ການຊ້ອມຮົບ ອຸນຈິ ຟຣີດອມ ເປັນພຶດຕິກຳທາງອາຍາ ທີ່ບໍ່ອາດໃຫ້ອະໄພໄດ້ ແລະ ອາດເຮັດໃຫ້ແຫລມເກົາຫລີ ເຂົ້າສູ່ຂອບເຫວແຫ່ງສົງຄາມ.

ດ້ານສຳນັກຂ່າວຊິນຫົວຂອງຈີນ ໄດ້ເຜີຍແຜ່ບົດວິຈານຂອງຕົນ ສະແດງຄວາມຄັດຄ້ານ ຕໍ່ກັບການເຝິກຊ້ອມສູ້ຮົບດັ່ງກ່າວນີ້ ໂດຍໄດ້ລະບຸວ່າ ການກະທຳດັ່ງກ່າວ ມີແຕ່ຈະເຮັດໃຫ້ປຽງຢາງ ຍິ່ງເພີ່ມທະວີຄວາມຮຸນແຮງຂຶ້ນ ໃນໄລຍະເວລາທີ່ເຕັມໄປດ້ວຍ ຄວາມອ່ອນໄຫວ ດັ່ງປັດຈຸບັນນີ້.

ຕິດຕາມເຮົາທາງFacebook ກົດຖືກໃຈເລີຍ!