ໃນວັນທີ 01 ສິງຫາ 2016, ທີ່ ກະຊວງການຕ່າງປະເທດ, ພະນະທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການເຂົ້າອຳລາຂອງ ທ່ານ Michel Goffin, ອຸປະທູດ ອີຢູ. ໃນໂອກາດດັ່ງກ່າວ, ທ່ານລັດຖະມົນຕີໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທ່ານ ອຸປະທູດ ທີ່ໄດ້ເຮັດໜ້າທີ່ສຳເລັໜ້າທີ່ການທູດຢູ່ ສປປ ລາວ ແລະ ສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜຸນ ແລະ ການຊ່ວຍເຫຼືອຂອງສະຫະພາບເອີຣົບ ທີ່ມີຕໍ່ ສປປ ລາວ ໃນໄລຍະຜ່ານມາ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການພັດທະນາປະເທດ ເພື່ອນຳເອົາ ສປປ ລາວ ອອກຈາກສະຖານະພາບປະເທດດ້ອຍພັດທະນາໃນປີ2020.
ພ້ອມດຽວກັນນີ້, ທ່ານລັດຖະມົນຕີ ຍັງໄດ້ປຶກສາຫາລືບາງທິດທາງທີ່ຈະສືບຕໍ່ເສີມຂະຫຍາຍການພົວພັນຮ່ວມມືໃນຕໍ່ໜ້າ ແລະ ບັນຫາທີ່ຍັງຄ້າງຄາ ເພື່ອຈະໄດ້ປັບປຸງ ແລະ ເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງ ລາວ-ອີຢູ ໃຫ້ນັບມື້ນັບດີຂຶ້ນພ້ອມທັງສະແດງຄວາມຫວັງວ່າສາຍພົວພັນມິດຕະພາບ ແລະ ການພົວພັນຮ່ວມມື ລະຫວ່າງສອງຝ່າຍຈະສືບຕໍ່ຮັດແໜ້ນ ແລະ ຂະຫຍາຍຕົວຍິ່ງຂຶ້ນໃນອະນາຄົດ.