ຂປລ. ໂຄງ​ການກໍ່​ສ້າງ​ເຂື່ອນ​ໄຟ​ຟ້າ​ນ້ຳ​ມັງ 1 ຕັ້ງ​ຢູ່​ສາຍ​ນ້ຳ​ມັງ ​ເຂດ​ບ້ານໂພນ​ສະ​ຫວັນ ເມືອງທ່າ​ພະ​ບາດ ແຂວງບໍ​ລິ​ຄຳ​ໄຊ ​ໂດຍ​ກວມ​​ເນື້ອ​ທີ່ ເມືອງ​ທ່າ​ພະ​ບາດ ແຂວງ​ບໍ​ລິ​ຄຳ​ໄຊ ແລະ ເມືອງ​ຮົ່ມ ແຂວງໄຊ​ສົມ​ບູນ. ປັດຈຸ​ບັນການກໍ່​ສ້າງ​ສຳ​ເລັດ​ 99% ຂອງ​ໜ້າ​ວຽກ​ທັງ​ໝົດ ພາຍຫລັງລົງມື​ການກໍ່​ສ້າງ​ ມາ​ແຕ່​ຕົ້ນປີ 2013 ​ແລະ ຄາດວ່າຈະ​ເປີດ​ການຜະລິດ​​ໄຟຟ້າ​ ໃນ​ເດືອນ​ຕຸ​ລາ 2016 ນີ້.

ທ່າ​ນ ຄຳ​ສິງ ສາຍ​ພູ​ວົງ ຮອງ​ຫົວ​ໜ້າ​ ພະ​ແນກພະ​ລັງ​ງານ ແລະ ບໍ່​ແຮ່​ ແຂວງບໍລິ​ຄຳ​ໄຊ ​​ໄດ້ໃຫ້​ສຳພາດ​ຕໍ່​ສື່​ມວນ​ຊົນ​ໃນ​ວັນ​ທີ 2 ສິງຫາ ​ນີ້ວ່າ: ໂຄງ​ການດັ່ງກ່າວ ​​ພາຍ​​ໃຕ້​ການ​ຄວບ​ຄຸມ​ການກໍ່​ສ້າງ ແລະ​ ດຳ​ເນີນ​ງານ​ຂອງ ບໍ​ລິ​ສັດນ້ຳ​ມັງ 1, ປະ​ກອບ​ມີ 4 ຂາ​ຮຸ້ນ​ໃຫ​ຍ່ ຄື: ບໍ​ລິ​ສັດ ດົງ​ຟ່າງ ສ​ປ​ ຈີນ ​ຖື​ຮຸ້ນ 75%, ລັດ​ວິ​ສາ​ຫະ​ກິດ​ໄຟ​ຟ້າ​ລາວ ຖື​ຮຸ້ນ 10%, ບໍ​ລິ​ສັດເອ​ຊີ (AC Industrial Ltd) ຖື​ຮຸ້ນ 10,75% ແລະ ບໍ​ລິ​ສັດ ສາຍ​ທາ ກໍ່​ສ້າງ​ ຈຳ​ກັດ​ຜູ້​ດຽວ ຖື​ຮຸ້ນ 4,25%. ລວ​ມ​ມູນ​ຄ່າ​ໃນ​ການກໍ່​ສ້າງ​ ທັງ​ໝົດ 94,99 ລ້ານ​ໂດ​ລາ​ສະ​ຫະ​ລັດ.

​​ເຂື່ອນດັ່ງກ່າວ ​ສ້າງດ້ວຍ​ບົບຄອນກ​ຣີດ, ​ຄວາມ​ສູງ​ຂອງ​ເຂື່ອນ 70 ​ແມັດ, ລະ​ດັບ​ສັນ​ເຂື່ອນ EL 265 ​ແມັດ, ຄວາມ​ຍາວ​ຂອງ​ສັນ​ເຂື່ອນ 273 ​ແມັດ, ກວ້າງ 8 ​ແມັດ, ​ເນື້ອ​ທີ່​ອ່າງ​ໂຕ່ງ 620.5 km², ​ເນື້ອ​ທີ່​ອ່າງ​ເກັບ​ນ້ຳ 0.32 km², ມີ​ກຳ​ລັງ​ຕິດ​ຕັ້ງ 64 MW, ຈະ​ສາມາດຜະ​ລິດ​ພະ​ລັງ​ງານ​ ໄດ້ 224.8 GWh/ປີ ແລະ ​ລະ​ບົບ​ສາຍ​ສົ່ງ 115 kV ມີ​ຄວາມຍາວ 6.64 km ເຊື່ອມ​ຕໍ່​ເຂົ້າສະ​ຖາ​ນີ​​ໄຟ​ຟ້າ​ທ່າ​ບົກ.​

ແຫລ່ງຂ່າວ:

ຕິດຕາມຂ່າວເສດຖະກິດລາວ ກົດໄລຄ໌ເລີຍ!