ປະເທດຈີນໄດ້ສົ່ງດາວທຽມສື່ສານ ເຊິງຄວອນຕັມ ຂຶ້ນສູ່ອາວະກາດໄດ້ສຳເລັດເປັນຊາດທຳອິດຂອງໂລກ ເພື່ອປູທາງສຳລັບການສ້າງເຄືອຂ່າຍການສື່ສານຄວາມປອດໄພສູງລະຫວ່າງອາວະກາດ ກັບ ພື້ນໂລກ ແລະ ປອດການແຮັກຂໍ້ມູນ
ຕາມລາຍງານຂອງສຳນັກຂ່າວຊິນຫົວຂອງຈີນ ເມື່ອວັນອັງຄານທີ 16 ສິງຫາ 2016 ທີ່ຜ່ານມາ ວ່າ ດາວທຽມສື່ສານ ຄວອນຕັມ ດັ່ງກ່າວມີຊື່ເຕັມວ່າ Quantum Experiments at Space Scale (QUESS) ແລະ ມີຊື່ຫຼິ້ນວ່າ “ມໍຈື້” ນັກປັດສະຍາຊື່ດັງໃນອະດີດຂອງຈີນ ຖືກຍິງອອກຈາກສູນສົ່ງດາວທຽມ ຈິ່ວສວນ ໃນມົນທົນກາຊູ ທາງຕະເວັນຕົກສຽງເໜືອຂອງປະເທດ ເມື່ອເວລາ 01:40ໂມງ ວັນອັງຄານ ໂດຍມີໄລຍະທາງກວ່າ 600 ກິໂລແມັດ ຈະໂຄຈອນຮອບໂລກທຸກໆ 90 ນາທີ ຫຼັງຈາກເຂົ້າສູ່ວົງໂຄຈອນສຳພັນກັບດວງຕະເວັນທີ່ລະດັບສູງ 500 ກິໂລແມັດ
ພາລະກິດມີກຳນົດໄລຍະເວລາ 2 ປີ ຂອງດາວທຽມດວງນີ້ ຄືການສ້າງການສື່ສານ ເຊິງຄວອນຕັມ ໂດຍດາວທຽມຈະສ້າງ ໂຟຕອນພົວພັນ (entangled photon) ເຊິ່ງເປັນອະນຸພາບຍ່ອຍນ້ອຍໆ ຂອງອະຕອມຂອງແສງຫຼາຍໆຄູ່ ແລະ ຍິງໂຟຕອນໜຶ່ງໃນຄູ່ນັ້ນໆ ຈາກອາວະກາດລົງມາທີ່ໂລກມະນຸດ “ການສື່ສານຄວອນຕັມ ຊ່ວຍຍົກລະດັບຂັ້ນສູງ ເນື່ອງຈາກຄວອນຕັມຂອງໂຟຕອນ ບໍ່ສາມາດແຍກອອກຈາກກັນ ຫຼື ເຮັດສຳເນົາໄດ້ ຈິ່ງເປັນໄປບໍ່ໄດ້ທີ່ຈະສາມາດຫຼັກຟັງ, ດັກຈັບສັນຍານ ຫຼື ເຈາະລະຫັດຂໍ້ມູນທີ່ສົ່ງຜ່ານມັນໄດ້”
ດ້ານ ທ່ານ ພານ ຈ້ຽນເວີ່ຍ ນັກວິທະຍາສາດຜູ້ເປັນຫົວໜ້າໂຄງການດາວທຽມວິທະຍາສາດ ຄວອນຕັມ (QSS) ກ່າວວ່າ ດາວທຽມ ມໍຈື້ ຖືເປັນຈຸດປ່ຽນບົດບາດຂອງຈີນ ຈາກຖານະຜູ້ຕາມໃນການພັດທະນາດ້ານເທັກໂນໂລຢີການສື່ສານແບບເກົ່າ ກ້າວເຂົ້າສູ່ຄວາມເປັນໜຶ່ງໃນຜູ້ນຳສູ່ຄວາມສຳເລັດໃນອານາຄົດ
ທີ່ມາ: http://www.thairath.co.th/content/692497