ເມື່ອບໍ່ດົນມານີ້ ແຂວງສະຫວັນນະເຂດ ໄດ້ຈັດພິທີທຳລາຍຊີ້ນສ່ວນເຄື່ອງໃນສັດ (ງົວ-ຄວາຍ) ພາຍຫຼັງທີ່ເຈົ້າໜ້າທີ່ ກອງກວດກາພາສີ ຢຶດໄດ້ຈາກລົດໂດຍສານຊາວຫວຽດນາມ ແລະ ສາມາດຢຶດໄດ້ທັງໝົດ 9 ພັນກິໂລກຼາມ ເຊິ່ງມີຟໍມາລີນ ແລະ ເຊື້ອແບັກເຕີລີ ໃນປະລິມານທີ່ສູງສົມຄວນ.
ເຂົ້າຮ່ວມພິທີຄັ້ງນີ້ ມີທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ຄຳລຸຍ ຍາດຕິວົງ ຫົວໜ້າພະແນກກະສິກຳ-ປ່າໄມ້ແຂວງ, ທ່ານ ສີທົນ ນັນທະລາດ ຫົວໜ້າພະແນກອຸດສາຫະກຳ-ການຄ້າແຂວງ, ທ່ານ ດຣ. ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງ ພ້ອມດ້ວຍແຂກຈາກພາກສ່ວນຕ່າງໆ.
ທ່ານ ບຸນລ້ຽງ ຈັນວັນເພັງ ຮອງຫົວໜ້າພະແນກກະສິກຳ-ປ່າໄມ້ແຂວງ ໄດ້ລາຍງານໃຫ້ຮູ້ວ່າ: ໃນເວລາ 14 ໂມງຂອງວັນທີ 10 ສິງຫາ ເຈົ້າໜ້າທີ່ກອງກວດກາພາສີແຂວງສະຫວັນນະເຂດ ໄດ້ຮັບແຈ້ງທາງໂທລະສັບຈາກພົນລະເມືອງດີວ່າ: ມີແມ່ຄ້າຊາວຫວຽດນາມ ຈະມີການຂົນເຄື່ອງໃນສັດປະເພດ: ງົວ-ຄວາຍ ຜ່ານແຂວງສະຫວັນນະເຂດ ຕາມສາຍທາງເລກ 9 ໃນລົດໂດຍສານໝາຍເລກທະບຽນ 43B001.94 ລົດໂດຍສານຫວຽດນາມ. ເມື່ອເປັນດັ່ງນັ້ນ ທາງເຈົ້າໜ້າທີ່ຈຶ່ງໄດ້ພ້ອມກັນອອກສະກັດ ເພື່ອລັດລົດຄັນດັ່ງກ່າວ ພໍຮອດເຂດບ້ານທົ່ງ ເມືອງອຸທຸມພອນ ກໍ່ເຫັນລົດຄັນດັ່ງກ່າວແລ່ນມາ, ເຈົ້າໜ້າທີ່ກອງກວດກາພາສີ ຈຶ່ງສັ່ງໃຫ້ລົດຄັນດັ່ງກ່າວຢຸດ ແລະ ໄດ້ທຳການກວດຄົ້ນ ໄດ້ພົບເຫັນຖົງສີຂຽວ ເຊິ່ງທາງໃນມີແກັດໂຟມ ແລະ ບັນຈຸດເຄື່ອງໃນສັດເປັນຈຳນວນ 9,000 ກິໂລກຼາມ (9 ໂຕນ).
ຜ່ານການສືບສວນ-ສອບສວນຂອງເຈົ້າໜ້າທີ່ ກວດກາພາສີເຫັນວ່າ ສິນຄ້າຜະລິດຕະພັນສັດດັ່ງກ່າວ ແມ່ນນຳເຂົ້າບໍ່ຖືກຕ້ອງ, ບໍ່ມີເອກະສານຢັ້ງຢືນໃດໆ ທາງເຈົ້າໜ້າທີ່ຈຶ່ງໄດ້ຢຶດ ພ້ອມທັງມີການປັບໄໝຕາມລະບຽບການ. ພ້ອມນັ້ນ ກໍ່ໄດ້ມີການສົມທົບກັບພະແນກກະສິກຳ-ປ່າໄມ້, ໂດຍສະເພາະຂະແໜງລ້ຽງສັດ-ການປະມົງ ໄດ້ນຳເອົາຊີ້ນດັ່ງກ່າວ ໄປວິເຄາະ ວິໄຈຫາເຊື້ອພະຍາດ, ໃນນັ້ນ ໄດ້ກວດກາຫາສານຕົກຄ້າງ (ຟໍມາລີນ) ແລະ ເຊື້ອແບັກເຕີລີ. ຜົນຂອງການວິໄຈພົບວ່າ: ໄດ້ກວດພົບມີສານຕົກຄ້າງ ຟໍມາລີນ ແລະ ເຊື້ອແບັກເຕີລີ ໃນປະລິມານທີ່ສູງສົມຄວນ ຖ້ານຳໄປບໍລິໂພກ ກໍ່ຈະໄດ້ມີການສະສົມເຊື້ອພະຍາດດັ່ງກ່າວ ເຂົ້າສູ່ຮ່າງກາຍຄົນ ເຮັດໃຫ້ມີການຕິດເຊື້ອພະຍາດ ແລະ ມີໂອກາດເກີດເປັນພະຍາດຕິດຕໍ່ຈາກສັດສູ່ຄົນໄດ້.
ທີ່ມາຈາກ: ເສດຖະກິດ-ການຄ້າ