ຂປລ. ກະຊວງວິທະຍາສາດ ແລະ ເຕັກໂນໂລຊີ ໄດ້ສຳເລັດການສ້າງຕັ້ງ ແລະ ເປີດນຳໃຊ້ ຫ້ອງການກວດຄຸນນະພາບນ້ຳມັນເຊື້ອໄຟ ປະຈຳດ່ານຂົວມິດຕະພາບ ລາວ-ໄທ ແຫ່ງທີ 1 ເມືອງຫາດຊາຍຟອງ ນະຄອນຫລວງວຽງຈັນ ໃນວັນທີ 1 ສິງຫາ 2016 ເພື່ອເປັນສະຖານທີ່ ກວດຄຸນນະພາບນ້ຳມັນເຊື້ອໄຟ ທີ່ຜະລິດນຳເຂົ້າ-ສົ່ງອອກ ແລະ ຈຳໜ່າຍ ຢູ່ ສປປ ລາວ ໃຫ້ມີມາດຕະຖານສາກົນ. ນອກຈາກການກວດດ້ານເອກະສານ ແລະ ນ້ຳມັນເຊື້ອໄຟທີ່ເຂັ້ມງວດແລ້ວ ພະນັກງານຍັງຈະໄດ້ຕິດຕາມ ກວດກາເຖິງພາຫະນະຂົນສົ່ງ, ນັບທັງສາງເກັບມ້ຽນນ້ຳມັນ, ປ້ຳຈຳໜ່າຍນ້ຳມັນເຊື້ອໄຟຕື່ມອີກ ເພື່ອປົກປ້ອງຜົນປະໂຫຍດແກ່ຜູ້ຊົມໃຊ້.
ກະຊວງວິທະຍາສາດ ແລະ ເຕັກໂນໂລຊີ ລະບຸວ່າ: ໃນໄລຍະຜ່ານມາ ໄດ້ເກີດມີກໍລະນີທີ່ມີບາງຫົວໜ່ວຍທຸລະກິດ ກໍຄື ຜູ້ປະກອບການນຳເຂົ້ານ້ຳມັນເຊື້ອໄຟ ບໍ່ໄດ້ມາດຕະຖານ ອັນໄດ້ເຮັດໃຫ້ຜູ້ຊົມໃຊ້ ປະສົບກັບບັນຫາຕາມມາ ບໍ່ວ່າຈະເປັນນ້ຳມັນບໍ່ມີຄຸນະພາບ ແລະ ນ້ຳມັນປະສົມກັບສິ່ງເຈືອປົນ ບັນຫາດັ່ງກ່າວເກີດຂຶ້ນ ຍ້ອນຜູ້ປະກອບການນຳໃຊ້ພາຫະນະຂົນສົ່ງນ້ຳມັນບໍ່ຖືກຕ້ອງ ແລະ ຍັງຂາດຄວາມເຂັ້ມງວດ ໃນການກວດກາຄຸນນະພາບ ຈາກພາກສ່ວນກ່ຽວຂ້ອງ.
ສະນັ້ນ, ການສ້າງຕັ້ງຫ້ອງການ ກວດຄຸນນະພາບນ້ຳມັນເຊື້ອໄຟ ປະຈຳດ່ານຄັ້ງນີ້ ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ ໃນການແກ້ໄຂບັນຫາປະກົດການຫຍໍ້ທໍ້ ແລະ ປົກປ້ອງຜູ້ຊົມໃຊ້ນ້ຳມັນເຊື້ອໄຟຢູ່ ສປປ ລາວ ໃຫ້ມີຄຸນນະພາບ, ຖືກຕ້ອງຕາມມາດຕະຖານແຫ່ງຊາດ ກໍຄືມາດຕະຖານສາກົນ.
ແຫລ່ງຂ່າວ:
ຕິດຕາມຂ່າວເສດຖະກິດລາວ ກົດໄລຄ໌ເລີຍ!