ເມື່ອວັນທີ 5.8.2016 ຜ່ານມານີ້ ເຈົ້າໜ້າທີ່ຕຳຫຼວດກອງຄະດີ ປກສ ເມືອງຄຳເກີດ ສາມາດມ້າງຄະດີ ລັກຊັບພົນລະເມືອງ ໄດ້ກັກຕົວຜູ້ຖືກຫາໄດ້ 3 ຄົນຄື: ທ້າວ ວີລາ ອາຍຸ 21 ປີ, ທ້າວ ວິໃຈ ອາຍຸ 26 ປີ ທັງສອງເປັນປະຊາຊົນບ້ານ ນາກະດົກ, ເມືອງຄຳເກີດ, ແຂວງ ບໍລິຄຳໄຊ ແລະທ້າວ ວິລະສັກ ອາຍຸ 36 ປີ ປະຊາຊົນ ບ້ານ ສົມສະນຸກ ເມືອງຄຳເກີດ.
ຜູ້ຖືກຫາທັງ 3 ຄົນ ໄດ້ໃຫ້ການສາລະພາບຕໍ່ເຈົ້າໜ້າທີ່ວ່າ: ເວລາ 15:00 ໂມງຂອງ ວັນທີ 12.1.2016 ພວກຕົນທັງສາມໄດ້ວາງແຜນໄປລັກ ຄວາຍຂອງປະຊານ ບ້ານນາກະດົກ ຕາມທົ່ງນາ ແລະປ່າເຫຼົ່າ ໂດຍໃຊ້ຮູບ ການເອົາປືນແກ໊ບຍິງເອົາ. ເມື່ອໄດ້ຄວາຍແລ້ວ ພວກຕົນກໍຄົວເອົາຊີ້ນ ຈຳນວນ 4 ເປົາ ແລ້ວພາກັນເອົາໃສ່ລົດຕູ້ໄປຂາຍໃຫ້ຍິງຄົນໜຶ່ງ (ບໍ່ຮູ້ຊື່) ຢູ່ພາຍໃນບ້ານ ນາກະດົກ ໄດ້ເງິນຈຳນວນ 2,8 ລ້ານກີບ. ຫຼັງຈາກໄດ້ເງິນມາແລ້ວ ກໍໄດ້ແບ່ງກັນ ໄປໃຊ້ຈ່າຍຫຼິ້ນ, ກິນຟູມເຟືອຍ, ມົ້ວ ສູມຢາເສບຕິດຈຳນວນໜຶ່ງ.
ນອກຈາກນີ້ເຈົ້າໜ້າທີ່ຍັງໄດ້ສືບສວນ-ສອບສວນ ຂະຫຍາຍຜົນ ໃຫ້ຮູ້ຕື່ມອີກວ່າ: ທ້າວ ວີລາ ໄດ້ຮັບສາລະພາບຕໍ່ ເຈົ້າໜ້າທີ່ຕື່ມວ່າ: ວັນທີ 2.2.2016 ຕົນໄດ້ຂຶ້ນເຮືອນຂອງ ນາງ ວົງລີ ຢູ່ ບ້ານນາກະດົກ, ເມືອງຄຳເກີດ ແລະໄດ້ລົງມື ງັດຕູ້ເຊບປະກອບມີຊັບສິນຄື: ສາຍແຂນຄຳ 2 ເສັ້ນໜັກ 2 ບາດ, ແຫວນຄຳ 1 ວົງ ແລະ ເງິນກີບ ຈຳນວນ 1,8 ລ້ານ ກີບ. ພາຍຫຼັງທີ່ຕົນລັກມາໄດ້ແລ້ວຕົນ ກໍກັບເມືອເຮືອນເອົາເງິນຈຳນວນ 1,8 ລ້ານກີບ, ສາຍຄໍຄຳ 1 ເສັ້ນ ຝາກໄວ້ນຳແມ່, ສ່ວນທີ່ເຫຼືອຕົນໄດ້ເອົາໄປຂາຍເຂົ້າຮ້ານຄຳ ແຫ່ງໜຶ່ງ ຢູ່ຕະຫຼາດຫຼັກຊາວ ໄດ້ເງິນຈຳນວນ 6,6 ລ້ານກີບ. ເມື່ອໄດ້ເງິນແລ້ວ ຕົນກໍໄປຊື້ລົດຈັກ 1 ຄັນ, ໂທລະສັບ 1 ໜ່ວຍ ພ້ອມທັງໃຊ້ຈ່າຍມົ້ວ ສຸມຢາເສບຕິດ.
ຕໍ່ກັບການກະທຳຜິດດັ່ງກ່າວ ແມ່ນໄດ້ສ້າງຄວາມເສຍຫາຍອັນໃຫຍ່ຫຼວງ ໃຫ້ແກ່ ພໍ່ແມ່, ປະຊາຊົນ ແລະຍັງເຮັດໃຫ້ສັງຄົມບໍ່ມີຄວາມສະຫງົບ. ເຈົ້າໜ້າທີ່ ຕຳຫຼວດຈິ່ງໄດ້ກັກຕົວໄວ້ດຳເນີນຄະດີຕາມລະບຽບກົດໝາຍ. ປະຈຸບັນຄະດີແມ່ນ ຍັງຢູ່ໃນຂັ້ນຕອນຂອງການສືບສວນ-ສອບສວນຂະຫຍາຍຜົນຂອງເຈົ້າໜ້າທີ່ ເພື່ອຫາພັກພວກຮ່ວມຂະບວນການມາ ດຳເນີນຄະດີຕາມລະບຽບກົດໝາຍບ້ານເມືອງ.
ໂດຍ: ເສດຖະກິດ-ສັງຄົມ