ສຳນັກຂ່າວຕ່າງປະເທດ ລາຍງານໃນວັນທີ 12 ສິງຫານີ້ວ່າ ທ່ານ ເຣເຊບ ເຕຢິບ ເອີໂອກັນ ປະທານາທິບໍດີຕວກກີ ໄດ້ຍື່ນຄຳຂາດເຖິງ ລັດຖະບານສະຫະລັດອາເມຣິກາ ຮຽກຮ້ອງໃຫ້ສົ່ງຕົວ ທ່ານ ເຟຕຸນເລາະ ກູເລນ ນັກສາສະໜາທີ່ມີຊື່ສຽງຂອງຕວກກີ ຊຶ່ງລີ້ໄພຢູ່ສະຫະລັດອາເມຣິກາ ຕັ້ງແຕ່ປີ 1999 ກັບຄືນມາໃຫ້ຕວກກີ ໃນຖານະຜູ້ຮ້າຍຂ້າມແດນ ຫລັງຈາກທີ່ລັດຖະບານຕວກກີຖືວ່າ ທ່ານ ກູເລນ ເປັນຜູ້ຢູ່ເບື້ອງຫລັງ ຄວາມພະຍາຍາມລັດຖະປະຫານ ທີ່ຫລົ້ມເຫລວ ເມື່ອວັນທີ 15 ກໍລະກົດ 2016 ທີ່ຜ່ານມາ, ຖ້າບໍ່ດັ່ງນັ້ນ ອາດກະທົບຕໍ່ຄວາມສຳພັນ ລະຫວ່າງສອງປະເທດ.
ທ່ານ ກູເລນ ໄດ້ຢືນຢັນມາໂດຍຕະຫລອດວ່າ ຕົນເອງບໍ່ມີສ່ວນກ່ຽວຂ້ອງ ກັບຄວາມພະຍາຍາມລັດຖະປະຫານ ແລະ ປະຕິເສດໝາຍຈັບ ທີ່ອອກໂດຍທາງການຕວກກີ. ແນວໃດກໍຕາມ, ທ່ານ ບາຣັກ ໂອບາມາ ປະທານາທິບໍດີ ສະຫະລັດອາເມຣິກາ ໄດ້ລະບຸວ່າ ນັກສາສະໜາບຸກຄົນນີ້ ຈະຖືກສົ່ງໄປຕວກກີ ໃນຖານະຜູ້ຮ້າຍຂ້າມແດນ ກໍຕໍ່ເມື່ອເປັນຜົນ ຂອງຂະບວນການທາງກົດໝາຍເທົ່ານັ້ນ.
ຕິດຕາມເຮາທາງFacebook ກົດຖືກໃຈເລີຍ!