ການສອບເສັງນັກຮຽນສາມັນ ເຂົ້າຮຽນມະຫາວິທະຍາໄລ 4 ແຫ່ງທົ່ວປະເທດ ໃນສົກຮຽນ 2016-2017 ໄດ້ມີຂຶ້ນ ໃນວັນທີ 11 ສິງຫານີ້ ຊຶ່ງທົ່ວປະເທດມີນັກຮຽນ ຫລາຍກວ່າ 15 ພັນຄົນ ສົ່ງແບບຟອມເພື່ອເຂົ້າຮ່ວມ ສອບເສັງທັງໝົດ, ແຕ່ ມຊ ຈະຄັດເລືອກເອົາພຽງ 5.335 ຄົນ, ໃນນັ້ນປະກອບມີນັກສຶກສາໃນແຜນ 703 ຄົນ, ພະນັກງານຮຽນຕາມແຜນແບ່ງປັນ 36 ຄົນ, ນັກສຶກສາຕໍ່ເນື່ອງປະລິນຍາຕີ 1.030 ຄົນ, ອະນຸປະລິນຍາ 90 ຄົນ ແລະ ສອບເສັງເຂົ້າໃໝ່ 3.476 ຄົນ.

ຫົວໜ້າວິຊາການ ມະຫາວິທະຍາໄລແຫ່ງຊາດ ໃຫ້ຮູ້ວ່າ: ພາຍຫລັງໄດ້ຮັບຂໍ້ຕົກລົງຂອງ ທ່ານລັດຖະມົນຕີກະຊວງສຶກສາທິການ ແລະ ກິລາ ວ່າດ້ວຍການແຕ່ງຕັ້ງຄະນະຮັບຜິດຊອບລວມ ໃນການຈັດຕັ້ງການສອບເສັງ ນັກຮຽນສາມັນ ເຂົ້າຮຽນມະຫາວິທະຍາໄລ ທັງ 4 ແຫ່ງທົ່ວປະເທດຄື: ມະຫາວິທະຍາໄລແຫ່ງຊາດ, ສຸພານຸວົງ, ຈຳປາສັກ ແລະ ສະຫວັນນະເຂດ, ດັ່ງນັ້ນ ອະທິການບໍດີມະຫາວິທະຍາໄລ ຈຶ່ງໄດ້ອອກຂໍ້ຕົກລົງ ແຕ່ງຕັ້ງຄະນະກຳມະການດ້ານຕ່າງໆ ເພື່ອຈັດຕັ້ງປະຕິບັດ ການສອບເສັງດັ່ງກ່າວ ໃຫ້ມີຄຸນນະພາບ, ສຳລັບຢູ່ນະຄອນຫລວງວຽງຈັນ ໄດ້ແບ່ງອອກເປັນ 20 ສູນຄື: ວິທະຍາເຂດດົງໂດກ ປະກອບມີ 13 ສູນ ແລະ ສູນນອກວິທະຍາເຂດ 4 ສູນຄື: ມສ ວຽງຈັນ, ມສ ວຽງຈັນ-ໂຮ່ຈິມິນ, ມປ ມິດຕະພາບວຽງຈັນ-ຮ່າໂນ່ຍ ຫລັກ 5, ມສ ຕານມີໄຊ, ສ່ວນວິທະຍາເຂດໂສກປ່າຫລວງ ມີ 3 ຈຸດຄື: ຄະນະວິສະວະກຳສາດ, ຄະນະນິຕິສາດ-ລັດຖະສາດ ແລະ ວິທະຍາໄລຊັບພະວິຊາ. ນອກນີ້ ການກະກຽມຫົວບົດສອບເສັງ ແມ່ນໄດ້ປະຕິບັດຕາມທິດຊີ້ນຳ ຂອງກະຊວງສຶກສາທິການ ແລະ ກິລາ ກໍຄື ໄດ້ປະຕິບັດເປັນເອກກະພາບກັນ ໃນທົ່ວປະເທດ ເພື່ອຮັບປະກັນໃນຄວາມໂປ່ງໃສ.

ແຫລ່ງຂ່າວ:

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!