ຕອນຄ່ຳປະມານ 17:00 ຂອງວັນທີ 3 ກໍລະກົດ 2014 ນີ້ ລົດຂົນເຄື່ອງກໍ່ສ້າງຂອງຊາວໄທ ຂັບຜ່ານທາງດົງໂດກ-ຫນອງບຶກ ມາຮອດປາກຮ່ອມ 18 ບ້ານຫນອງພະຍາ ເມືອງໄຊທານີ ລົດໄດ້ຜ່ານເສັ້ນທາງທີ່ມີຂຸມ ກໍເລີຍເຮັດໃຫ້ດິນຂໍຕົກລົງຈາກລົດ ເສຍຫາຍຫລາຍລ້ານກີບ ແລະສະພາບການສັນຈອນຫຍຸ້ງຍາກສົມຄວນ.
ຈາກການໃຫ້ສຳພາດຂອງເຈົ້າຂອງລົດໄດ້ໃຫ້ຮູ້ວ່າ ລົດຄັນນີ້ເດິນທາງມາແຕ່ປະເທດໄທ ເພື່ອມາສົ່ງເຄື່ອງໃຫ້ບໍລິສັດກໍ່ສ້າງຂອງລາວບໍລິສັດໜຶ່ງ ເມື່ອເດິນທາງມາຮອດເຂດດັ່ງກ່າວ ເຊິ່ງສະພາບເສັ້ນທາງເປ່ເພ ທາງຂາດ ຈຶ່ງບໍ່ສາມາດຫຼີກໃຫ້ມົ້ມຂຸມໄດ້ ຈຶ່ງເຮັດໃຫ້ຕີນລົດຕົກລົງພະນັກຂອງຂຸມທີ່ຕ່າງລະດັບ ຈຶ່ງເຮັດໃຫ້ເຄື່ອງທີ່ບັນທຸກມາຂະຫຍັບຕົກລົງສູ່ພື້ນ ເຮັດໃຫ້ດິນຂໍແຕກຫັກຈຳນວນຫຼາຍ ຄິດເປັນເງິນລາວກໍຫຼາຍລ້ານກີບ ແຕ່ຍັງບໍ່ທັນໄດ້ສະຫຼຸບລະອຽດເທື່ອ.
ເຈົ້າຂອງລົດຄັນດັ່ງກ່າວກ່າວຕື່ມວ່າ ຂ້າພະເຈົ້າເຂົ້າໃຈວ່າ ປະເທດລາວກຳລັງພັດທະນາ ບັນຫາແບບນີ້ຈຶ່ງສາມາດເກີດຂຶ້ນໄດ້ ແຕ່ແນວໃດກໍຕາມ ຂ້າພະເຈົ້າກໍຂໍໃຫ້ປະເທດລາວພັດທະນາລະບົບພື້ນຖານໂຄງລ່າງ ໂດຍສະເພາະແມ່ນທາງໄປກ່ອນກ້າວໜຶ່ງຂອງການພັດທະນາເສດຖະກິດ ເພາະເປັນຫົວໃຈຫຼັກຂອງການພັດທະນາ ຄືດັ່ງທ່ານໄດ້ເຫັນຕົວຈິງນີ້ລະ ຖ້າສະພາບເສັ້ນທາງບໍ່ສະດວກກໍຈະກົດໜ່ວງການພັດທະນາ.
