ທາດຝຸ່ນ ເປັນສະຖານທີ່ທ່ອງທ່ຽວໃນແຂວງຊຽງຂວາງອີກແຫ່ງໜຶ່ງ ທີ່ຫຼົງເຫຼືອຈາກສົງຄາມ ຊຶ່ງຕັ້ງຢູ່ບ້ານສີພົມ ເມືອງຄູນ ແຂວງຊຽງຂວາງ ນັກທ່ອງທ່ຽວໜ້ອຍຄົນທີ່ຈະຮູ້ຈັກ ເນື່ອງຈາກບໍ່ຄ່ອຍມີປ້າຍບອກສະຖານທີ່ທ່ອງທ່ຽວແຫ່ງນີ້ ພຣະທາດຝຸ່ນ ເປັນເຈດີທີ່ມີຄວາມເກົ່າແກ່ ຊິ່ງໃນປັດຈຸບັນຍັງຄົງຮັກສາຄວາມສົມບູນຂອງພຣະທາດໄດ້ເປັນຢ່າງດີ ແຕ່ກໍ່ຊຸດໂຊມໄປຕາມການເວລາ ເນື່ອງຈາກຖານຂອງພຣະທາດໄດ້ຖືກເຈາະເປັນໂຜ້ງຄ້າຍກັບວ່າຖືກຄຸດເອົາວັດຖຸທີ່ມີຄ່າພາຍໃນອົງພຣະທາດ, ແຕ່ໃນປັດຈຸບັນມີຕົ້ນໄມ້ຂຶ້ນປົກຄຸມພຣະທາດ ຈົນເຮັດໃຫ້ພຣະທາດເວລາເບິ່ງແລ້ວເປັນສີຂຽວ ເນື່ອງຈາກໃບໄມ້ທີ່ປົກຫຸ້ມນັ້ນເອງ ເຮັດໃຫ້ພຣະທາດຝຸ່ນເບິ່ງແລ້ວເໜືອນມີມົນສະເໜ່ສຳລັບຜູ້ທີ່ໄດ້ມາພົບເຫັນ.
ທາດຝຸ່ນກາຍເປັນສະຖານທ່ອງທ່ຽວໜຶ່ງທີ່ສຳຄັນຂອງແຂວງຊຽງຂວາງ ເພາະລັກສະນະເດັ່ນທີ່ຕັ້ງເປັນເອກະລັກ ເຮັດໃຫ້ຜູ້ຄົນທີ່ມາທ່ອງທ່ຽວບໍ່ພາດທີ່ຈະມາທ່ຽວຊົມ ແລະ ສຶກສາປະຫວັດຄວາມເປັນມາ ເຖິງວ່າປະຫວັດຄວາມເປັນມາຂອງທາດຝຸ່ນແຫ່ງນີ້ຈະບໍ່ມີລັກຖານທີ່ເປັນລາຍລັກອັກສອນ ຫຼື ບໍ່ມີລາຍລະອຽດທີ່ຊັດເຈນ ແຕ່ມັນໄດ້ເປັນສິ່ງໜຶ່ງທີ່ຍັງຢືນໃຫ້ໃຫ້ເຖິງຄວາມຈະເລີນຮຸ່ງເຮືອງຂອງປະເທດລາວເຮົາ ແລະ ຍັງເປັນສັນຍາລັກຂອງແຂວງຊຽງຂວາງອີກແຫ່ງໜຶ່ງ ທີ່ສາມາດດຶງດູດເອົາຄວາມສົນໃຈຈາກນັກທ່ອງທ່ຽວທັງພາຍໃນ ແລະ ຕ່າງປະເທດອີກດ້ວຍ.
ພາບແລະ ຂ່າວຈາກ: ເສດຖະກິດ-ການຄ້າ