ສຳນັກຂ່າວຕ່າງປະເທດ ລາຍງານໃນວັນທີ 9 ສິງຫາຜ່ານມານີ້ວ່າ ອິດທິພົນຂອງພາຍຸໄຕ້ຝຸ່ນມິຣິແນ ແລະ ພາຍຸໄຕ້ຝຸ່ນນິດາ ຊຶ່ງພັດຖະຫລົ່ມຫວຽດນາມ ໃນທ້າຍເດືອນກໍລະກົດ ແລະ ຕົ້ນເດືອນສິງຫາຜ່ານມາ ຕາມລຳດັບ ໄດ້ສ້າງຄວາມເສຍຫາຍ ລວມມູນຄ່າຫລາຍກວ່າ 6,700 ຕື້ດົງ ຫລື ປະມານ 300 ລ້ານໂດລາ ຕາມການລາຍງານຂອງ ກະຊວງກະສິກຳ ແລະ ພັດທະນາຊົນນະບົດຫວຽດນາມ. ນອກຈາກນັ້ນ, ພາຍຸໄຕ້ຝຸ່ນ 2 ຫົວດັ່ງກ່າວນີ້ ຍັງເຮັດໃຫ້ມີຜູ້ເສຍຊີວິດ 20 ຄົນ, ສູນຫາຍ ແລະ ໄດ້ຮັບບາດເຈັບອີກ 82 ຄົນ.
ທ່ານ ຈິງດິ່ງຢູງ ຮອງນາຍົກລັດຖະມົນຕີຫວຽດນາມ ລະບຸວ່າ ສາເຫດຕົ້ນຕໍຂອງຄວາມເສຍຫາຍ ທີ່ມີມູນຄ່າມະຫາສານນີ້ ແມ່ນເນື່ອງຈາກຄວາມບົກພ່ອງ ຂອງການພະຍາກອນອາກາດຫວຽດນາມ.
ດ້ານລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ກໍໄດ້ກ່າວວ່າ ການພະຍາກອນໄພພິບັດ ຈຳເປັນຕ້ອງໄດ້ຮັບການປັບປຸງ ທັງໃນເລື່ອງອຸປະກອນ ແລະ ການເຝິກອົບຮົມເຈົ້າໜ້າທີ່, ໃນຂະນະດຽວກັນ ການຮ່ວມມືລະຫວ່າງປະເທດ ຄວນໃຫ້ມີປະສິດທິພາບຫລາຍຂຶ້ນ ເພື່ອໃຫ້ການພະຍາກອນອາກາດ ມີຄວາມໜ້າເຊື່ອຖືໄດ້ຫລາຍກວ່ານີ້.
ຕິດຕາມເຮາທາງFacebook ກົດຖືກໃຈເລີຍ!