ໃນວັນທີ 06.08.2016 ເວລາ 16:23ໂມງ ໜ່ວຍກູ້ໄພ ມູນນິທິ ຊ່ວຍເຫຼືອຄົນທຸກຍາກແຫ່ງ ສປປ ລາວ ໄດ້ຮັບແຈ້ງເຫດຜ່ານເບີສຸກເສີນ 1623 ວ່າມີຫຼັກເສົາໄຟລົ້ມທັບເດັກນ້ອຍ ຈຸດເກີດເຫດແມ່ນ ບ້ານ ໜອງແຫ້ວ ເມືອງ ຫາດຊາຍຟອງ ນະຄອນຫຼວງວຽງຈັນ.
ພໍໜ່ວຍກູ້ໄພມູນນິທິ ອອກກວດສອບພົບເຫັນ ຜູ້ບາດເຈັບ 1 ຄົນ ເປັນເພດຊາຍ ອາຍຸ 13ປີ ອາການເບື້ອງຕົ້ນແມ່ນ ກະທົບຫົວຮຸນແຮງ,ກະໂຫຼກຫົວແຕກ,ເລືອດອອກດັງ,ເລືອດອອກປາກ,ຕາບວມ ແລະ ບໍ່ມີສະຕິ.
ໜ່ວຍກູ້ໄພມູນນິທິ 1623 ຈຶ່ງໄດ້ປະຖົມພະຍາບານຂັ້ນຕົ້ນແລ້ວນຳສົ່ງໂຮງໝໍເສດຖາໂດຍດ່ວນ ແຕ່ເນື່ອງຈາກໄດ້ຮັບບາດເຈັບໜັກ ເມື່ອໄປຮອດໂຮງໝໍ ທາງກູ້ໄພ ແລະ ທ່ານໝໍໄດ້ພະຍາຍາມກູ້ຊີວິດຂອງຄົນເຈັບໄວ້ແຕ່ບໍ່ສຳເລັດ ແລະ ໄດ້ເສຍຊີວິດໃນເວລາຕໍ່ມາທີ່ໂຮງໝໍເສດຖາທິຣາດ.
ຂໍ້ມູນເບື້ອງຕົ້ນໃຫ້ຮູ້ວ່າ ຜູ້ຕາຍໄດ້ນອນຫລິ້ນຢູ່ເປທີ່ມັດໃສ່ກັບຫຼັກເສົາຊີມັງ ແລ້ວເສົາຫັກລົງທັບ.
ສິ່ງທີ່ເປັນບົດຮຽນຈາກເຫດການນີ້ແມ່ນ ເຮັດໃຫ້ຮູ້ວ່າເສົາຊີມັງຫຼໍ່ສຳເລັດຮູບ ທີີ່ປະຊາຊົນມັກຊື້ມາເຮັດເສົາເຮືອນ ຫຼືເສົາກຳແພງນັ້ນ ແມ່ນບໍ່ຄ່ອຍມີຄວາມທົນທານ ມີຄວາມຜຸຜ່ອຍ ຫັກງ່າຍ ແລະເຫຼັກທີ່ໃຊ້ເຂົ້າໃນການຜະລິດເສົາກໍບໍ່ໄດ້ມາຕະຖານ ສ່ວນປະສົມຂອງຊີມັງກໍບໍ່ໄດ້ມາຕະຖານເຊັ່ນກັນ ໜ່ວຍງານຄວບຄຸມເລື່ອງມາຕະຖານ ແລະຄຸ້ມຄອງຜູ້ບໍລິໂພກ ຄວນເບິ່ງຄືນເລື່ອງນີ້ ເພື່ອເຮັດໃຫ້ປະຊາຊົນໄດ້ຊົມໃຊ້ວັດຖຸກໍ່ສ້າງທີ່ໄດ້ມາຕະຖານ.
ຂໍ້ມູນຂ່າວຈາກໜ່ວຍກູ້ໄພ ມູນນິທິຊ່ວຍເຫຼືອຄົນທຸກຍາກແຫ່ງປະເທດລາວ
