ວິທະຍາໄລເຕັກນິກຊັບບພະວິຊາ ເປັນສະຖາບັນການສຶກສາທີ່ເຄື່ອນໄຫວພາຍໃຕ້ການຊີ້ນຳ-ນຳພາ ແລະ ຄຸ້ມຄອງຂອງກົມອາຊີວະສຶກສາ ກະຊວງສຶກສາທິການ ແລະ ກີລາ ເປັນສະຖາບັນການສຶກສາຂອງລັດ ໂດຍຖືເອົາການພັດທະນາຊັບພະຍາກອນມະນຸດ ໃຫ້ຕອບສະໜອງກັບຄວາມຕ້ອງການຂອງຕະຫຼາດແຮງງານ ແລະ ສັງຄົມໃນຫຼາຍຂະແໜງການ ຫຼາຍສາຂາວິຊາ ນັບທັງຊັ້ນກາງ ຊັ້ນສູງ ແລະ ຊັ້ນສູງຕໍ່ເນື່ອງ ໃນແຕ່ລະສົກສຶກສາ ແລະ ມີນັກສຶກສາທີ່ຈົບຈາກວິທະຍາໄລດັ່ງກ່າວຈຳນວນບໍ່ໜ້ອຍ ແລະ ສາມາດປະກອບອາຊີບທາງພາກລັດ ແລະ ເອກະຊົນ.
ທ່ານ ບຸນຖະໜອມ ສຸລິຍະວົງ ຮອງຜູ້ອຳນວຍການວິທະຍາໄລຊັບບພະວິຊາ ໃຫ້ສຳພາດວ່າ: ເພື່ອເປັນສ່ວນໜຶ່ງໃນການປະກອບສ່ວນ ພັດທະນາຊັບພະຍາກອນມະນຸດ ໃຫ້ມີຄວາມຮູ້ຄວາມສາມາດ ໃນການສ້າງສາພັດທະນາປະເທດຊາດ ກໍ່ຄືການສ້າງວຽກເຮັດງານທຳໃຫ້ຊາວໜຸ່ມ-ໄວໜຸ່ມ ແລະ ເພື່ອກະກຽມຕ້ອນຮັບສົກຮຽນ 2016-2017 ວິທະຍາໄລຂອງພວກເຮົາ ໄດ້ເອົາໃຈໃສ່ໃນການພັດທະນາຄູ-ອາຈານ ຫ້ອງຮຽນ ຫໍພັກຈຳນວນໜຶ່ງ ເພື່ອບັນຈຸນັກສຶກສາໃໝ່ ສຳລັບສົກຮຽນ 2016-2017 ຈະຮັບນັກສຶກສາໃໝ່ ປະມານ 1.000 ຄົນ ໃນສາຂາວິຊາຕ່າງໆ ເຊັ່ນ: ຫຼັກສູດສຳຫຼວດວັດແທກທີ່ດິນ ສຳຫຼວດວັດແທກກໍ່ສ້າງ ປະເມີນຄ່າຊັບສິນທີ່ດິນ IT ພູມສັນຖານ IT ອຸດສາຫະກຳ ສຳຫຼວດຂຸດຄົ້ນປຸງແຕ່ງແຮ່ ສິ່ງແວດລ້ອມໄຟຟ້າ ໃນນີ້ປະກອບມີ ໄຟຟ້າອາຄານ ໄຟຟ້າຕາຂ່າຍ ແລະ ໄຟຟ້າເຂື່ອນ ສ່ວນການຮຽນ-ການສອນ ນັ້ນແມ່ນຈະເນັ້ນການປະຕິບັດຕົວຈິງຫຼາຍກວ່າທິດສະດີ.
ນອກຈາກນີ້ ຍັງຮັບນັກຮຽນທີ່ຮຽນຈົບ ມ4 ເຂົ້າມາສຶກສາໃນລະບົບ 9+3 ຊັ້ນກາງ ໂດຍບໍ່ໄດ້ເສັງຄັດເລືອກແຕ່ຈະສຳພາດເອົາ ແລະ ບໍ່ໄດ້ເສຍຄ່າຮຽນໃດໆທັງໝົດ ພ້ອມທັງມີເງິນເບ້ຍລ້ຽງໃຫ້ໃນແຕ່ລະເດືອນ ເມື່ອຮຽນຈົບຊັ້ນກາງແລ້ວກໍ່ສາມາດເຊື່ອມຕໍ່ໃນລະບົບຊັ້ນສູງໄດ້ ສຳລັບທີ່ຮຽນຈົບ ມ7 ແມ່ນຈະຮຽນໃນລະບົບ 12+2 ຊັ້ນກາງ 12+3 ຊັ້ນສູງ ເຊິ່ງຈະເລີ່ມຂາຍຄຳຮ້ອງນັບແຕ່ວັນທີ 15/8-15/9/2016 ແລະ ຈະເສັງໃນວັນທີ 19/9/2016 ທີ່ວິທະຍາໄລດັ່ງກ່າວ ດັ່ງນັ້ນ ແຈ້ງມາຍັງນັກຮຽນທີ່ຮຽນຈົບ ມ4 ແລະ ມ7 ສາມາດພົວພັນໄດ້ທີ່ວິທະຍາໄລເຕັກນິກສັບພະວິຊາ.
ຂ່າວຈາກ: 