ທ້າວ ເຢຍທໍ ອາຍຸ 28 ປີຢູ່ບ້ານຈອມຈຸກ ແລະ ທ້າວ ກົວຮາ ອາຍຸ29 ປີຢູ່ບ້ານນໍ້າແລ, ເມືອງຫ້ວຍຊາຍ, ແຂວງບໍ່ແກ້ວ, ໄດ້ຖືກເຈົ້າໜ້າທີ່ ປກສ ເມືອງນໍ້າບາກ, ແຂວງຫລວງພະບາງ ຈັບຕົວມາດໍາເນີນຄະດີເມື່ອບໍ່ດົນມານີ້,ຫລັງຈາກພາກັນລັກລອບເອົາຢາເສບຕິດປະເພດເຮໂຣອີນຈໍານວນ 12 ແທ່ງຂຶ້ນລົດໂດຍສານເພື່ອມາສົ່ງໃຫ້ລູກຄ້າຢູ່ແຂວງຫລວງພະບາງ.
ເຈົ້າໜ້າທີ່ ປກສ ເມືອງນໍ້າບາກ ໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກພົນລະເມືອງດີໃນວັນທີ 26 ກໍລະກົດ 2016 ວ່າຈະມີການຂົນສົ່ງຢາເສບຕິດລາຍໃຫຍ່ເຂົ້າມາແຂວງຫລວງພະບາງ, ຈຶ່ງໄດ້ຈັດກໍາລັງລົງກວດກາຕາມສາຍທາງ ແລະ ຄິວລົດໂດຍສານຕ່າງໆ,ຈຶ່ງສາມາດຈັບຂະວນການຄ້າ ຂາຍຢາເສບຕິດດັ່ງກ່າວພ້ອມຂອງກາງເຮໂຣອີນຈໍານວນ 12 ແທ່ງຊຸກເຊື່ອງໄວ້ໃນຖົງຜ້າຫົ່ມຂອງພວກກ່ຽວໄວ້ເປັນຫລັກຖານໃນການດໍາເນີນຄະດີ.
ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ເຮໂຣອີນ ທັງໝົດເປັນຂອງພວກຕົນແທ້ ໂດຍເອົາມາຈາກເຄື່ອຂ່າຍຄ້າຂາຍຢາເສບຕິດລາຍໃຫຍ່ໃນເຂດເມືອງຫ້ວຍຊາຍ, ແຂວງບໍ່ແກ້ວ ເພື່ອເອົາມາສົ່ງໃຫ້ລູກຄ້າຢູ່ແຂວງຫລວງພະບາງ, ແຕ່ຖືກເຈົ້າໜ້າທີ່ຈັບຕົວໄດ້ເສຍກ່ອນ ແລະ ປັດຈຸບັນຄະດີຢາເສບຕິດລາຍນີ້ພວມຢູ່ໃນຂັ້ນຕອນສະຫລຸບສໍານວນເພື່ອສົ່ງໃຫ້ໄອຍະການສັ່ງຟ້ອງສານຕັດສີນລົງໂທດຕາມລະບຽບກົດໝາຍ ແລະ ຈະຂະຫຍາຍຜົນຫາຜູ້ຮ່ວມຂະບວນການເພື່ອນໍາຈັບຕົວມາດໍາເນີນຄະດີໂດຍໄວ.
ຂ່າວຈາກ: 