ທ່ານລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ເພັດ ພົມພິພັກ ໄດ້ໃຫ້ສໍາພາດນັກຂ່າວໃນວັນທີ 16 ສິງຫານີ້ວ່າ: ລັດຖະບານໄດ້ສັ່ງໃຫ້ຢຸດຕິການເກັບຄ່າບໍລິການຜ່ານຂົວທ່າງ່ອນ, ເມືອງໄຊທານີ, ນະຄອນຫລວງວຽງຈັນແລ້ວ ນັບແຕ່ວັນທີ 16 ສິງຫານີ້ເປັນຕົ້ນໄປ, ເພື່ອປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີລົງວັນທີ 8 ສິງຫາ 2016 ກ່ຽວກັບໃຫ້ຢຸດຕິການເກັບຄ່າບໍລິການຜ່ານຂົວດັ່ງກ່າວ, ຂະນະທີ່ເງິນທີ່ໄດ້ຈາກການເກັບຄ່າຜ່ານຂົວເກີນໜີ້ສິນທະນາຄານກາງແມ່ນໃຫ້ມອບເຂົ້າງົບປະມານລັດ.
ທ່ານຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໃຫ້ຮູ້ວ່າ: ການຢຸດຕິເກັບຄ່າບໍລິການຜ່ານຂົວດັ່ງກ່າວນີ້, ເນື່ອງຈາກວ່າລັດສາມາດເກັບເງິນຊຳລະໜີ້ກໍ່ສ້າງຂົວໃຫ້ທະນາຄານແຫ່ງ ສປປ ລາວ ສຳເລັດໝົດແລ້ວ ແລະ ລັດຖະບານໄດ້ກຳນົດໃຫ້ຄິດໄລ່ເກັບຄ່າບໍລິການຜ່ານຂົວ-ທາງ ເຂົ້າໃນລາຄານ້ຳມັນເຊື້ອໄຟທີ່ລວມເຂົ້າໃນກອງທຶນທາງແລ້ວຕາມການຕົກລົງເມື່ອປີ 2011 ຜ່ານມາ, ເຊິ່ງໃນຕໍ່ໜ້າການບູລະນະສ້ອມແປງຂົວດັ່ງກ່າວແມ່ນໃຫ້ນຳໃຊ້ທຶນຈາກກອງທຶນທາງ. ພ້ອມນີ້, ໃຫ້ມອບເງິນລາຍຮັບຈາກການເກັບເງິນຄ່າຜ່ານຂົວທ່າງ່ອນ ທີ່ໄດ້ເກີນກວ່າໜີ້ສິນຄ້າງກັບທະນາຄານແຫ່ງ ສ ປປ ລາວ ເຂົ້າງົບປະມານລວມ ເພື່ອແກ້ໄຂລາຍຈ່າຍທີ່ຈຳເປັນຂອງລັດຖະບານ.
ການຢຸດຕິເກັບຄ່າຜ່ານຂົວດັ່ງກ່າວ, ນັບວ່າເປັນຂ່າວດີສໍາລັບຜູ້ໃຊ້ລົດໃຊ້ຖະໜົນເວົ້າລວມ, ເວົ້າສະເພາະກໍແມ່ນຜູ້ທີ່ຂັບຂີ່ລົດໃຫຍ່ຜ່ານຂົວດັ່ງກ່າວແມ່ນບໍ່ໄດ້ເສຍເງິນອີກຕໍ່ໄປ, ເປັນການຫລຸດຄ່າໃຊ້ຈ່າຍຂອງປະຊາຊົນ ແລະ ສ້າງເງື່ອນໄຂອໍານວຍຄວາມສະດວກໃຫ້ແກ່ການຂົນສົ່ງສີນຄ້າ, ຜົນຜະລິດກະສິກໍາ, ທັງເຮັດໃຫ້ສະພາບການສັນຈອນຜ່ານຂົວດັ່ງກ່າວມີຄວາມວ່ອງໄວຫລາຍຂຶ້ນ.
ເບື້ອງຕົ້ນຂົວແຫ່ງນີ້ແມ່ນບໍລິສັດເອກະຊົນເປັນຜູ້ສ້າງ ໂດຍຢືມເງິນຈາກທະນາຄານແຫ່ງ ສປປລາວ ໄປລົງທຶນ ແຕ່ພາຍຫຼັງສ້າງຂົວສຳເລັດ ແລ້ວເກັບເງິນສົ່ງທະນາຄານແຫ່ງ ສປປລາວ ບໍ່ໄດ້ຕາມກຳນົດ ຈຶ່ງໄດ້ມອບໂອນໃຫ້ ທະນາຄານແຫ່ງ ສປປລາວ ເປັນຜູ້ລົງໄປເກັບເງິນເອົາເອງ. ການຢຸດເກັບເງິນຄ່າຜ່ານດັ່ງກ່າວ ແມ່ນຍ້ອນວ່າທະນາຄານແຫ່ງ ສປປລາວ ໄດ້ເກັບເງິນ (ເກັບໜິ້) ໄດ້ຄົບຖ້ວນແລ້ວ.
ຂ່າວແລະຮູບ: ລາວພັດທະນາ
ຕິດຕາມເຮົາທາງFacebook ກົດຖືກໃຈເລີຍ!