ພາຍຫຼັງສໍາເລັດການຢ້ຽມຢາມ ແລະ ເຮັດວຽກຢູ່ແຂວງ ຫຼວງພະບາງ ແລະ ແຂວງອຸດົມໄຊ ໃນວັນທີ 13 ສິງຫາ 2016 ທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍຄະນະ ໄດ້ສືບຕໍ່ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງຜົ້ງສາລີ.

ໃນໂອກາດດັ່ງກ່າວທ່ານນາຍົກໄດ້ຊີ້ນຳ ກ່ຽວກັບການຍົກຍ້າຍເທສະບານແຂວງ ແມ່ນໃຫ້ເອົາໃຈໃສ່ໃນຈັດສັນ ແລະ ວາງແຜນໃຫ້ລະອຽດ ເພື່ອເຮັດແນວ ໃດ ໃຫ້ເມືອງເທສະບານ ກາຍເປັນເມືອງທັນສະໄໝ, ມີຄວາມເປັນລະບຽບຮຽບຮ້ອຍ, ສະອາດງາມຕາ ແລະ ກາຍເປັນເມືອງຕົວແບບໃຫ້ແກ່ ເທສະບານຂອງບັນດາແຂວງພາກເໜືອ. ສິ່ງສໍາຄັນແມ່ນ ໃຫ້ມີການປະຫຍັດງົບປະມານ ໃນການກໍ່ສ້າງ ແລະ ການຄຸ້ມຄອງນຳໃຊ້ ເພື່ອສາມາດນໍາໃຊ້ໃຫ້ຍາວນານ.