ສຳນັກຂ່າວຕ່າງປະເທດ ລາຍງານໃນວັນທີ 1 ສິງຫາຜ່ານມານີ້ວ່າ ລັດຖະບານຫວຽດນາມ ໄດ້ເປີດເຜີຍຜົນກະທົບ ຈາກກໍລະນີສານພິດ ຊຶ່ງປ່ອຍລົງສູ່ທະເລ ຈາກໂຮງງານເຫລັກທີ່ຄວບຄຸມໂດຍ ບໍລິສັດ Formosa Plastics Group ຊຶ່ງເປັນບໍລິສັດລົງທຶນຂອງໄຕ້ຫວັນ ໄດ້ສົ່ງຜົນກະທົບຕໍ່ວິຖີຊີວິດ ຄວາມເປັນຢູ່ຂອງປະຊາຊົນ ຫລາຍກວ່າ 200,000 ຄົນ ລວມທັງຊາວປະມົງອີກ 41,000 ຄົນ ພ້ອມທັງຍັງທຳລາຍພາກການທ່ອງທ່ຽວ ໃນຫລາຍແຂວງ ທາງພາກກາງຂອງປະເທດອີກດ້ວຍ.

ທັງນີ້ ຈາກການປ່ອຍສານພິດລົງທະເລ ຂອງໂຮງງານແຫ່ງດັ່ງກ່າວ ໄດ້ເຮັດໃຫ້ມີປາປະມານ 115 ໂຕນ ຕາຍ ແລະ ຖືກນ້ຳພັດມາຄ້າງຕາມຊາຍຫາດ ຢູ່ບັນດາແຂວງພາກກາງຂອງຫວຽດນາມ ເປັນໄລຍະຄວາມຍາວຕາມຊາຍຝັ່ງ ກວ່າ 200 ກິໂລແມັດ ໃນເດືອນເມສາຜ່ານມາ ໃນຂະນະທີ່ມີປາລ້ຽງໃນຟາມ ຕາຍອີກ 140 ໂຕນ ແລະ ຫອຍຕາຍອີກ 67 ໂຕນ ສ້າງຄວາມບໍ່ພໍໃຈແກ່ປະຊາຊົນ ເຮັດໃຫ້ເກີດມີການໂຮມຊຸມນຸມປະທ້ວງ ບໍລິສັດດັ່ງກ່າວ.

ແນວໃດກໍຕາມ ທ້າຍເດືອນມິຖຸນາຜ່ານມາ ບໍລິສັດ Formosa ໄດ້ອອກມາຍອມຮັບຜິດ ພ້ອມທັງສັນຍາ ຈະຈ່າຍເງິນຊົດເຊີຍ 500 ລ້ານໂດລາ ເພື່ອທຳຄວາມສະອາດ ແລະ ຊົດເຊີຍໃຫ້ແກ່ຜູ້ທີ່ໄດ້ຮັບຜົນກະທົບ.

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!