ບຸນເຂົ້າພັນສາປີນີ້ ແມ່ນກົງກັບວັນທີ 11 ກໍລະກົດ2014 ແລະ ນອກຈາກເປັນວັນທີ່ສຳຄັນທາງພຸດ
ທະສາດສະໜາແລ້ວ ວັນສຳຄັນດັ່ງກ່າວຍັງເຮັດໃຫ້ບັນດາແມ່ຄ້າຊາວຂາຍເຄື່ອງກອງບຸນມີລາຍຮັບ
ເປັນກອບເປັນກຳຄືປີທີ່ຜ່ານໆມາ, ສຳລັບເຈົ້າຂອງຮ້ານ ນາງ ຈ້ຽມ ຂາຍເຄື່ອງກອງບຸນປີນີ້ກໍບໍ່ໜ້ອຍ
ໜ້າຈົກເງິນເຖິງ 50 ລ້ານກີບຊື້ເຄື່ອງກຽມຂາຍໃນວັນສຳຄັນດັງກ່າວ.
ຕາມການສອບຖາມ ນາງ ທິບພາພອນ ຈັນທະສອນ ເຈົ້າຂອງຮ້ານນາງຈ້ຽມຂາຍເຄື່ອງກອງບຸນໃຫ້
ຮູ້ວ່າ: ຕົນຄ້າຂາຍເຄື່ອງກອງບຸນຢູ່ຕະຫຼາດໜອງຈັນນີ້ມາໄດ້ 5 ປີ ແລ້ວ ຊຶ່ງອະດີດຜ່ານມາແມ່ນເຮັດ
ຄ້າຂາຍມາຫຼາຍຢ່າງເຊັ່ນ: ຂາຍເຄື່ອງແຫ້ງ, ຮັບຊື້ເຄື່ອງແຫ້ງຂາຍສົ່ງໃຫ້ແມ່ຄ້າ ເຊຶ່ງທຸລະກິດຕ່າງໆທີ່
ກ່າວມາແມ່ນໄດ້ເຊົາເຮັດແລ້ວ ຫຼັງຈາກນັ້ນດ້ວຍອາຊີບທີ່ຕິດພັນກັບການຄ້າຂາຍໃນຕະຫຼາດ ຕົນຈິ່ງ
ແນມເຫັນທຸລະກິດໃໝ່ ໂດຍຫັນມາເອົາດີດ້ານທຸລະກິດຂາຍເຄື່ອງກອງບຸນ ແລະ ແຕ່ລະປີພໍຮອດວັນ
ບຸນເຂົ້າພັນສາທຸລະກິດດັ່ງກ່າວ ກໍບໍ່ເຄີຍສ້າງຄວາມຜິດຫວັງ ຊຶ່ງປີນີ້ກໍເປັນອີກປີໜຶ່ງທີ່ຕົນຄາດຫວັງ
ຄືກັບປີທີ່ຜ່ານມາ ສະນັ້ນຕົນຈິ່ງຍອມຈົກເງິນໃນກະເປົ໋າເຖິງ 50 ລ້ານກີບຊື້ເຄື່ອງກອງບຸນກຽມໄວ້ເພື່ອ
ຈຳໜ່າຍໃນວັນບຸນເຂົ້າພັນສາທີ່ຈະມາຮອດໃນໄວໆນີ້ ແລະ ພ້ອມທັງໝັ້ນໃຈປີນີ້ຈະໄດ້ຂາຍດີແນ່ນອນ.
ປະຈຸບັນກໍເລີ່ມມີແມ່ຄ້າລາຍຍ່ອຍມາຖາມຊື້ໄວ້ແລ້ວ ເພື່ອຈັດກຽມນຳໄປຂາຍຕໍ່ໃນວັນເຂົ້າພັນສາ ໂດຍ
ສະເພາະແມ່ນທຽນພັນສາ, ຜ້າໄກ, ຜ້າຂາວ, ທຽນວຽນຫົວ, ທູບ ແລະ ເຄື່ອງກອງບຸນອື່ນໆອີກຫຼາຍຢ່າງ,
ນອກຈາກນັ້ນກໍຈະມີຍອດສັ່ງຊື້ຈາກຕ່າງແຂວງທະຍ່ອຍສັ່ງຊື້ມາເລື້ອຍໆເຊັ່ນດຽວກັນ.
ເຈົ້າຂອງຮ້ານເນັ້ນອີກວ່າ: ສຳລັບເຄື່ອງກອງບຸນຕ່າງໆທີ່ນຳມາຈຳໜ່າຍສ່ວນໜຶ່ງນຳເຂົ້າຈາກປະເທດ
ເພື່ອນບ້ານ, ສ່ວນໜຶ່ງແມ່ນເປັນຂອງບ້ານເຮົາ ລູກຄ້າທຸກຄົນສາມາດເລືອກຊື້ໄປທານໄດ້ຕາມຄວາມ
ຕ້ອງການ ຊຶ່ງມີຫຼາຍແບບ, ຫຼາຍຍີ່ຫໍ້, ຫຼາຍລາຄາໃຫ້ເລືອກບໍ່ຕ້ອງໄດ້ໄປເລາະຫຼາຍບ່ອນ.
ນາງ ທິບພາພອນ ບອກຕື່ມວ່າ: ຫົວໃຈຂອງທຸລະກິດຂາຍເຄື່ອງກອງບຸນສິ່ງສຳຄັນເຄື່ອງຕ້ອງຄົບ, ຕ້ອງ
ຮູ້ຈັກເຄື່ອງກອງບຸນທຸກຢ່າງທີ່ຢູ່ໃນຮ້ານ ແລະ ແຕ່ລະຢ່າງໃຊ້ແບບໃດສາມາດແນະນຳໃຫ້ລູກຄ້າຮູ້ໄດ້,
ນີ້ລະທີ່ຈະເຮັດໃຫ້ລູກຄ້າເຂົ້າມາຫາເຮົາຢູ່ບໍ່ຂາດ.
ສ່ວນອະນາຄົດຍັງບໍ່ທັນມີແຜນທີ່ຈະຂະຫຍາຍທຸລະກິດເທື່ອ ເພາະທຸກ ວັນນີ້ພໍໃຈກັບຍອດຂາຍທີ່ມີຢູ່
ມີແຕ່ຈະພະຍາຍາມຮັກສາລູກຄ້າໄວ້ໃຫ້ດົນທີ່ສຸດ ເພື່ອຍອດຂາຍຈະບໍ່ຕົກ ແລະ ທ່ານໃດທີ່ສົນໃຈກໍໄປ
ແວ່ໄດ້ທີ່ຕະຫຼາດໜອງຈັນ ນະຄອນຫຼວງວຽງຈັນ.
ແຫຼ່ງຂ່າວຈາກ: ໜັງສືພິມເສດຖະກິດ – ສັງຄົມ